សៀមរាប៖ ក្រុមការងារមន្ទីរ និងក្រសួងអភិវឌ្ឍន៍ជនបទដឹកនាំដោយឯកឧត្ដម ថោង ពោជ អនុរដ្ឋលេខាធិការ ក្រសួងអភិវឌ្ឍន៍ជនបទ បានចុះទៅពិនិត្យ និងសិក្សាផ្លូវជាច្រើនខ្សែ ដែលរងការខូចខាតដោយទឹកជំនន់នៅក្នុងខេត្តសៀមរាប ដើម្បីដាក់សំណើរទៅរដ្ឋាភិបាលក្នុងស្ដារឡើងផ្លូវឡើងវិញក្រោយពីទឹកស្រក។ លោក ទូច ម៉ាឡា ប្រធានមន្ទីរអភិវឌ្ឍន៍ជនបទ ខេត្ដសៀមរាប មានប្រសាសន៍នៅថ្ងៃទី២២ខែតុលាឆ្នាំ២០២២នេះថា ផ្លូវដែលរងការខូចខាតនោះ នៅស្រុកក្រឡាញ់ប្រវែង១៣.៤៤គម ត្រូវបានទឹកហូរដាច់តួផ្លូវចំនួន១២កន្លែង និងហូរច្រោះជើងទេរដោយកន្លែងប្រវែង៤ ២០០ម ដែលមិនអាចធ្វើចរាចរណ៍បាន ខណៈដែលខ្សែផ្លូវនេះ ស្ថិតនៅក្នុងគម្រោងថែទាំប្រចាំឆ្នាំ២០២២ របស់មន្ទីរអភិវឌ្ឍន៍ជនបទខេត្តសៀមរាប។ ផ្លូវនៅក្នុងស្រុកស្រីស្នំប្រវែង៨គម ត្រូវបានទឹកហូរដាច់តួផ្លូវចំនួន២កន្លែង ក្នុងប្រវែងផ្លូវសរុប២០០ម ត្រូវបានទឹកហូរច្រោះជើងទេរដោយកន្លែងប្រវែង៥០០ម ។ផ្លូវនៅក្នុងស្រុកអង្គរជុំប្រវែង៧គម ត្រូវបានទឹកហូរដាច់តួផ្លូវចំនួន០៣កន្លែង និងហូរច្រោះជើងទេរដោយកន្លែងប្រវែង៥០០ម ដែលមិនអាចធ្វើចរាចរណ៍បាន។ ទីតាំងដាច់តួផ្លូវទាំងនេះត្រូវបានអាជ្ញាធរភូមិឃុំ ជួយធ្វើស្ពានបណ្ដោះអាសន្ន ដោយយកឈើ និងក្តារ មកក្រាលតភ្ជាប់ចរាចរណ៍ សម្រាប់ថ្មើរជើង កង់ និង ម៉ូតូ។ផ្លូវនៅក្នុងស្រុកវ៉ារិន ប្រវែង៤.៨០គម ត្រូវបានទឹកហូរដាច់តួផ្លូវប្រវែង២០០ម និងទឹកហូរច្រោះជើងទេរប្រវែង៥០០ម ទឹកហូរច្រោះលូចំនួន១កន្លែង និងខូចខាតស្ពានឈើចំនួន១កន្លែង ខណៈដែលផ្លូវប្រវែង៤៥ម មិនអាចធ្វើចរាចរណ៍បាន។ដោយឡែកផ្លូវនៅស្រុកស្វាយលើប្រវែង១២គម ត្រូវបានទឹកហូរដាច់តួផ្លូវចំនួន៣កន្លែង និងផ្លូវទឹកហូរច្រោះជើងទេរប្រវែង៥១០ម ព្រមទាំងបានខូចខាតសំណង់បង្ហៀរមួយកន្លែង និងស្ពានឈើចំនួន១កន្លែងផងដែរ ។ លោកបន្ថែមថា ផ្លូវមួយចំនួន សំរាប់ភ្ជាប់ទៅទីតាំងស្ពាន ដែលរងការខូចខាតបន្ដិចបន្ដួច ត្រូវបានអាជ្ញាធរភូមិឃុំជួយជួសជុលឡើងវិញ ដើម្បីឱ្យប្រជាពលរដ្ឋធ្វើចរាចរណ៍បណ្ដោះអាសន្ន។លោកបន្ដថា អ្នកជំនាញបានចុះពិនិត្យសិក្សាវាយតម្លៃនៃផ្លូវខូចខាតនេះធ្វើឡើងចំនួន៥ស្រុក ហើយនឹងបន្ដចុះសិក្សាផ្លូវខូចនៅតាមស្រុកផ្សេងទៀតដើម្បីឱ្យអ្នកជំនាញដាក់គម្រោងស្នើរសុំថវិកាទៅរដ្ឋាភិបាលដើម្បីស្ដារនិងជួសជុលជុលឡើងវិញងាយស្រួលឱ្យប្រជាពលរដ្ឋធ្វើចរាចរណ៍ ព្រោះផ្លូវនៅជនបទនេះ មានសារៈសំខាន់ក្នុងការដឹកជញ្ជូនទំនិញកសិកម្ម។ បើតាមលោក ទូច ម៉ាឡា ប្រធានមន្ទីរអភិវឌ្ឋន៍ជនបទ ខេត្ដសៀមរាប បានបញ្ជាក់ថា ផ្លូវលិចទឹកហើយខុចខាតដោយទឹកជំនន់នេះ មានចំនួន៤៩ខ្សែ ស្ថិតនៅក្នុងស្រុកចំនួន៩នៃខេត្ដសៀមរាបនោះរូមមាន នៅក្នុងស្រុកក្រឡាញ់ ស្រុកជីក្រែង ស្រុកប្រាសាទបាគង ស្រុកពួក ស្រុកវ៉ារិន ស្រុកសូទ្រនិគម ស្រុកស្រីស្នំ ស្រុកស្វាយលើ និងស្រុកអង្គរជុំ ដែលមានប្រវែងសរុប ៥៥៧.៤៤គម ដែលរងការខូចខាតដោយច្រោះជើងទេរ ដាច់តួផ្លូវ ៩៣.៨៧៥ គម ៕