នៅថ្ងៃទី២៧ ខែកញ្ញា ឆ្នាំ២០២២ នេះ ក្រសួងសាធារណការ និងដឹកជញ្ជូន បានចេញសេចក្ដីជូនដំណឹងស្ដីពីការអនុញ្ញាតឱ្យប្រើប្រាស់សាកល្បងផ្លូវលឿនលឿនភ្នំពេញ-ព្រះសីហនុ ដោយឥតគិតថ្លៃរយៈពេល០១ខែ គិតចាប់ពីថ្ងៃទី០១ ដល់ថ្ងៃទី៣១ ខែតុលា ឆ្នាំ២០២២ នេះ។ជាមួយគ្នានេះក្រសួងក៏បានបញ្ជាក់ជូនពីលក្ខខណ្ឌមួយចំនួន អំពីយានយន្តដែលអនុញ្ញាតឱ្យប្រើប្រាស់លើផ្លូវល្បឿនលឿន រួមមាន៖ រថយន្តគ្រប់ប្រភេទដែលមានល្បឿនលឿនតិបរមាលើសពី ៧០គ.ម/ម៉ោង (កំណត់ពីរោងចក្រ) និងទោចក្រយានយន្តដែលមានទំហំស៊ីឡាំងចាប់ពី ៥០០cc ឡើងទៅ។ នៅក្នុងសេចក្ដីជូនដំណឹងនេះ ក្រសួងសាធារណការ និងដឹងជញ្ជូនក៏បានអំពាវនាវ និងក្រើនរំលឹកដល់សាធារណជន សូមមេត្តាចូលរួមគោរពបទបញ្ជា និងសេចក្ដីណែនាំនានា ឱ្យបានខ្ជាប់ខ្ជួន ដើម្បីថែរក្សាសណ្ដាប់ធ្នាប់ សុវត្ថិភាព និងបង្ការគ្រោះថ្នាក់ជាយថាហេតុចំពោះការប្រើប្រាស់ផ្លូវល្បឿនលឿននេះ។ ក្រសួង និងអាជ្ញាធរមានសមត្ថកិច្ច និងប្រតិបត្តិករផ្លូវល្បឿនលឿនមានសិទ្ធិបដិសេធមិនអនុញ្ញាតឱ្យបុគ្គលណាមួយប្រើប្រាស់ផ្លូវល្បឿនលឿន និងចាត់វិធានការតាមផ្លូវច្បាប់ក្នុងករណីមិនអនុវត្តតាមការណែនាំ។