ជំនួបពិភាក្សាការងារជាមួយគណៈប្រតិភូវិទ្យាស្ថានអភិឌ្ឍន៍តំបន់ឆ្នេរក្រៅប្រទេសជប៉ុន (OCDI) ដឹកនាំ ដោយលោកបណ្ឌិត Ichio MOTONO នាយកប្រតិបត្តិវិទ្យាស្ថាន ថ្ងៃសុក្រ ២រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែកក្កដា ឆ្នាំ២០២២ នៅទីស្តីការក្រសួង ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានជួបពិភាក្សាការងារជាមួយគណៈប្រតិភូវិទ្យាស្ថានអភិឌ្ឍន៍តំបន់ឆ្នេរក្រៅប្រទេសជប៉ុន(OCDI) ដឹកនាំ ដោយលោកបណ្ឌិត Ichio MOTONO នាយកប្រតិបត្តិវិទ្យាស្ថាន ដោយមានការអញ្ជើញចូលរួមពីថ្នាក់ ដឹកនាំក្រសួងទទួលបន្ទុក និងមន្ត្រីជំនាញពាក់ព័ន្ធ។ ជំនួបនេះធ្វើឡើងក្នុងគោលបំណងបង្ហាញជូនឯកឧត្តមទេសរដ្ឋមន្ត្រីអំពីគម្រោងពង្រឹងសមត្ថភាព រដ្ឋបាលកំពង់ផែ និងស្វែងរកអនុសាសន៍ណែនាំ ក៏ដូចជាផ្តល់ការគាំទ្របន្ថែមដល់គម្រោងនេះ សំដៅអភិវឌ្ឍវិស័យកំពង់ផែកម្ពុជា និងជំរុញការដឹកជញ្ជូនតាមផ្លូវទឹកឱ្យមានការរីកចម្រើន។ ថ្លែងទៅកាន់គណៈប្រតិភូនាឱកាសនោះ ឯកឧត្តមទេសរដ្ឋមន្ត្រី បានជម្រាបជូនអំពីកិច្ចខិតខំប្រឹងប្រែង ក្នុងការពង្រីកហេដ្ឋារចនាសម្ព័ន្ធកំពង់ផែក្រុងព្រះសីហនុដែលមានស្រាប់ គម្រោងសាងសង់កំពង់ផែ សមុទ្រថ្មីៗបន្ថែម និងគម្រោងសាងសង់កំពង់ផែតាមបណ្ដោយដងទន្លេមេគង្គ ដើម្បីធ្វើឱ្យប្រសើរឡើង ដល់ការដឹកជញ្ជូនតាមផ្លូវទឹករបស់កម្ពុជា និងបានសម្ដែងនូវការស្វាគមន៍ និងការគាំទ្រយ៉ាងពេញទំហឹង ចំពោះគម្រោងដែលបានលើកឡើងដោយវិទ្យាស្ថានអភិឌ្ឍន៍តំបន់ឆ្នេរក្រៅប្រទេសជប៉ុន(OCDI) ៕