ឯកឧត្តម សួន ភារិទ្ធ ទទួលជួបពិភាក្សាការងារជាមួយគណៈប្រតិភូគម្រោងសហប្រតិបត្តិការបច្ចេកទេសJICA គូសាណូនិ (KOSANONE) "គម្រោងពង្រឹងសមត្ថភាពគ្រប់គ្រងប្រតិបត្តិការ ថែទាំប្រព័ន្ធលូទឹកកខ្វក់ និងសមត្ថភាពឆ្លើយតបនឹងបញ្ហាទឹកលិច" នៅរាជធានីភ្នំពេញ ថ្ងៃពុធ ៦កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៣ ខែសីហា ឆ្នាំ២០២២ ឯកឧត្តម សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយគណៈប្រតិភូគម្រោងសហប្រតិបត្តិការបច្ចេកទេសJICA គូសាណូនិ (KOSANONE) "គម្រោងពង្រឹងសមត្ថភាពគ្រប់គ្រង ប្រតិបត្តិការ ថែទាំប្រព័ន្ធលូទឹកកខ្វក់ និងសមត្ថភាពឆ្លើយតបនឹងបញ្ហាទឹកលិច" នៅរាជធានីភ្នំពេញ ដឹកនាំដោយលោក HINARO Satoshi ប្រធានផ្នែកគម្រោងអន្តរជាតិ នៃនាយកដ្ឋានគម្រោងអន្តរជាតិ និងតំបន់ទីក្រុង Kitakyushu ប្រទេសជប៉ុន អមដោយជំនាញការJICA ប្រចាំអគ្គនាយកដ្ឋានប្រព័ន្ធចម្រោះទឹកកខ្វក់។ ជំនួបពិភាក្សានេះធ្វើឡើងក្នុងគោលបំណងផ្លាស់ប្តូរមតិយោបល់គ្នារវាងអគ្គនាយកដ្ឋាន និងក្រុមការងារគម្រោងលើនីតិវិធី និងសំណូមពរផ្សេងៗ សំដៅឲ្យការអនុវត្តគម្រោងទទួលបានជោគជ័យ និងបញ្ចប់តាមកាលបរិច្ឆេទកំណត់។ ឯកឧត្តមអគ្គនាយក បានថ្លែងអំណរគុណដល់ទីភ្នាក់ងារ JICA ដែលបានជួយដល់អគ្គនាយកដ្ឋាន លើការរៀបចំសេចក្តីព្រាងច្បាប់ស្តីពីការគ្រប់គ្រងទឹកកខ្វក់ បទដ្ឋានបច្ចេកទេស ការសិក្សាសមិទ្ធិលទ្ធភាពបឋមគម្រោងប្រព័ន្ធចចម្រោះទឹកកខ្វក់នៅក្រុងស្វាយរៀង និងក្រុងសៀមរាប និងគម្រោងពាក់ព័ន្ធជាច្រើនទៀត ហើយ ឯកឧត្តមនឹងបន្តជំរុញ និងពង្រឹងកិច្ចសហការជាមួយ JICA លើវិស័យនេះឲ្យកាន់រីកចម្រើនថែមទៀត៕