ផ្លូវជាតិលេខ៥ជាផ្លូវសេដ្ឋកិច្ចកម្ពុជាដ៏មានសក្ដានុពល បានបើកការដ្ឋានង្រីកជា៤គន្លងពីបាត់ដំបងទៅសិរីសោភ័ណ ដើរតួជាផ្លូវអាស៊ានហាយវេលេខ១ តភ្ជាប់ភ្នំពេញ-បាងកក-ហូជីមីញ ។ គម្រោងសាងសង់កំណាត់ផ្លូវជាតិលេខ៥ដំណាក់កាលទី១នេះ មានប្រវែងសរុប៨៤,៧៤គម ពីបាត់ដំបងទៅសិរីសោភ័ណ ជាប្រភេទផ្លូវចាក់បេតុងកៅស៊ូ (AC) កម្រាស់១៥ ស.ម មានទទឹង ២៣ ម៉ែត្រ និងមាន៤គន្លង ខណ្ឌដោយសួនទ្រូងផ្លូវទទឹង ៣ ម៉ែត្រ សម្រាប់យានយន្តគ្រប់ប្រភេទធ្វើចរាចរណ៍។ គម្រោងនេះប្រើរយៈពេល ៣៦ខែ ដោយចាប់ផ្ដើមសាងសង់ពីខែកុម្ភៈ ឆ្នាំ២០១៧ និងគ្រោងបញ្ចប់នៅខែមីនា ឆ្នាំ២០២០ គ្រោងនឹងចំណាយទឹកប្រាក់សរុប ១៩ ៩៨៨ លានយេនជប៉ុន ស្មើនឹង ១៨៥ លានដុល្លារអាមេរិក ក្រោមគម្រោងឥន្ទទានជំនួយឥតសំណងរបស់រាជរដ្ឋាភិបាលជប៉ុន សាងសង់ដោយក្រុមហ៊ុន Tekken Taiyu Joint Venture និងក្រុមហ៊ុន Daiho Asanuma Joint Venture និងត្រូវបានត្រួតពិនិត្យបច្ចេកទេសដោយក្រុមហ៊ុន Katahira & Engineers International ។ ចំពោះដំណាក់កាលទីពីរ គឺពីព្រែកក្ដាមទៅខេត្តពោធិសាត់ និងដំណាក់កាលទីបី ពីពោធិសាត់ទៅបាត់ដំបង និងពីខេត្តបន្ទាយមានជ័យ ទៅប៉ោយប៉ែត (ព្រំប្រទល់ថៃ)។ ឯកឧត្ដមទេសរដ្ឋមន្ត្រី ស៊ុន ចាន់ថុល បានបញ្ជាក់ថាផ្លូវជាតិលេខ៥ មានភាពមមាញឹកក្នុងការដឹកផលិតផលកសិកម្មរបស់ប្រជាពលរដ្ឋទៅកាន់ទីផ្សារគោលដៅ និងបានទាក់ទាញវិនិយោគិនគ្រប់វិស័យ និងមានភ្ញៀវទេសចរចូលមកទស្សនាប្រទេសកម្ពុជាកើនឡើងជាលំដាប់។ លើសពីនេះទៅទៀតផ្លូវនេះគឺជាផ្លូវយុទ្ធសាស្ត្រយ៉ាងសំខាន់ ជាផ្លូវអាស៊ានហាយវេលេខ១ ហើយក៏ជាផ្លូវរបៀងសេដ្ឋកិច្ចកើត-លិចទី២ដ៏សក្ដានុពល សម្រាប់ប្រកួតប្រជែងពាណិជ្ជកម្ម ទេសចរណ៍ ភស្តុភារកម្ម វិនិយោគ និងសេដ្ឋកិច្ចនៃមហាតំបន់មេគង្គ GMS ដែលតភ្ជាប់រវាងទីក្រុងបាកក ទីក្រុងភ្នំពេញ និងទីក្រុងហូជីមិញ។ គួរបញ្ជាក់ផងដែរថា បន្ទាប់ពីសាងសង់រួច ផ្លូវជាតិលេខ៥នឹងជួយឱ្យប្រជាពលរដ្ឋទូទាំងប្រទេស ជាពិសេសប្រជាពលរដ្ឋដែលរស់នៅតាមដងផ្លូវនេះមានឱកាសបង្កើតមុខរបរ ពង្រីកមុខរបរ និងមានការងារធ្វើគ្រប់ៗគ្នាទៅតាមជំនាញនិងទេពកោសល្យរបស់ខ្លួន ដែលធ្វើឱ្យជីវភាពរបស់គាត់មានភាពសម្បូរសប្បាយមួយកម្រិតទៀត ។