នៅថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២ ខាងមុខនេះកម្ពុជានឹងត្រូវរៀបចំកិច្ចប្រជុំកំពូលអាស៊ានលើកទី៤០ និងលើកទី៤១ និងកិច្ចប្រជុំនានា នៅសណ្ឋាគាររ៉េស៊ីដង់សុខាភ្នំពេញ។ ក្នុងកិច្ចប្រជុំខាងលើនេះនឹងមានការចូលរួមពីប្រតិភូជាតិ និងអន្ដរជាតិយ៉ាងច្រើនកុះករ ដូចនេះដើម្បីឲ្យកិច្ចប្រជុំប្រព្រឹត្ដទៅដោយរលូន​ រក្សាបាននូវសន្ដិសុខ សណ្ដាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសបាននូវការកកស្ទះចរាចរ រដ្ឋបាលរាជធានីភ្នំពេញ នឹងបញ្ចៀសចរាចរចំពោះយានយន្ដគ្រប់ប្រភេទនៅតាមបណ្ដាវិថីសំខាន់ៗមួយចំនួនក្នុងអំឡុងពេលគណៈប្រតិភូជាន់ខ្ពស់ជាតិ និងអន្ដរជាតិធ្វើដំណើរឆ្លងកាត់ចូលរួមកិច្ចប្រជុំកំពូលអាស៊ាន តាមការបរិច្ឆេទខាងលើនេះ តាមតម្រាយផ្លូវដូចខាងក្រោម៖ ១. ចំពោះយានយន្ដដែលធ្វើដំណើរចូលរាជធានីភ្នំពេញតាមហាមវិថីសហព័ន្ធរុស្សី ត្រូវបង្វែរទិសចរាចរណ៍ត្រង់ចំណុចស្ពានអាកាសចោមចៅទៅមហាវិថីចោមចៅ។ ២. ចំពោះយានយន្ដដែលធ្វើដំណើរចេញ-ចូលមហាវិថីព្រះនរោត្ដម ត្រូវបង្វែរទិសចរាចរណ៍តាមផ្លូវលេខ ៦៣ និងតីរវិថីព្រះស៊ីសុវត្ថិ។ ៣. ចំពោះយានយន្ដដែលធ្វើដំណើរចេញ-ចូលមហាវិថីព្រះមុនីវង្ស ត្រូវបង្វែរទិសត្រង់ច្រមុះជ្រូកក្បាលថ្នល់ឆ្ពោះទៅមហាវិថីកងយោធពលខេមរភូមិន្ទ (ផ្លូវ ២៧១) និងត្រង់រង្វង់មូលកួចកាណុងត្រូវបង្វែរទៅវិថីឧកញ៉ា ឃ្លាំងមឿន (ផ្លូវ ៧០)។ ៤. ចំពោះយានយន្ដដែលធ្វើដំណើរចូលរាជធានីភ្នំពេញតាមផ្លូវជាតិលេខ ៦ ត្រូវបង្វែរទិសចរាចរណ៍តាមមហាវិថីឈ្នះឈ្នះ។ ករណីយានយន្ដស្ថិតនៅក្នុងតំបន់ជ្រោយចង្វារត្រូវបង្វែរទិសចរាចរណ៍ទៅតាមរង្វង់មូលនាងទេពមច្ឆាឆ្លងតាមស្ពានបេឡេចូលរាជធានីភ្នំពេញ។ ៥. ចំពោះយានយន្ដដែលធ្វើដំណើរលើវិថីឧកញ៉ា ឃ្លាំងមឿន (ផ្លូវលេខ៧០) ក្នុងទិសដៅទៅរង្វង់មូលកួចកាណុងត្រូវបង្វែរទិសចរាចរណ៍ចូលតាមមហាវិថីស៊ីធីសេនធ័រ (ផ្លូវលេខ ១៦៩ តំបន់បឹងកក់) និងផ្លូវបេតុងផ្សារសំហាន់ឆ្ពោះទៅផ្លូវលេខ ៥៩៨។ ៦. ចំពោះយានយន្ដដឹកខ្សាច់ និងទូកទេសចរណ៍ពុំអនុញ្ញាតឲ្យចរាចរតាមដងទន្លេសាប និងទន្លេមេគង្គ ចាប់ពីថ្ងៃទី៦ ដល់ថ្ងៃទី១៣ ខែវិច្ឆិកា ឆ្នាំ២០២២។ ៧. ចំពោះកំពង់ចម្លងសុខាមករាជធានីភ្នំពេញ ត្រូវបានផ្អាកដំណើរការទាំងស្រុង ក្នុងអំឡុងពេលកិច្ចប្រជុំខាងលើ។ ដោយឡែកចំពោះកំពង់ចម្លងអរិក្សត្រអនុញ្ញាតឲ្យដំណើរការធម្មតា តែទីតាំងកំពង់ចម្លងផ្នែកខាងលិចត្រូវប្ដូរទៅចត និងឡើងនៅកំពង់ចម្លងខាងកោះពេជ្យវិញ។៨. ហាមដាច់ខាតការបង្ហោះខ្លែង និងឧបករណ៍ម៉ាស៊ីនថតរូប និងវីដេអូបំពាក់ខាងលើយន្ដហោះបញ្ជា (Drone) ក្នុងភូមិសាស្រ្ដរាជធានីភ្នំពេញ ជាពិសេសផ្ល្វហោះហើររបស់យន្ដហោះ។ រដ្ឋបាលរាជធានីភ្នំពេញ ក៏បានសុំក្ដីអនុគ្រោះចំពោះការបញ្ចៀសការធ្វើដំណើរឆ្លងកាត់តាមទីតាំង និងកាលបរិច្ឆេទខាងលើផងដែរ។ ដោយក្នុងនៅពេលផុតរយៈពេលកំណត់ហាមឃាត់បណ្ដោះអាសន្ននេះ រដ្ឋបាលរាជធានីភ្នំពេញ នឹងបើកឲ្យធ្វើចរាចរជាធម្មតាវិញ៕