ភ្នំពេញ ៖ បណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកគយ និងរដ្ឋាករកម្ពុជា នៅថ្ងៃទី២៦ ខែកក្កដា ឆ្នាំ២០២២នេះ បានចេញលិខិតណែនាំ ដល់ប្រធាននាយកដ្ឋាន សាខា និងការិយាល័យ គយនិងរដ្ឋាករ ចំនួន៣ចំណុច ដើម្បីបង្កើនប្រសិទ្ធភាព នៃការប្រមូលពន្ធនិងអាករ លើរថយន្តមានស្រាប់ក្នុងប្រទេស ដែលនៅសេសសល់។ ក្នុងលិខិតនោះ បណ្ឌិត គុណ ញឹម បានបញ្ជាក់ប្រាប់ប្រធាននាយកដ្ឋាន សាខា និងការិយាល័យ គយនិងរដ្ឋាករថា ដើម្បីបង្កើនប្រសិទ្ធភាព នៃការប្រមូលពន្ធនិងអាករ លើរថយន្តមានស្រាប់ក្នុងប្រទេស ដែលនៅសេសសល់ ជាពិសេសនៅពេលដែល ឱសានវាទនៃការអនុញ្ញាត ឱ្យម្ចាស់រថយន្តចង្កូតស្តាំ បានចូលមកបង់ពន្ធឬ ការតែខិតជិតមកដល់ លោកបានធ្វើការណែនាំបន្ថែម៖ ១.ត្រូវផ្សព្វផ្សាយដល់សាធារណជន តាមភូមិសាស្ត្រ ទទួលខុសត្រូវរៀងៗខ្លួន ឲ្យបានទូលំទូលាយ នូវសេចក្ដីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា ចុះថ្ងៃទី២៥ ខែកក្កដា ឆ្នាំ២០២២ ដូចក្នុងយោងខាងលើ។ ២.ត្រូវបន្តផ្តល់សេវាទទួលបង់ពន្ធ និងអាករ ជាពិសេសការរថយន្តចង្កូតស្តាំ មានស្រាប់ក្នុងប្រទេស ឲ្យបានកាន់តែសកម្មនិងល្អប្រសើរ។ ក្នុងករណីចាំបាច់ ត្រូវបន្ថែមម៉ោងរដ្ឋបាល រហូតដល់ម៉ោង២០:០០យប់ រួមទាំងថ្ងៃសោរ៍ និងថ្ងៃអាទិត្យ ហើយនៅថ្ងៃទី៣១ ខែកក្កដា ឆ្នាំ២០២២ ដែលជាថ្ងៃចុងក្រោយ នៃការអនុញ្ញាតឲ្យម្ចាស់រថយន្តចង្កូតស្ដាំ នៅសេសសល់មកពេញកាតព្វកិច្ចពន្ធអាករ ឬ ត្រូវកការពិតបញ្ចប់ម៉ោងរដ្ឋបាល ត្រឹមម៉ោង២២:០០ យប់។ ៣. ចាប់ពីថ្ងៃទី០១ ខែសីហា ឆ្នាំ២០២២តទៅ គ្រប់អង្គភាពគយ និងរដ្ឋាករ ត្រូវប្រមូលផ្ដុំនិងប្រើប្រាស់កម្លាំងសមស្រប ដើម្បីអនុវត្តយុទ្ធនាការបង្ក្រាប ឱ្យបានសកម្ម និងម៉ឹងម៉ាត់លើរថយន្តគ្រប់ប្រភេទ នៅគ្រប់មុខសញ្ញាដូចជា ទីសាធារណៈ ការដ្ឋាន និងអាជីវកម្មដ្ឋានជាដើម៕