សិក្ខាកាមចំនួន ៩០រូប បានចូលរួមវគ្គបណ្ដុះបណ្ដាលស្ដីពី “ការប្រើប្រាស់បច្ចេកវិទ្យា QR Code និង Barcode” នៅអង្គភាពប្រឆាំងអំពើពុករលួយ(អ.ប.ព.) ។ នៅព្រឹកថ្ងៃពុធ ១៣ រោច ខែផល្គុន ឆ្នាំឆ្លូវ ត្រីស័ក ព.ស. ២៥៦៥ ត្រូវនឹង ថ្ងៃទី៣០ ខែមីនា ឆ្នាំ២០២២ វេលាម៉ោង ៨:៣០នាទី នៅអង្គភាពប្រឆាំងអំពើពុករលួយ (អ.ប.ព.) មានបើកវគ្គបណ្តុះបណ្តាលស្តីពី "ការប្រើប្រាស់បច្ចេកវិទ្យា QR Code និង Barcode" ជូនថ្នាក់ដឹកនាំ និងមន្ត្រីរាជការនៃ អ.ប.ព. ចំនួន ៣០ រូប (សិក្សាដោយផ្ទាល់) និង ចំនួន ៦០ រូបទៀតសិក្សាតាមប្រព័ន្ធអនឡាញ ក្រោមអធិបតីភាព ឯកឧត្តម អ៊ូ វិសាល អគ្គនាយក នៃអគ្គនាយកដ្ឋានរដ្ឋបាល និងសន្តិសុខនៃអង្គភាពប្រឆាំងអំពើរលួយ។ វគ្គបណ្តុះបណ្តាលនេះនឹងប្រព្រឹត្តទៅរយៈពេល ១ថ្ងៃកន្លះ (ថ្ងៃទី៣០-៣១ ខែមីនា ឆ្នាំ២០២២) ក្នុងគោលបំណងបង្កើនចំណេះដឹងពាក់ព័ន្ធនឹងមុខងាររបស់កម្មវិធី និងការបង្កើត QR Code និង Barcode ជាមួយនឹងការប្រើប្រាស់តាមរយៈ Online និង Offline ជូនថ្នាក់ដឹកនាំ និងមន្រ្តីរាជការ នៃ អ.ប.ព. ដើម្បីជាមូលដ្ឋានក្នុងការអនុវត្តការងាររបស់ខ្លួនឱ្យមានប្រសិទ្ធភាពខ្ពស់ ។ វគ្គបណ្តុះបណ្តាលនេះ ទទួលបានការធ្វើបទឧទ្ទេសនាមដោយ លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងសហការីចំនួន ៤ រូបទៀត ដែលអញ្ជើញមកពីក្រសួងសាធារណការ និងដឹកជញ្ជូន ។