ភ្នំពេញ ៖ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា គម្រោងសាងសង់កំពង់ផែទេសចរណ៍ខេត្តកំពត មិនអាចបញ្ចប់ការសាងសង់តាមការគ្រោងទុកនៅថ្ងៃទី៣១ ខែឧសភានេះបានទេ ពោលគឺអាចបញ្ចប់នៅចុងខែមិថុនាខាងមុខនេះ ដែលនឹងជួយជំរុញកំណើនភ្ញៀវទេសចរផ្លូវទឹកបានកាន់តែច្រើន។ អ្នកយកព័ត៌មានយើងធ្វើសេចក្តីរាយការណ៍បន្ថែម ៖ ..... ថ្លែងក្នុងឱកាសចុះត្រួតពិនិត្យវឌ្ឍនភាពគម្រោងអភិវឌ្ឍសាងសង់កំពង់ផែទេសចរណ៍អន្តរជាតិប្រចាំខេត្តកំពត នៅថ្ងៃទី២៩ ខែមីនា ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា គម្រោង សាងសង់កំពង់ផែទេសចរណ៍អន្តរជាតិ ប្រចាំនៅក្នុងខេត្តកំពតរហូតមកដល់ ឆ្នាំ២០២២នេះ សម្រេចបានប្រមាណជាង៩០ភាគរយហើយ ខណៈដែលត្រូវពន្យារពេល នៅចុងខែមិថុនា ឆ្នាំ២០២២ខាងមុខនេះ ដើម្បីដាក់ដំណើរការនិងទទួលស្វាគមន៍ទេសចរជាតិ អន្តរជាតិនានា។ ឯកឧត្តម ទេសរដ្ឋមន្ត្រី បានបញ្ជាក់ថា គម្រោងសាងសង់កំពង់ផែទេសចរណ៍អន្តរជាតិប្រចាំខេត្តកំពតដែលមានទីតាំងស្ថិតនៅស្រុកទឹកឈូ កំពុងសាងសង់នៅលើផ្ទៃដីទំហំ៤ហិកតាមានជម្រៅ៤,៥ម៉ែត្រ ជាហិរញ្ញប្បទានរបស់ធនាគារអភិវឌ្ឍន៍អាស៊ី ប្រមាណជិត១០លានដុល្លារអាមេរិក។ សំឡេង « មកដល់ពេលនេះតាមរបាយការណ៍ ក្រុមហ៊ុនទីប្រឹក្សាបច្ចេកទេសបានបញ្ចាក់ថា ការសាងសង់នេះបាន៩៣ភាគរយហើយៗគ្រោងនឹងបញ្ចប់នៅថ្ងៃទី៣១ខែឧសភា ឆ្នាំ២០២២នេះ យើងនិយាយថា ២ខែទៀតនឹងធ្វើឱ្យបានចប់ ប៉ុន្តែតាមពិនិត្យរួមគ្នាទៅ ខ្ញុំយល់ឃើញថា ២ខែក៏ធ្វើមិនទាន់ហើយដែរ ដូច្នេះយើងពិភាក្សាជាមួយក្រុមហ៊ុនសាងសង់ថា យើងនឹងបន្តពន្យារពេលដល់ថ្ងៃទី៣០ ខែមិថុនា ដើម្បីឱ្យក្រុមហ៊ុនមានឱកាសជ្រើសរើសបុគ្គលិកបន្ថែម ដើម្បីធ្វើកិច្ចការងារនេះឱ្យបានចប់សព្វគ្រប់ អ៊ីចឹងស្នើឱ្យក្រុមហ៊ុនសាងសង់នេះ បន្ថែមបុគ្គលិក បន្ថែមវេនសាងសង់អ៊ីចឹងសាងសង់មិនហើយទេ »។ សូមបញ្ជាក់ថា កំពង់ផែនេះមានបណ្តោយ៣០០ម៉ែត្រ និងមានសមត្ថភាពអាចផ្ទុកនាវាដឹកអ្នកដំណើរបានពី៣០០ ទៅ៤០០នាក់។ ក្រោយពីបញ្ចប់ការសាងសង់ជាស្ថាពរ កំពង់ផែទេសចរណ៍អន្តរជាតិនេះនឹងក្លាយជាច្រកទ្វារដ៏សំខាន់ សម្រាប់ទទួលភ្ញៀវទេសចរណ៍ជាតិ និងអន្តរជាតិធ្វើដំណើរកម្សាន្តតាមផ្លូវទឹក ជាពិសេសទេសចរណ៍មកពីប្រទេសថៃ និងវៀតណាមចូលមកកាន់កម្ពុជា ជាកំពង់ផែសម្រាប់អ្នកដំណើរមិនមែនជាកំពង់ផែទំនិញឡើយ។ ជាងនេះ ទៅទៀត កំពង់ផែនេះចូលរួមចំណែកអភិវឌ្ឍន៍វិស័យទេសចរណ៍នៅខេត្តកំពត ជួយបង្កើតឱកាសការងារ បង្កើនប្រាក់ចំណូល និងលើកកម្ពស់ជីវភាពរស់នៅរបស់ប្រជាពលរដ្ឋ៕