[Phnom Penh Post] - អាមេរិកចាប់អារម្មណ៍ចំពោះការវិនិយោគលើវិស័យឥន្ធនៈ និងកំពង់ផែនៅកម្ពុជា
2022-08-30
ទៅកាន់ទំព័រចុះផ្សាយក្នុង Phnom Penh Post
(ភ្នំពេញ): គណៈប្រតិភូសមាជិកសភាអាមេរិកបានបង្ហាញការចាប់អារម្មណ៍ចំពោះការពង្រីកទំហំពាណិជ្ជកម្មទ្វេភាគី និងការវិនិយោគលើវិស័យឥន្ធនៈ និងកំពង់ផែ នៅកម្ពុជា ដែលជាប្រទេសមួយកំពុងមានកំណើនសេដ្ឋកិច្ចល្អប្រសើរ។
ចំណាប់អារម្មណ៍នេះត្រូវបានលើកឡើងក្នុងជំនួបពិភាក្សាទ្វេភាគី រវាងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ជាមួយនឹងគណៈប្រតិភូសមាជិកសភាអាមេរិក ដឹកនាំដោយលោកស្រី Carol Miller កាលពីថ្ងៃទី ២៩ ខែសីហា នៅទីស្តីការក្រសួងសាធារណការ និងដឹកជញ្ជូន។
ជាកិច្ចចាប់ផ្តើមលោក ស៊ុន ចាន់ថុល បានលើកឡើងពីដំណើរវិវត្តន៍នៃវិស័យហេដ្ឋារចនាសម្ព័ន្ធនៅកម្ពុជា ព្រមទាំងបានសម្តែងការស្វាគមន៍ ចំពោះដំណើរបំពេញទស្សនកិច្ចរបស់ក្រុមការងារនៃសភាពាណិជ្ជកម្មអាមេរិកនៅកម្ពុជា ដែលអាចនឹងជួយធ្វើឱ្យទំនាក់ទំនង និងកិច្ចសហប្រតិបត្តិការរវាងប្រទេសទាំង ២ ឱ្យកាន់តែរីកចម្រើន។
បន្ថែមពីលើនេះ លោកក៏បានប្រាប់ពីកិច្ចខិតខំរបស់រាជរដ្ឋាភិបាលកម្ពុជាលើការទាក់ទាញអ្នកវិនិយោគសក្តានុពលឱ្យចូលមកបណ្តាក់ទុនលើការអភិវឌ្ឍហេដ្ឋារចនាសម្ព័ន្ធដឹកជញ្ជូនសំខាន់ៗដូចជា ការសាងសង់ព្រលានយន្តហោះថ្មី ចំនួន ៣ (កម្រិតស្តង់ដាអន្តរជាតិ) ជាដើម។
ពាក់ព័ន្ធនឹងការកសាងហេដ្ឋារចនាសម្ព័ន្ធផ្លូវថ្នល់ លោករដ្ឋមន្ត្រី បានស្នើឱ្យមានការចូលរួមពីក្រុមហ៊ុនអាមេរិកលើការបណ្ដាក់ទុនក្នុងការកសាងហេដ្ឋារចនាសម្ព័ន្ធផ្លូវថ្នល់នៅកម្ពុជា ដោយកន្លងមកកម្ពុជាមិនទាន់ឃើញមានក្រុមហ៊ុនវិនិយោគរបស់អាមេរិកណាចូលមកបណ្តាក់ទុនលើវិស័យនេះទេ។
លោកថ្លែងថា៖ «កម្ពុជាបាននិងកំពុងខិតខំប្រឹងប្រែងជំរុញការប្រើប្រាស់យានយន្តអគ្គិសនីឱ្យបានកាន់តែទូលំទូលាយ ដើម្បីចូលរួមកាត់បន្ថយការបំពុលបរិស្ថាន តាមរយៈគម្រោងដំឡើងស្ថានីយបញ្ចូលថាមពលរថយន្តអគ្គិសនីនៅតាមបណ្តារាជធានីខេត្តដើម្បីជំរុញលើក ទឹកចិត្ត និងទាក់ទាញការចាប់អារម្មណ៍ឱ្យមានការប្រើប្រាស់យានយន្តអគ្គិសនីពីសំណាក់សាធារណៈ ទូទៅ និងស្វែងរកកិច្ចសហការជាមួយក្រុមហ៊ុននានា ជាពិសេសក្រុមហ៊ុនសហរដ្ឋអាមេរិក ដើម្បីជំរុញការដំឡើងស្ថានីយបញ្ចូលថាមពលអគ្គិសនីឱ្យបានច្រើន»។
លោកស្រី Carol Miller បានប្រាប់ថា លោកស្រីបានចាប់អារម្មណ៍យ៉ាងខ្លាំងលើការរីកចម្រើនរបស់កម្ពុជា ជាពិសេសការអភិវឌ្ឍហេដ្ឋារចនាសម្ព័ន្ធផ្លូវថ្នល់ និងកំពង់ផែ ដែលខុសពីអ្វីដែលរំពឹងទុកមុនមកដល់កម្ពុជា។ បន្ថែមពីលើនេះ លោកស្រីបានបញ្ជាក់អំពីបំណងក្នុងការពង្រឹងទំនាក់ទំនង និងកិច្ចសហប្រតិបត្តិការល្អរវាងប្រទេសទាំង ២ ជាពិសេសការពង្រីកពាណិជ្ជកម្ម និងការវិនិយោគលើវិស័យផ្សេងៗដូចជាហ្គាស និងថាមពល (LPNG) និងការវិនិយោគលើវិស័យកំពង់ផែ។
ជាការឆ្លើយតប លោករដ្ឋមន្ត្រី ស៊ុន ចាន់ថុល បានសម្ដែងការស្វាគមន៍ចំពោះក្រុមធុរកិច្ចរបស់អាមេរិកដែលមានបំណងចង់បណ្តាក់ទុនវិនិយោគនៅកម្ពុជា ជាពិសេសវិស័យកំពង់ផែ និងវិស័យហ្គាស និងថាមពល (LPNG) ហើយកម្ពុជាបើកចំហ និងត្រៀមខ្លួនសម្របសម្រួលក្រុមធុរកិច្ចសហរដ្ឋអាមេរិក ដែលមកវិនិយោគនៅកម្ពុជា៕
