កម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្តរការណ៍ ដែលរៀបចំដោយក្រសួងមហាផ្ទៃ និងក្រសួងសាធារណការនិងដឹកជញ្ជូន បានចាប់ផ្តើមដាក់ឱ្យដំណើរការអនុវត្តសាកល្បងហើយ កាលពីថ្ងៃទី១ ខែកញ្ញា ឆ្នាំ២០២២ ហើយនឹងដំណើរការអនុវត្តពេញលេញនៅថ្ងៃទី០១ ខែមករា ឆ្នាំ២០២៣។ បើតាមលោកហ៊ាង សុទ្ធាយុត្តិ អ្នកនាំពាក្យក្រសួងសាធារណការនិងដឹកជញ្ជូនបានបញ្ជាក់ប្រាប់វិទ្យុវាយោតាមទូរស័ព្ទនៅថ្ងៃទី២ ខែកញ្ញាថា ការដកពិន្ទុលើបណ្ណបើកបរនេះ គឺដកពិន្ទុទាំងឡាននិងម៉ូតូ ហើយអ្នកដែលមិនយកបណ្ណបើកបរតាមខ្លួន ក៏គេអាចកត់ត្រាដោយប្រើអត្តសញ្ញាណបណ្ណ ឬលិខិតឆ្លងដែន ដែលភ្ជាប់ជាមួយបណ្ណបើកបរនោះបានផងដែរ។អ្នកនាំពាក្យក្រសួងសាធារណការនិងដឹកជញ្ជូនដដែលបានបញ្ជាក់បន្ថែមថា ការសាកល្បងគឺធ្វើឡើងនៅតាមគោលដៅមួយចំនួនតែប៉ុណ្ណោះមិនទាំងអស់ទេ តែការផាកពិន័យនិងដកពិន្ទុបណ្ណបើកបរគឺជាការអនុវត្តពិតប្រាកដមិនសាកល្បងទេ។ទន្ទឹមនឹងការបញ្ជាក់ខាងលើនេះដែរ លោកហ៊ាង សុទ្ធាយុត្តិ បានឱ្យដឹងបន្ថែមទៀតថា ការដកពិន្ទុលើបណ្ណបើកបរ គឺធ្វើទៅតាមកម្រិតស្រាលឬធ្ងន់ ឬបង្កគ្រោះថ្នាក់ខ្លាំងទេ បើបង្កគ្រោះថ្នាក់និងមានហានិភ័យខ្ពស់គឺដកច្រើន ដែលពិន្ទុសរុបមានចំនួន១២ ហើយបើអស់ស្មើនឹងដកហូតបណ្ណបើកបរ និងត្រូវទៅរៀននិងប្រឡងយកបណ្ណបើកបរមកវិញ តែបើពិន្ទុត្រូវបានដកខ្លះគាត់អាចទៅរៀនដើម្បីបំពេញពិន្ទុមកវិញ។ លោកបន្តថា ការរៀននិងប្រឡងនេះ ក៏មានការកំណត់រយៈពេលផងដែរ។ បើយោងតាមប្រកាសអន្តរក្រសួងស្តីពីនីតិវិធីនៃការដក និងបំពេញពិន្ទុឡើងវិញសម្រាប់បណ្ណបើកបរ ត្រង់ប្រការ៥ បានចែងថា នីតិវិធីនៃការបន្ថែម និងការបំពេញពិន្ទុឡើងវិញសម្រាប់បណ្ណបើកបរ ក្នុងករណីដែលពិន្ទុត្រូវកាត់បន្ថយមួយចំនួន ហើយអ្នកបើកបរចង់បង្កើនពិន្ទុឡើងវិញ ត្រូវរៀនបំប៉នទ្រឹស្តីរយៈពេល ២ថ្ងៃ ដើម្បីប្រឡងយកពិន្ទុបន្ថែមដែលមានចំនួនមិនលើសពី៤ពិន្ទុ។ ប៉ុន្តែការបន្ថែមពិន្ទុមិនអនុញ្ញាតឱ្យមានចំនួនលើសពី១១ពិន្ទុឡើយ។ ប្រការដដែលបានចែងបន្ថែមថា អ្នកបើកបរអាចរៀនបំប៉នផ្នែកទ្រឹស្តី និងប្រឡងយកពិន្ទុបន្ថែមបានច្រើនដង ប៉ុន្តែការរៀននិងប្រឡងនេះ ត្រូវប្រព្រឹត្តទៅយ៉ាងតិចក្នុងរយៈពេល ៦ខែម្តងៗ។ ក្នុងករណីដែលពិន្ទុត្រូវបានកាត់បន្ថយមួយចំនួនហើយ ប៉ុន្តែក្នុងរយៈពេល ៣ឆ្នាំ បន្ទាប់ពីការកាត់បន្ថយពិន្ទុចុងក្រោយ អ្នកបើកបរពុំមានបទល្មើសចរាចរណ៍អ្វីមួយបន្ថែមទៀត ដែលនាំឱ្យមានការកាត់បន្ថយពិន្ទុនោះទេ អ្នកបើកបរត្រូវទទួលបានការបំពេញពិន្ទុឡើងវិញដោយស្វ័យប្រវត្តិដែលមានចំនួន ១២ពិន្ទុ។ ចំណែកប្រការ៦ បានចែងថា ក្នុងករណីដែលអស់ពិន្ទុ បណ្ណបើកបរត្រូវទុកជាមោឃៈ។ បើអ្នកបើកបរចង់បានបណ្ណបើកបរថ្មីត្រូវរៀនបំប៉ន និងប្រឡងយកបណ្ណបើកបរឡើងវិញ ក្នុងរយៈពេលយ៉ាងតិច ៦ខែ ចាប់ពីថ្ងៃដែលបណ្ណបើកបរត្រូវទុកជាមោឃៈ លើកលែងតែអ្នកបើកបរបង្កឱ្យមានរបួសដល់អ្នកដទៃដោយអចេតនា ហើយបណ្តាលឱ្យអ្នករងគ្រោះអសមត្ថភាពធ្វើការងារក្នុងរយៈពេលស្មើឬលើស៨ថ្ងៃ គិតពីថ្ងៃកើតហេតុ ឬស្លាប់ អ្នកបើកបរអាចរៀនបំប៉ន និងប្រឡងយកបណ្ណបើកបរជាថ្មីឡើងវិញក្នុងរយៈពេលយ៉ាងតិច ៥ឆ្នាំ គិតចាប់ពីថ្ងៃដែលបណ្ណបើកបរត្រូវទុកជាមោឃៈ។ ចំពោះរឿងនេះដែរ អ្នកនាំពាក្យក្រសួងសាធារណការនិងដឹកជញ្ជូនខាងលើ ក៏បានស្នើពលរដ្ឋចូលរួមសហការ បើគេអនុវត្ត ដោយលោកបញ្ជាក់ថា កម្មវិធីដកពិន្ទុនេះគឺរៀបចំឡើងដើម្បីជួយសម្រួលដល់ប្រជាពលរដ្ឋនិងកាត់បន្ថយគ្រោះថ្នាក់ចរាចរណ៍ ចំណែកនគរបាលក៏មានឥរិយាបថទន់ភ្លន់ ហើយការដាក់យន្តការបច្ចេកវិទ្យាថ្មីនេះគឺផ្តល់ភាពលឿនរហ័សនិងច្បាស់លាស់ជូនពលរដ្ឋ។ សូមជម្រាបជូនថា នីតិវិធីនៃការកាត់ពិន្ទុបណ្ណបើកបរនឹងត្រូវធ្វើឡើង តាមរយៈកម្មវិធីនៅលើទូរស័ព្ទដៃស្មាតហ្វូន ដែលអនុញ្ញាតឱ្យសមត្ថកិច្ចនគរបាលចរាចរណ៍ធ្វើការដកពិន្ទុបណ្ណបើកបរដោយស្វ័យប្រវត្តិ និងជូនដំណឹងទៅកាន់ស្ថាប័នចេញបណ្ណបើកបរ និងម្ចាស់បណ្ណដែលប្រព្រឹត្តខុសនឹងច្បាប់ចរាចរណ៍ផ្លូវគោក ហើយកម្មវិធីនេះអាចចាប់យករូបភាពយានយន្តដែលបើកបរល្មើសច្បាប់ ដោយការស្កេនលើបណ្ណបើកបរដើម្បីកាត់បន្ថយពិន្ទុចំពោះអ្នកបើកបរយានយន្តខុសច្បាប់ ទៅតាមស្ថាននៃបទល្មើសដូចជា៖ មិនពាក់ខ្សែក្រវាត់សុវត្ថិភាព បើកបរលើសល្បឿនកំណត់ បើកបរក្នុងស្ថានភាពស្រវឹង ផ្ទុកមនុស្សលើសកំណត់ ឬល្មើសភ្លើងសញ្ញា ជាដើម៕