វគ្គបណ្តុះបណ្តាលស្តីពី សុវត្ថិភាពចរាចរណ៍ ដល់សមាជិក សមាជិកា ស.ស.យ.ក ខេត្តត្បូងឃ្មុំ ត្បូងឃ្មុំ៖ នាព្រឹកថ្ងៃព្រហស្បតិ៍ ១២កើត ខែពិសាខ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី១២ ខែឧសភា ឆ្នាំ២០២២ លោក ឈួន វ៉ន់ ប្រធានផ្នែកដឹកជញ្ជូន នៃក្រុមការងារ ស.ស.យ.ក. វិស័យសាធារណការ និងដឹកជញ្ជូន តំណាងលោក ឈួន វិន ប្រធានក្រុមការងារ ស.ស.យ.ក ក្នុងវិស័យ និងលោក ម៉ៅ ឌុង នាយករដ្ឋបាលសាលាខេត្ត និងជាប្រធាន ស.ស.យ.ក ខេត្តត្បូងឃ្មុំ អញ្ជើញជាអធិបតីក្នុងវគ្គបណ្តុះបណ្តាលស្តីពី សុវត្ថិភាពចរាចរណ៍ ដល់សមាជិក សមាជិកា ស.ស.យ.ក ខេត្តត្បូងឃ្មុំ ដោយវគ្គបណ្ដុះបណ្ដាលនេះក៏មានការអញ្ជើញចូលរួមពីប្រធាននាយកដ្ឋានសេវាអតិថិជន និងទំនាក់ទំនងសាធារណៈ នៃ ប.ស.ស និងសមាជិក សមាជិកា ស.ស.យ.ក ខេត្តត្បូងឃ្មុំ សរុបចំនួន ១០០នាក់។ វគ្គបណ្តុះបណ្តាលនេះរៀបចំឡើងក្នុងគោលបំណងអប់រំផ្សព្វផ្សាយអំពីសុវត្ថិភាពចរាចរណ៍ដល់សមាជិក សមាជិកា ស.ស.យ.ក. ខេត្តត្បូងឃ្មុំ ដើម្បីជួយអប់រំផ្សព្វផ្សាយបន្ត សំដៅកាត់បន្ថយបញ្ហាគ្រោះថ្នាក់ចរាចរណ៍។ ក្រោយពីការចែករំលែកនូវប្រធានបទសំខាន់ៗក្នុងវគ្គបណ្តុះបណ្តាលដែលរួមមាន៖ ស្ថានភាពគ្រោះថ្នាក់ចរាចរណ៍ផ្លូវគោក ការប្រើប្រាស់មួកសុវត្ថិភាព ការប្រើប្រាស់ល្បឿន និងហានិភ័យនៃការបើកបរក្រោមឥទ្ធិពលនៃគ្រឿងស្រវឹង ក្រុមការងារក៏បានធ្វើការចែកជូនមួកសុវត្ថិភាពចំនួន ៥០មួក ជូនដល់សិក្ខាកាមដែលបានចូលរួមឆ្លើយសំណួរត្រឹមត្រូវផងដែរ។ សូមជម្រាបជូនផងដែរថា វគ្គបណ្តុះបណ្តាលនេះរៀបចំឡើងដោយផ្នែកដឹកជញ្ជូន នៃស.ស.យ.ក វិស័យសាធារណការ និងដឹកជញ្ជូន សហការជាមួយមន្ទីរសាធារណការ និងដឹកជញ្ជូន និងស.ស.យ.ក ខេត្តត្បូងឃ្មុំ ដោយមានការចូលរួមឧបត្ថម្ភដោយ បេឡាជាតិរបបសន្តិសុខសង្គម (ប.ស.ស)៕