កាលពី​ចុង​សប្តាហ៍​នេះ លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាន​អមដំណើរលោក​បណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ចុះពិនិត្យស្ថានភាពកំណាត់ផ្លូវជាតិលេខ៣ កំពត-វាលរេញ។ស្ថានភាពទូទៅនៃកំណាត់ផ្លូវជាតិលេខ៣ កំពត-វាលរេញ ដែលមានប្រវែង ៥៤ គីឡូម៉ែត្រ ក្នុងនោះ ៣៤ គីឡូម៉ែត្រមានសភាពល្អប្រសើរ និង ២០គីឡូម៉ែត្រទៀតតែងតែខូចជាប្រចាំ។ឆ្លេីយតបចំពោះកំណាត់ផ្លូវ ២០ គីឡូម៉ែត្រដែលតែងតែខូចជាប្រចាំ ដេីម្បីធានាថាផ្លូវនេះនឹងមានភាពគង់វង្សយូរអង្វែង បញ្ចៀសនូវការជួសជុលដដែលៗម្តងហេីយម្តងទៀត លោក​ទេស​រដ្ឋមន្រ្តី​បាន​គូស​បង្ហាញ​បច្ចេកទេសក្នុងការ​​ជួសជុល​​ត្រូវ​បែងចែកជាពីរកំណាត់ក្នុងនោះ៖ កំណាត់ ៥ គីឡូម៉ែត្រ មានដីស្អុយជម្រៅរហូតដល់ ១៨ ម៉ែត្រនៅផ្នែកខាងក្រោម ចំពោះការងារសាង់សង់គឺតម្រូវឱ្យវាយសសរគ្រឹះឱ្យដល់ជម្រៅ ១៨ ម៉ែត្រដើម្បីធ្វើឱ្យកំណាត់នេះរឹងមាំ។ ដោយឡែកចំពោះកំណាត់ ១៥គីឡូម៉ែត្រទៀត អាចប្រើប្រាស់វិធីសាស្រ្ត ២ ផ្សេងទៀតទៅតាមកម្រិតជម្រៅដីស្អុយរួមមានវិធីទម្លាក់សេរីទម្ងន់ ២០០តោន និងវិធីកាយពង្រឹងគ្រឹះរួចចាក់បេតុង ទើបផ្លូវនេះអាចមានភាពរឹងមាំជាប់បានយូរ។លោក​បណ្ឌិតសភាចារ្យឧបនាយករដ្ឋមន្ត្រី បានផ្ដល់អនុសាសន៍ឱ្យក្រុមហ៊ុនទទួលបន្ទុកជួសជុលស្ថាបនាផ្លូវជាតិលេខ ៣ កំណាត់ ២០ គីឡូម៉ែត្រ ធ្វើការ​ជួសជុលបណ្ដោះអាសន្នផ្លូវដែលខូច មុនពេលទទួលបានថវិកាគម្រោងសាងសង់ធ្វើកំណាត់ផ្លូវនេះ ដើម្បីសម្រួលដល់ការធ្វើចរាចរណ៍ និងការដឹកជញ្ជូនរបស់បងប្អូនប្រជាពលរដ្ឋ។ លោក​បណ្ឌិតសភាចារ្យ បានឯកភាពលើនីតិវិធីសាងសង់ចំនួនបីសំខាន់ៗ ដែលបានលើកបង្ហាញសម្រាប់ការជួសជុលផ្លូវប្រវែង ២០ គីឡូម៉ែត្រនេះឱ្យបានត្រឹមត្រូវតាមលក្ខណៈបច្ចេកទេស និងមានភាពរឹងមាំផងដែរ៕