ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅរសៀលថ្ងៃព្រហស្បតិ៍ទី ២៧ ខែតុលា ឆ្នាំ២០២២នេះ បានអញ្ជើញធ្វើបាឋកថាដល់សិក្ខាកាមជាន់ខ្ពស់ នៃសាលាភូមិន្ទរដ្ឋបាលលើប្រធានបទ ភាពជាអ្នកដឹកនាំ និងនវានុវត្តន៍សេវាសាធារណៈរបស់ក្រសួង។ លោកទេសរដ្ឋមន្ត្រី បានលើកឡើងពីលទ្ធផលការងារជាច្រើន ដែលកើតចេញពីការប្រឹងប្រែងរបស់ថ្នាក់ដឹកនាំក្រសួង និងមន្ត្រីគ្រប់ជាន់ថ្នាក់ ដែលសម្រេចបានដោយឆន្ទៈមនសិការការងារខ្ពស់ រួមមាន៖ វិស័យហេដ្ឋារចនាសម្ព័ន្ធផ្លូវ ស្ពាន កំពង់ផែ វិស័យដឹកជញ្ជូនផ្លូវគោក ផ្លូវទឹក ផ្លូវដែក វិស័យភស្តុភារកម្ម និងជាពិសេសប្រព័ន្ធស្វ័យប្រវត្តិកម្ម ព្រមទាំងទំនើបកម្មប្រព័ន្ធបច្ចេកវិទ្យាផ្តល់សេវាសាធារណៈ ដែលកាន់តែនាំមកនូវភាពងាយស្រួលជូនដល់បងប្អូនប្រជាពលរដ្ឋ។ លោកបានចែករំលែកបទពិសោធន៍ល្អៗជាច្រើនពាក់ព័ន្ធភាពជាអ្នកដឹកនាំដល់សិក្ខាកាមនិងបានបកស្រាយចម្ងល់ពាក់ព័ន្ធវិស័យសាធារណការ និងដឹកជញ្ជូន ដែលសិក្ខាកាមបានធ្វើការចោទសួរផងដែរ។ មិនត្រឹមតែប៉ុណ្ណោះ សិក្ខាកាមបានធ្វើទស្សនកិច្ចនៅតាមទីតាំងសំខាន់ៗមួយចំនួន ក្នុងក្រសួងសាធារណការ និងដឹកជញ្ជូន ដើម្បីស្វែងយល់បន្ថែមអំពីរបៀបរបបនៃការធ្វើការងាររបស់មន្ត្រីក្នុងការផ្តល់សេវាសាធារណៈជូនប្រជាពលរដ្ឋ៕