សិក្ខាសាលាអំពីការពិភាក្សាការងារជាមួយប្រតិភូ P4I (Partners For Infrastructure) & Austroads នៃប្រទេសអូស្រ្តាលី ពាក់ព័ន្ធនឹងជំនួយបច្ចេកទេសលើការពិនិត្យកែសម្រួល និងធ្វើបច្ចុប្បន្នភាពសៀវភៅបទដ្ឋានបច្ចេកទេសរបស់ក្រសួងសាធារណការ និងដឹកជញ្ជូន រាជធានីភ្នំពេញ៖ ថ្ងៃចន្ទ ៨កើត ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៣ ខែតុលា ឆ្នាំ២០២២ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញចូលរួមបើកសិក្ខាសាលាស្ដីពីជំនួយផ្នែកបច្ចេកទេស ដោយមានការចូលរួមពី ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ ថ្នាក់ដឹកនាំនៃអគ្គនាយកដ្ឋានសាធារណការ និងអគ្គនាយកដ្ឋានបច្ចេកទេស និងមន្រ្តីបច្ចេកទេសពាក់ព័ន្ធ ជួបពិភាក្សាការងារជាមួយនឹងប្រតិភូ P4I & Austroads នៃប្រទេសអូស្រ្ដាលី ព្រមទាំងតំណាងនៃស្ថានទូតអូស្រ្ដាលី ប្រចាំកម្ពុជា ដើម្បីពិនិត្យលើជំនួយផ្នែកបច្ចេកទេសសម្រាប់ការងារកែសម្រួល និងធ្វើបច្ចុប្បន្នភាពសៀវភៅបទដ្ឋានបច្ចេកទេសរបស់ក្រសួង។ សិក្ខាសាលានេះ មានដំណើរការប្រព្រឹត្តទៅរយៈពេល ០៣ថ្ងៃ ថ្ងៃទី០៣-០៥ ខែតុលា ឆ្នាំ២០២២ រៀបចំឡើងក្នុងគោលបំណងពិនិត្យ និងពិភាក្សាលើជំនួយផ្នែកបច្ចេកទេសក្នុងវិស័យសាធារណការ និងដឹកជញ្ជូន ក៏ដូចជាចែករំលែកចំណេះដឹង បទពិសោធន៍ទៅវិញទៅមក សម្រាប់ពិនិត្យកែសម្រួល និងធ្វើបច្ចុប្បន្នភាពសៀវភៅបទដ្ឋានបច្ចេកទេសរបស់ក្រសួងសាធារណការ និងដឹកជញ្ជូន និងជំរុញឱ្យមានទំនាក់ទំនងកិច្ចសហប្រតិបត្តិការរវាងភាគីទាំងពីរបន្តទៀត។ សិក្ខាសាលា បានពិនិត្យពិភាក្សាលើប្រធានបទចំនួនប្រាំ រួមមាន៖ ១). គោលនយោបាយ នៃការអភិវឌ្ឍវិស័យផ្លូវថ្នល់ (Policy of Road Development) ២). បទដ្ឋានបច្ចេកទេសស្ថាបនាផ្លូវថ្នល់ (Pavement Design Guideline) ៣). បច្ចេកទេសនៃការធ្វើតេស្ដសម្ភារ (Testing of Materials) ៤). ការរួមបញ្ចូល ផ្នែកសមភាពយេនឌ័រ ពិការភាព និងសង្គមស៊ីវិល ក្នុងវិស័យអភិវឌ្ឍន៍ផ្លូវថ្នល់ (Gender Equality, Disability and Social Inclusion in Road Development) ៥). បទដ្ឋាននៃការផ្គត់ផ្គង់សម្ភារនិងសំណង់ការដ្ឋាន (Material supply and Construction Specifications)។ ក្រោយពីកម្មវិធីសិក្ខាសាលា ប្រតិភូ P4I & Austroads នៃប្រទេសអូស្រ្ដាលី ក៏បានចុះពិនិត្យហេដ្ឋារចនាសម្ព័ន្ធផ្លូវជាតិ-ផ្លូវខេត្តមួយចំនួន ជាមួយថ្នាក់ដឹកនាំ និងមន្រ្តីបច្ចេកទេសនៃអគ្គនាយកដ្ឋានទាំងពីរ ដើម្បីស្វែងយល់ពីស្ថានភាពទូទៅជាក់ស្តែង និងលើកជាដំណោះស្រាយផ្នែកបច្ចេកទេស ដែលជាជំនួយដល់ការពិនិត្យកែសម្រួលផ្នែកបទដ្ឋានបច្ចេកទេសសម្រាប់ឆ្លើយតបក្នុងវិស័យអភិវឌ្ឍន៍ផ្លូវថ្នល់៕