កិច្ចប្រជុំស្តីពីវឌ្ឍនភាពប្រចាំខែនៃគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ថ្ងៃអង្គារ ១៣រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៦ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញ ដឹកនាំកិច្ចប្រជុំស្តីពីវឌ្ឍនភាពប្រចាំខែនៃគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ដោយមានការចូលរួមពីថ្នាក់ដឹកនាំក្រសួង ឯកឧត្តមអគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ប្រធាននាយកដ្ឋាននាវាជំនួញសមុទ្រ តំណាងនាយកដ្ឋានព័ត៌មានវិទ្យា និងទំនាក់ទំនងសាធារណៈ តំណាងអគ្គនាយកដ្ឋានគយ និងរដ្ឋាករកម្ពុជា តំណាងអគ្គនាយកដ្ឋានអន្តោប្រវេសន៍ តំណាងអគ្គនាយកដ្ឋានបច្ចេកទេសសុខាភិបាល តំណាងកំពង់ផែស្វយ័តក្រុងព្រះសីហនុ តំណាងកំពង់ផែស្វយ័តភ្នំពេញ ទីប្រឹក្សាក្រុមហ៊ុនMitsubishi Research Institute, Inc និងក្រុមហ៊ុនExeo Group Corporation។ អង្គប្រជុំបានពិភាក្សាលើលទ្ធផលវឌ្ឍនភាពក្នុងខែកក្កដានៃគម្រោងប្រព័ន្ធផ្លាស់ប្តូរទិន្នន័យអេឡិចត្រូនិក កំពង់ផែ ដែលរួមមាន៖ វគ្គបណ្តុះបណ្តាលមន្ត្រីគ្រប់គ្រងប្រព័ន្ធ(User Admin) សម្រាប់ក្រសួងស្ថាប័ន ពាក់ព័ន្ធ និងការរៀបចំការដាក់ឱ្យដំណើរការសាកល្បងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI)។ អង្គប្រជុំក៏បានពិភាក្សាផងដែរអំពីទិសដៅដែលត្រូវអនុវត្តបន្តសម្រាប់ខែសីហា រួមមានដូចជា៖ ការរៀបចំ កិច្ចប្រជុំផ្សព្វផ្សាយសេចក្តីជូនដំណឹងស្តីពីការដាក់ឱ្យដំណើរការសាកល្បងប្រើប្រាស់ប្រព័ន្ធផ្លាស់ប្តូរ ទិន្នន័យអេឡិចត្រូនិកកំពង់ផែ (Port EDI) និងកម្មវិធីសម្ពោធដាក់ឱ្យដំណើរប្រព័ន្ធនេះផងដែរ។ គួររំលឹកផងដែរថា៖ ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) នឹងត្រូវដាក់ឱ្យដំណើរការ សាកល្បងនៅថ្ងៃទី១៧ ខែសីហា ឆ្នាំ២០២២ ដើម្បីសម្រួលដល់នីតិវិធីការរៀបចំបែបបទនាវាចូលចេញ នៅកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ៕