កិច្ចប្រជុំចាប់ផ្តើមនៃបេសកកម្មរៀបចំគម្រោងជំរុញលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក (World Bank) ភ្នំពេញ៖ ថ្ងៃព្រហស្បតិ៍ ០៥កើត ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែកញ្ញា ឆ្នាំ២០២២ ឯកឧត្តមបណ្ឌិត រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំអង្គភាពគ្រប់គ្រងសមាសភាគគម្រោង(Component Management Unit) របស់ក្រសួងអញ្ជើញចូលរួមកិច្ចប្រជុំចាប់ផ្តើមនៃបេសកកម្មរៀបចំគម្រោងជំរុញលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក (Proposed Cambodia Water Supply and Sanitation Acceleration Project) ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីភាគីគ្រប់គ្រង សមាសភាគគម្រោងរបស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងភាគីធនាគារ ពិភពលោក។ កិច្ចប្រជុំនេះបានប្រព្រឹត្តទៅចាប់ពីថ្ងៃទី២៧ ខែកញ្ញា ដល់ថ្ងៃទី០៧ ខែតុលា ឆ្នាំ២០២២ ដោយផ្ដោតជាសំខាន់លើរបៀបវារៈមួយចំនួនរួមមាន៖ ១) ទំហំការងារបឋម និងទីតាំងគម្រោងទឹកស្អាត និងអនាម័យ ២) កាលបរិច្ឆេទកំណត់ និងការរៀបចំការអនុវត្តគម្រោង និង ៣) ការពិភាក្សាកម្រិតបច្ចេកទេសជាមួយ ក្រសួងសាធារណការ និងដឹកជញ្ជូន ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួង សេដ្ឋកិច្ច និងហិរញ្ញវត្ថុ ដៃគូអភិវឌ្ឍន៍នានា និងអ្នកផ្តល់សេវាទឹកស្អាតទាំងសាធារណៈ និងឯកជន។ ថ្លែងទៅកាន់អង្គប្រជុំនាឱកាសនោះ ឯកឧត្ដមរដ្ឋលេខាធិការ បានផ្ដាំផ្ញើឱ្យភាគីទាំងអស់ខិតខំប្រឹងប្រែង បំពេញការងារឱ្យអស់ពីសមត្ថភាព ចូលរួមសហការសម្របសម្រួលជាមួយក្រុមការងារបេសកកម្មរបស់ ធនាគារពិភពលោក សំដៅធ្វើយ៉ាងណាសម្រេចបានលទ្ធផលប្រកបដោយផ្លែផ្កាក្នុងបេសកកម្មរៀបចំ គម្រោងនេះ ជាពិសេសរិះរកគ្រប់មធ្យោបាយ និងយុទ្ធសាស្ត្រ ដើម្បីជំរុញការរៀបចំគម្រោងប្រព្រឹត្តទៅតាម ផែនការដែលបានគ្រោងទុក។ គួរកត់សម្គាល់ថា៖ គម្រោងនេះផ្តោតជាសំខាន់លើការអភិវឌ្ឍវិស័យទឹកស្អាត និងអនាម័យ ដើម្បីធានាសុខុមាលភាពប្រជាពលរដ្ឋ និងលើកកម្ពស់ជីវភាពរស់នៅរបស់ពួកគាត់ឱ្យមានការរីកចម្រើនថែមមួយ កម្រិតទៀត តាមរយៈការសាងសង់បណ្តាញទឹកស្អាត និងទឹកកខ្វក់ នៅតាមបណ្តារាជធានី-ខេត្ត សំខាន់ៗ និងការអភិវឌ្ឍនស្ថាប័ន និងសមត្ថភាពប្រតិបត្តិករទាំងវិស័យទឹកស្អាត និងអនាម័យផងដែរ៕