មន្រ្ដីជំនាញនៃគណៈកម្មាធិការទទួលស្គាល់គុណភាពអប់រំនៃកម្ពុជា(ACC) ក្រសួងអប់រំ យុវជន និងកីឡា ចុះធ្វើការវាយតម្លៃថ្នាក់ឆ្នាំសិក្សាមូលដ្ឋានរបស់វិទ្យាស្ថានតេជោសែន សាធារណការ និងដឹកជញ្ជូន ថ្ងៃចន្ទ ១៣កើត ខែអាសាឍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១១ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីភាពក្នុងពិធីទទួលស្វាគមន៍មន្ត្រីជំនាញនៃគណៈកម្មាធិការទទួលស្គាល់គុណភាពអប់រំនៃកម្ពុជា ក្នុងដំណើរចុះវាយតម្លៃថ្នាក់ឆ្នាំសិក្សាមូលដ្ឋានរបស់វិទ្យាស្ថានតេជោសែន សាធារណការ និងដឹកជញ្ជូន ដឹកនាំដោយលោក ស៊ា អ៊ិត ប្រធាននាយកដ្ឋានស្ដង់ដារនិងការទទួលស្គាល់គុណភាពអប់រំ តំណាងដ៏ខ្ពង់ខ្ពស់ឯកឧត្ដមបណ្ឌិត រស់ សុវាចា អគ្គលេខាធិការនៃគណៈកម្មាធិការទទួលស្គាល់គុណភាពអប់រំនៃកម្ពុជា ក្រសួងអប់រំ យុវជន និងកីឡា ដោយមានការចូលរួមពីថ្នាក់ដឹកនាំ ក្រសួង ថ្នាក់ដឹកនាំវិទ្យាស្ថាន ព្រមទាំងនិស្សិតទាំងសរុបទាំងអស់ប្រមាណ១៥០នាក់។ ថ្លែងក្នុងមតិស្វាគមន៍ទៅកាន់អង្គពិធី ឯកឧត្តមនាយកវិទ្យាស្ថាន បានជម្រាបជូនអង្គពិធីអំពីដំណើរការរបស់វិទ្យាស្ថានតេជោសែន សាធារណការ និងដឹកជញ្ជូន ដែលត្រូវបានបង្កើតឡើងក្នុងគោលបំណងបណ្តុះបណ្តាលធនធានមនុស្ស ប្រកបដោយសមត្ថភាព ជំនាញច្បាស់លាស់ ចំណេះដឹងទូលំទូលាយ និងសីលធម៌វិជ្ជាជីវៈ ដើម្បីដោះស្រាយបញ្ហាវិបត្តិ កង្វះអ្នកជំនាញបច្ចេកទេស ក្នុងវិស័យសាធារណការ និងដឹកជញ្ជូន នាពេលបច្ចុប្បន្ន និងទៅអនាគត ក្នុងការចូលរួមចំណែកអភិវឌ្ឍសេដ្ឋកិច្ច និងសង្គមជាតិ និងបាន បញ្ជាក់ពីការប្តេជ្ញាតាំងចិត្តខ្ពស់ក្នុងការបណ្តុះបណ្តាល ដែលមានទាំងជំនាញច្បាស់លាស់ និងចំណេះដឹងទូលំទូលាយ ប្រកបដោយសីលធម៌ គុណធម៌ អត្តចរិត ចរិយាសម្បត្តិ និងគុណតម្លៃត្រឹមត្រូវ ក្នុងឋានៈជាអ្នកបន្តវេន លើវិស័យហេដ្ឋារចនាសម្ព័ន្ធផ្លូវថ្នល់ និងដឹកជញ្ជូនរបស់កម្ពុជា។ ទន្ទឹមនឹងនោះដែរ លោក ស៊ា អ៊ិត បានបញ្ជាក់ថាការវាយតម្លៃលើកម្មវិធីបណ្តុះបណ្តាលថ្នាក់ឆ្នាំសិក្សាមូលដ្ឋានធ្វើឡើងក្នុងគោលបំណងពិនិត្យគុណភាពការរៀបចំកម្មវិធីសិក្សា ដោយផ្អែកទៅលើធាតុ៣ធំៗ គឺចំណេះដឹងជំនាញ ចរិយាសម្បទា និងសីលធម៌ និងដើម្បីបង្ហាញឱ្យឃើញពីការអប់រំថា វិទ្យាស្ថានឈានដល់កម្រិតណា ក្នុងការបណ្ដុះបណ្ដាលលើមុខជំនាញនីមួយៗ នាពេលបច្ចុប្បន្ននេះ ដើម្បីធានាគុណភាពលើការអប់រំ ដោយប្រកបដោយប្រសិទ្ឋភាព។ សូមជម្រាបជូនថា៖ ការចុះធ្វើការវាយតម្លៃថ្នាក់ឆ្នាំសិក្សាមូលដ្ឋានរបស់វិទ្យាស្ថានតេជោសែន សាធារណការ និងដឹកជញ្ជូន ពីសំណាក់មន្រ្ដីជំនាញនៃគណៈកម្មាធិការទទួលស្គាល់គុណភាពអប់រំនៃកម្ពុជា(ACC) ក្រសួងអប់រំ យុវជន និងកីឡា មានរយៈពេលពេញមួយថ្ងៃចាប់ពីម៉ោង៨.៣០រហូតដល់ម៉ោង៥ល្ងាច។ បន្ទាប់ពីពិធីទទួលស្វាគមន៍ ឯកឧត្តមនាយកវិទ្យាស្ថាន បានអញ្ជើញមន្រ្ដីជំនាញនៃគណៈកម្មាធិការទទួលស្គាល់គុណភាពអប់រំនៃកម្ពុជា ចុះពិនិត្យមើលហេដ្ឋារចនាសម្ព័ន្ធអប់រំរបស់វិទ្យាស្ថាន ក្នុងនោះរួម មាន៖ បណ្ណាល័យ មជ្ឈមណ្ឌលបណ្ដុះបណ្ដាលបច្ចេកទេស Ford-TSI មន្ទីរពិសោធន៍ ការិយាល័យរដ្ឋបាលវិទ្យាស្ថាន ថ្នាក់រៀន កន្លែងលេងកីឡា និងបន្ទប់ហ្វឹកហាត់បើកបរនាវានៅវិទ្យាស្ថានផងដែរ។ បន្ទាប់មកមន្រ្ដីជំនាញនៃគណៈកម្មាធិការទទួលស្គាល់គុណភាពអប់រំ នៃកម្ពុជា ក៏បានជួបសម្ភាសន៍ជាមួយសាស្រ្ដាចារ្យ និងនិស្សិត របស់វិទ្យាស្ថាន ដើម្បីពិនិត្យ និងវាយតម្លៃ ព្រមទាំងស្វែងយល់បន្ថែម អំពីសេវាកម្មសិក្សា និងទទួលយកសំណូមពរ ពីសាស្រ្ដាចារ្យ និងនិស្សិត។ គួរបញ្ជាក់ផងដែរថា៖ កម្មវិធីសិក្សាថ្នាក់ឆ្នាំសិក្សាមូលដ្ឋានវិទ្យាស្ថានតេជោសែន សាធារណការ និងដឹកជញ្ជូន ត្រូវបានទទួលស្គាល់ពីគណៈកម្មាធិការទទួលស្គាល់គុណភាពអប់រំ នៃកម្ពុជា ហើយវិទ្យាស្ថានក៏ទទួលបានការអនុញ្ញាតឱ្យបង្កើតដេប៉ាតឺម៉ង់ឆ្នាំសិក្សាមូលដ្ឋាន ពីសំណាក់ក្រសួងអប់រំ យុវជន និងកីឡា រួចហើយដែរ៕