នាពេលខាងមុខផ្លូវជាតិថ្មីចំនួន ២ ខ្សែ ដែលតភ្ជាប់ខេត្ដសំខាន់ៗ នឹងចូលខ្លួនមកសម្រួលការធ្វើដំណើររបស់ប្រជាពលរដ្ឋកាន់តែងាយស្រួល ខណៈកន្លងមកនេះប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានជំរុញឲ្យក្រសួងសាធារណការ និងដឹកជញ្ជូនធ្វើការសាងសង់។តាមការបញ្ជាក់ពីឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងកិច្ចប្រជុំពិនិត្យវឌ្ឍនភាពលើការរៀបចំផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្ម និងផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយកម្ពុជាឆ្នាំ២០២២-២០៣០ កាលពីខែ កក្កដា ឆ្នាំ២០២២ បានឲ្យដឹងថា ការជំរុញ និងណែនាំដ៏ខ្ពង់ខ្ពស់ពីសំណាក់សម្ដេចតេជោនាយករដ្ឋមន្ត្រីក្នុងការកសាងផ្លូវ ២ ខ្សែខាងលើគឺផ្លូវពីកំពង់ធំទៅកំពង់ឆ្នាំង និងពីបាត់ដំបងទៅសៀមរាប បន្ទាយមានជ័យ ដែលជាប្រព័ន្ធភស្តុភារកម្មប្រកបដោយប្រសិទ្ធភាព។ គួរបញ្ជាក់ផងដែរថា គម្រោងសាងសង់ផ្លូវពីកំពង់ធំ ទៅកំពង់ឆ្នាំង គឺតភ្ជាប់ពីស្រុកកំពង់លែង ខេត្តកំពង់ឆ្នាំងទៅដល់ក្រុងស្ទឹងសែនខេត្តកំពង់ធំមានប្រវែងសរុប ៥៧,៣ គីឡូម៉ែត្រ។ ដោយឡែក ផ្លូវបាត់ដំបង ទៅ សៀមរាបវិញ មានប្រវែង ៧២គីឡូម៉ែត្រ ដោយឆ្លងកាត់ខេត្តចំនួន ៣ រួមមាន ខេត្តបាត់ដំបង ខេត្តបន្ទាយមានជ័យ និងខេត្តសៀមរាប។ តាមការលើកឡើង ផ្លូវនេះអាចកាត់បន្ថយពេលវេលាធ្វើដំណើរ ដោយចំណេញចម្ងាយរហូតដល់ជិត ១០០ គីឡូម៉ែត្រឯណោះ។ ចំពោះទីតាំងនៃការសាងសង់វិញគឺនឹងចាប់ផ្ដើមពីផ្លូវជាតិលេខ ៥ ឆ្ពោះទៅចំណុចបញ្ចប់នៃផ្លូវជាតិលេខ ៦៕