[Khmer News] - ភាពអសកម្មរបស់លោក សាំ ពិសិដ្ឋ ប្រធានមន្ទីរសាធារណការរាជធានីភ្នំពេញ កំពុងប្រឈមនឹងការរិះគន់យ៉ាងខ្លាំង
2017-08-04
ទៅកាន់ទំព័រចុះផ្សាយក្នុង Khmer News
ថ្មីៗនេះមានការអំពាវនាវឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ពិនិត្យមើលភាពអសកម្មនិងអំពើពុករលួយរបស់លោក សាំ ពិសិដ្ឋ ប្រធានមន្ទីរសាធារណការរាជធានីភ្នំពេញ ជាបន្ទាន់។ ដោយហេតុថាប៉ុន្មានឆ្នាំចុងក្រោយនេះ ផ្លូវមួយចំនួនក្នុងរាជធានីភ្នំពេញធ្វើមិនបាន១ឆ្នាំផងក៏ត្រូវខូចអស់ទៅវិញ ដោយសារតែទាំងនោះគ្មានគុណភាពឬធ្វើឲ្យតែរួចពីដៃ។
មន្ត្រីរាជការមួយចំនួននៅក្នុងមន្ទីរសាធារណការ និងដឹកជញ្ជូនរាជធានីភ្នំពេញ បានបង្ហើបឲ្យដឹងថាក្នុងនាមជាប្រធានមន្ទីរ លោក សាំ ពិសិដ្ឋ មិនយកចិត្តទុកដាក់បំពេញតួនាទីរបស់ខ្លួននោះទេ ហើយបណ្ដោយឲ្យមន្ត្រីក្រោមឱវាទមួយចំនួនធ្វើអ្វីៗស្រេចតែអំពើចិត្ត។ ជាពិសេសការធ្វើផ្លូវជាច្រើនខ្សែក្នុងរាជធានីភ្នំពេញ គ្មានគុណភាពធ្វើហើយឆាប់ខូចទៅវិញត្រូវគេសង្ស័យថា មកពីមានអំពើពុករលួយកេងប្រវ័ញ្ចថវិកាទើបធ្វើមិនត្រឹមត្រូវតាមបទដ្ឋានបច្ចេកទេស។ ហេតុនេះលោក ស៊ុន ចាន់ថុល ដែលជារដ្ឋមន្ត្រីក្រសួងសាធារណការ និងដឹកជញ្ជូន មិនគួរបណ្ដែតបណ្ដោយលោក សាំ ពិសិដ្ឋ និងមន្ត្រីក្រោមឱវាទធើ្វអ្វីៗស្រេចតែអំពើចិត្តនោះទេ។
មានប្រភពខ្លះបានឲ្យដឹងថា សូម្បីតែនៅកន្លែងធ្វើស្លាកលេខរថយន្ត ស្លាកលេខម៉ូតូ របស់មន្ទីរសាធារណការរាជធានីភ្នំពេញ ក៏មានភាពរញ៉េរញ៉ៃនិងពោរពេញទៅដោយអំពើពុករលួយផងដែរ។ ជាងនេះទៅទៀតការប្រឡងយកប័ណ្ណបើកបររថយន្តក៏មានសេចក្ដីរាយការណ៍ពីរឿងពុករលួយយ៉ាងពេញបន្ទុក មិនដឹងថាលោក សាំ ពិសិដ្ឋ មានជាប់ពាក់ព័ន្ធទៅនឹងអំពើពុករលួយទាំងនោះឬក៏អត់ឡើយ។ ដូច្នេះអង្គភាពប្រឆាំងអំពើពុករលួយដែលមានលោក ឱម យ៉ិនទៀង ជាប្រធាន គួរចាត់វិធានការស៊ើបអង្កេតជុំវិញអំពើពុករលួយដែលកំពុងកើតមាននៅមន្ទីរសាធារណការរាជធានីភ្នំពេញជាបន្ទាន់ផងដែរ។
ប្រជាពលរដ្ឋក្នុងរាជធានីភ្នំពេញ បានកត់សម្គាល់ថាក្នុងមួយឆ្នាំៗរដ្ឋចំណាយថវិកាមិនតិចឡើយដើម្បីធ្វើផ្លូវនិងជួសជុលផ្លូវក្នុងរាជធានីភ្នំពេញ ប៉ុន្តែផ្លូវខ្លះធ្វើមិនទាន់ហើយផងក៏ខូចទៅវិញជាបណ្ដើរៗ។ ជាក់ស្ដែងផ្លូវមួយចំនួនក្នុងខណ្ឌចំការមន និងខណ្ឌទួលគោក គ្មានរថយន្តធុនធំដឹកជញ្ជូនទំនិញលើសទម្ងន់ឆ្លងកាត់នោះទេ ប៉ុន្តែផ្លូវទាំងនោះខូចទៅវិញយ៉ាងឆាប់ដោយសារតែគ្មានគុណភាព។ ហេតុនេះហើយទើបធ្វើឲ្យមានការរិះគន់ថា លោក សាំ ពិសិដ្ឋ គិតតែពីរឿងប្រព្រឹត្តអំពើពុករលួយប្រមូលលុយដាក់ហោប៉ៅ ហើយមិនចុះពិនិត្យមើលគុណភាពផ្លូវពេលកំពុងស្ថាបនាឬកំពុងជួសជុលឡើងវិញនោះទេ៕
