កិច្ចប្រជុំពិភាក្សាស្តីពីវឌ្ឍនភាពការងារ បន្ទាប់ពីការដាក់ឱ្យដំណើរការសាកល្បងគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ទីស្តីការក្រសួង៖ ថ្ងៃសុក្រ ២កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៥ ខែវិច្ឆិកា ឆ្នាំ២០២២ ឯកឧត្តម អៀង វ៉េងស៊ុន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្តីពីវឌ្ឍនភាពការងារ បន្ទាប់ពីការដាក់ឱ្យដំណើរការសាកល្បងគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ដោយមានការអញ្ជើញចូលរួមពីថ្នាក់ដឹកនាំក្រសួង ឯកឧត្តម អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ តំណាងអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ទីប្រឹក្សាក្រុមហ៊ុន Mitsubishi Research Institute, Inc ជំនាញការ JICA ក្រសួង និងតំណាង JICA ប្រចាំកម្ពុជាផងដែរ។ ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការប្រធានអង្គប្រជុំ បានស្នើឱ្យទីភ្នាក់ងារ JICA ពិនិត្យលទ្ធភាពរៀបចំវគ្គបណ្តុះបណ្តាលដល់មន្ត្រីបច្ចេកវិទ្យាព័ត៌មានក្រសួងសាធារណការ និងដឹកជញ្ជូនបន្ថែមទៀត ដើម្បីត្រៀមលក្ខណៈក្នុងការគ្រប់គ្រងប្រព័ន្ធដោយខ្លួនឯង បន្ទាប់ពីបញ្ចប់កិច្ចសន្យាជាមួយក្រុមហ៊ុន Exeo Group នៅខែសីហា ឆ្នាំ២០២៣ខាងមុខនេះ។ គួររំលឹកផងដែរថា៖ ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ត្រូវដាក់ឱ្យដំណើរការសាកល្បងដោយជោគជ័យនៅថ្ងៃទី១៧ ខែសីហា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដើម្បីសម្រួលដល់នីតិវិធីក្នុងការរៀបចំបែបបទនាវាចេញ-ចូលនៅកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ។ ប្រព័ន្ធផ្លាស់ប្ដូរទិន្នន័យកំពង់ផែអេឡិចត្រូនិក (Port EDI) បានរៀបចំឡើងក្រោមហិរញ្ញប្បទានឥតសំណងរបស់ប្រទេសជប៉ុនតាមរយៈទីភ្នាក់ងារសហប្រតិបត្តិការអន្តរជាតិប្រទេសជប៉ុន (JICA) ដែលជាការធ្វើទំនើបកម្មទ្រង់ទ្រាយធំមួយលើការត្រួតពិនិត្យនាវាចរណ៍ចេញ-ចូលនៅកម្ពុជា ដោយប្តូរពីការធ្វើការដោយដៃមកធ្វើការលើប្រព័ន្ធអនឡាញវិញ៕