ភ្នំពេញ៖ គិតមកដល់ពេលនេះ គម្រោងផ្លូវក្រវាត់ក្រុងទី៣ សម្រេចបានចំនួន​៧៣,៧០ភាគរយហើយ​។ គម្រោងសាងសង់​ផ្លូវក្រវាត់ក្រុងទី៣នេះ នឹង​សាងសង់​រួចរាល់នៅខែកញ្ញា ឆ្នាំ២០២៣ខាងមុខនេះ។ នេះបើតាមព័ត៌មានផ្សាយដោយក្រសួងសាធារណការ និងដឹកជញ្ជូន​។ ក្នុងដំណើរចុះទៅត្រួតពិនិត្យលក្ខណៈបច្ចេកទេសនៃការសាងសង់ផ្លូវក្រវាត់ក្រុងទី៣ ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូនបាន​ថ្លែងថា ក្រុមការងារសាងសង់គឺនៅសល់តែការដូរទំហំការងារស្ពាននៅប្រឡាយ៩៤ និងប្រឡាយ៩៦ ការសាងសង់ស្ពានរំលងត្រង់ផ្លូវជាតិលេខ៤ ការងារផ្លូវគីឡូម៉ែត្រ ០+០០ ដល់ គីឡូម៉ែត្រ ៤+៩០០ ជាដើម។ ផ្លូវក្រវាត់ក្រុងទី៣ នឹងគ្រោងបញ្ចប់នៅខែកញ្ញា ឆ្នាំ២០២៣ខាងមុខនេះ។ ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូនបានបញ្ជាក់ថា ក្រុមការងារ​បានស្វែងយល់លើការងារពិសោធន៍មួយចំនួនដែលកំពុងអនុវត្តជាក់ស្តែងក្នុងការដ្ឋានដែលក្នុងនោះរួមមាន ការធ្វើពិសោធ Benkelman Beam Test ការចាក់សំណាកគំរូបេតុងសង្កត់ ការពិនិត្យលើកម្រាស់បេតុង ការកាត់តំណបេតុង និងការថែទាំបេតុងក្រោយសាងសង់រួចជាដើម។ សូមបញ្ជាក់ថា ផ្លូវក្រវាត់ក្រុងខ្សែទី៣ មានប្រវែងសរុប៥២,៩៨៣ គីឡូម៉ែត្រ មានទទឹង ២២ ម៉ែត្រ មាន ៤ គន្លង។ ផ្លូវក្រវ៉ាត់ក្រុងខ្សែទី៣នេះ គឺតភ្ជាប់ពីផ្លូវជាតិលេខ៦,លេខ៥,​លេខ៤,លេខ៣,លេខ២ និងផ្លូវជាតិលេខ១ តភ្ជាប់​ពីចំណតផែកុងតេន័រថ្មីរបស់កំពង់ផែស្វ័យតភ្នំពេញ នៅស្រុកកៀនស្វាយ។ គម្រោងផ្លូវក្រវ៉ាត់ក្រុង​ទី៣នេះ គឺចំណាយថវិកាសាងសង់​ក្នុងទំហំទឹកប្រាក់២៦៧លានដុល្លារអាមេរិកដែលជាហិរញ្ញប្បទាន​សម្បទាន​ពី​រដ្ឋាភិបាលចិន និង​ថវិកា​បដិភាគ​របស់​រាជរដ្ឋាភិបាល​កម្ពុជា៕