កិច្ចប្រជុំពិនិត្យពិភាក្សាអំពីវឌ្ឍនភាព និងការងារដោះស្រាយផលប៉ះពាល់គម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ តាមប្រព័ន្ធវីដេអូពីចម្ងាយ ថ្ងៃសុក្រ ៧រោច ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៩ ខែសីហា ឆ្នាំ២០២២ នៅទីស្តីការក្រសួង ឯកឧត្តម សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន បានបន្តដឹកនាំកិច្ចប្រជុំពិនិត្យពិភាក្សាអំពីវឌ្ឍនភាព និងការងារ ដោះស្រាយផលប៉ះពាល់គម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ ដោយមានការចូលរួមតាមប្រព័ន្ធវីដេអូពីចម្ងាយពីតំណាងអគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ នៃក្រសួងសេដ្ឋកិច្ច និងហិរញ្ញវត្ថុ អង្គភាពគ្រប់គ្រងគម្រោង និងទីប្រឹក្សាបច្ចេកទេសគម្រោងផងដែរ។ អង្គប្រជុំបានផ្តោតការពិភាក្សាជាសំខាន់លើផែនការសកម្មភាព និងនីតិវិធីផ្សេងៗសំដៅជំរុញការងារដោះស្រាយផលប៉ះពាល់ឱ្យមានភាពងាយស្រួល ឆាប់រហ័ស និងកាត់បន្ថយជាអតិបរិមានូវផលប៉ះពាល់ប្រកបដោយប្រសិទ្ធភាពខ្ពស់៕