នៅលើផេកផ្លូវការនាយប់ថ្ងៃទី០៤ ខែកញ្ញា ឆ្នាំ២០២២ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានសម្ដែងនូវការអបអរសាទរ ចំពោះកីឡាការិនី កាំង មុយនីន ដែលទទួលបានជ័យលាភី ផ្នែកកីឡាហែលទឹក ក្នុងការប្រកួត Finswimming’s World Cup Round Swimming Pool 2022 នៅព្រះរាជាណាចក្រថៃ។ សូមបញ្ជាក់ថា កម្ពុជាទទួលបានមេដាយសរុបចំនួន ០៤គ្រឿង ពីការប្រកួត Finswimming’s World Cup Round Swimming Pool 2022 ដោយកីឡាការិនី កាំង មុយ នីន ទទួលបានជ័យលាភី មេដាយមាស ០៣គ្រឿង លើប្រភេទវិញ្ញាសា Women 200m Bifins, Women 100m Bifins, Women 400m Bifins និងមេដាយសំរឹទ្ធ ០១គ្រឿង លើប្រភេទវិញ្ញាសា Women 50m Bifins។ លោក ហែមថុន ពន្លឺ គ្រូបង្វឹកផ្នែកហែលពាក់ជើងទា នៃក្រុមជម្រើសជាតិហែលទឹកកម្ពុជា បានឱ្យដឹងពីប្រទេសថៃមកថា ក្រុមជម្រើសជាតិកម្ពុជាដែលចូលរួមប្រកួតក្នុងព្រឹត្តិការណ៍នេះ សរុប ០៦នាក់ ក្នុងនោះ កីឡាករ៤នាក់ និងកីឡាការិនី២នាក់ ដោយដឹកនាំដោយគ្រូបង្វឹកម្នាក់ គឺរូបលោក និងប្រតិភូដឹកនាំ លោក ហែម គីរី។ ព្រឹត្តិការណ៍ Finswimming’s World Cup Round Swimming Pool 2022 ត្រូវបានរៀបចំដោយសមាគមកីឡាក្រោមទឹកប្រទេសថៃ (Association of Thailand Underwater Sports) ចាប់ពីថ្ងៃទី០២ ដល់ថ្ងៃទី០៤ ខែកញ្ញា ឆ្នាំ២០២២ នៅខេត្តភូកេត ប្រទេសថៃ ដោយមាន កីឡាករ កីឡាការិនី សរុបចំនួន ២៣០នាក់ មកពី១៦ប្រទេស ចូលរួមប្រកួតប្រជែង ៕