លោក​ ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន បានបង្ហោះនៅលើទំព័រហ្វេសប៊ុកផ្លូវការរបស់លោក ដោយបានបង្ហាញការហួសចិត្តនឹងគិតថាប្រជាពលរដ្ឋអាចមានការភាន់ច្រឡំនិងរូបភាព Cover ចំណងជើង និងខ្លឹមសារវីដេអូ ដែលបានផ្សព្វផ្សាយ របស់លោកលោកអាចារ្យអេ កាលពីថ្ងៃទី២៤ ខែកញ្ញា ឆ្នាំ២០២២ ដែលថាអាយុជីវិតរបស់ប្រជាពលរដ្ឋផ្ញើលើផ្លូវល្បឿនលឿនរបស់លោកស៊ុន ចាន់ថុល ហើយ។ ក្នុងនាមអ្នកនាំពាក្យក្រសួងសាធារណការ និងដឹកជញ្ជូន លោកបានលើកឡើងថាក្រសួងធ្លាប់បានធ្វើការណែនាំរួចមកហើយថា ល្បឿន១២០ គីឡូម៉ែត្រ/ម៉ោងគឺជាល្បឿនអតិបរមា ឬហៅថាល្បឿនលឿនបំផុត សម្រាប់រថយន្តធុនស្រាលតែប៉ុណ្ណោះ ពោលគឺមិនបានកំណត់ថាត្រូវតែបើកបរមិនឱ្យក្រោម ១២០គីឡូម៉ែត្រ/ម៉ោង នោះឡើយ។ ជាមួយគ្នានេះលោកហ៊ាង សុទ្ធាយុត្តិ បានបកស្រាយពីការព្រួយបារម្ភរបស់លោកអាចារ្យអេ អំពីផ្លូវកោង និងច្រកចូលចំហៀងទៅកាន់ផ្លូវល្បឿន អ្នកនាំពាក្យបញ្ជាក់ថាក្នុងស្ថានភាពផ្លូវកោង អ្នកបើកបរត្រូវបានកំណត់ឱ្យបើកបរត្រឹមតែ៤០ គីឡូម៉ែត្រ/ម៉ោងតែប៉ុណ្ណោះ រួចទើបត្រូវបង្កើនល្បឿនដល់ ៦០គីឡូម៉ែត្រ/ម៉ោង។ ពេលចូលដល់ផ្លូវល្បឿនលឿន តាមផ្លាកសញ្ញាកំណត់ល្បឿន មិនមែនតម្រូវឱ្យបើកយ៉ាងតិច ១២០ គីឡូម៉ែត្រ/ម៉ោង គ្រប់ស្ថានភាពនោះឡើយ។ លោកថាក្រសួងបានក៏បានដាក់នូវគំនូសរំញ័រ Rumble Stripes ដើម្បីដាស់តឿនដល់អ្នកបើកបរផងដែរ ដូចនេះកន្លែងដែលចាំបាច់គឺត្រូវបន្ថយល្បឿន។ យ៉ាងណាមិញអ្នកនាំពាក្យក្រសួងសាធារណការ បានគូសបញ្ជាក់ថាបើទោះជាល្បឿនយឺត និងលឿនបំផុតត្រូវបានកំណត់ ប៉ុន្តែនៅតាមដងផ្លូវក៏នៅតែមានដាក់បំពាក់នូវផ្លាកសញ្ញាបញ្ជាក់ល្បឿនកំណត់ទៅតាមទីតាំង និងស្ថានភាពនៃផ្លូវជាក់ស្តែង។ ជាការកត់សម្គាល់ បើយោងតាមការគូសបញ្ជាក់របស់លោកហ៊ាង សុទ្ធាយុត្តិ បានឱ្យដឹងថាល្បឿនសម្រាប់ការបើកបរលើផ្លូវល្បឿនលឿន គឺត្រូវបានកំណត់ទៅតាមប្រភេទរថយន្ត ដូចជារថយន្តគ្រួស្រារ/ធុនស្រាល អនុញ្ញាតឱ្យបើកយឺតបំផុត ៦០គីឡូម៉ែត្រក្នុងមួយម៉ោង និងលឿនបំផុត ១២០គីឡូម៉ែត្រក្នុងមួយម៉ោង។ ចំណែករថយន្តធុនធ្ងន់មិនមានសណ្តោងសឺម៉ីរ៉ឺម៉ក ឬម៉ូតូ ៥០០cc/២៧Kw ឡើងទៅ អនុញ្ញាតឱ្យបើកយឺតបំផុត ៦០គីឡូម៉ែត្រក្នុងមួយម៉ោង និងលឿនបំផុត ១០០គីឡូម៉ែត្រក្នុងមួយម៉ោង។ ដោយឡែកចំពោះរថយន្តសណ្តោងសឺម៉ីរ៉ឺម៉ក ឬសណ្តោងយានដំណើរកម្សាន្ត អនុញ្ញាតឱ្យបើកយឺតបំផុត ៦០គីឡូម៉ែត្រក្នុងមួយម៉ោង និងលឿនបំផុត ៨០គីឡូម៉ែត្រក្នុងមួយម៉ោង។ សូមជម្រាបថា ក្នុងករណីមានផ្លាកសញ្ញាកំណត់ល្បឿនអតិបរមា អ្នកបើកបរគ្រប់រូបត្រូវអនុវត្តតាមផ្លាកសញ្ញាជាកំហិតជំនួសឱ្យគោលការណ៍ខាងលើនេះ៕