ដោយៈ សុផល / ភ្នំពេញ​: ក្រសួង​សាធារណការ និង​ដឹកជញ្ជូន និង​សម្ព័ន្ធ​ក្រុមហ៊ុន Construction Corporation No.1 – JSC (CC1) and Civil Engineering Construction Corporation No. 6 – JSC (CIENCO6) Joint Venture កាលពី​ថ្ងៃទី​២៤ ខែមីនា ឆ្នាំ​២០២២ បាន​ចុះហត្ថលេខា លើ​កិច្ចសន្យា​សាងសង់ គម្រោង​ធ្វើឱ្យ​ប្រសើរ​ឡើងវិញ កំណាត់​ផ្លូវជាតិ​លេខ ៥ ភាគ​កណ្ដាល (​ធ្លា​ម្អម​-​បាត់ដំបង និង​សិរីសោភ័ណ​-​ប៉ោយប៉ែត​) ដែលជា​កញ្ចប់​ការងារ​ទី​៤​។ គម្រោង​ស្ថាបនា​នេះ គ្រោង​នឹង​បញ្ចប់​នៅ​ឆ្នាំក្រោយ​។​ ​ពិធី​ចុះហត្ថលេខា​លើ​កិច្ចសន្យា​សាងសង់​នេះ មានការ​ចូលរួម​ពី​លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន លោក Le Huu Viet Duc តំណាង​ក្រុមហ៊ុន​សាងសង់ និង​តំណាង​ទីភ្នាក់ងារ​សហប្រតិបត្តិ​ការ​អន្តរជាតិ​ជប៉ុន (JICA) មន្ត្រី​ជំនាញ​ប​ច្ចេ​សទេស ក្រោម​ឱវាទ​ក្រសួង និង​ភាគី​ពាក់ព័ន្ធ​។​ ​សូម​ជម្រាបជូន​ថា រាជរដ្ឋាភិបាល​កម្ពុជា បានទទួល​កម្ចី​ឥណទាន​សម្បទាន ពី​រដ្ឋាភិបាល​ជប៉ុន តាមរយៈ​ទីភ្នាក់ងារ​សហប្រតិបត្តិ​ការ​អន្តរជាតិ​ជប៉ុន (JICA) ដែលមាន​ទំហំ​ទឹកប្រាក់​សរុប ៣៦.៩១០ លាន​យ៉េន ប្រមាណ ៣១៣ លាន​ដុល្លារ​អាមេរិក សម្រាប់​អនុវត្ត​គម្រោង​ធ្វើឱ្យ ប្រសើរ​ឡើងវិញ​កំណាត់​ផ្លូវជាតិ​លេខ ៥ ភាគ​កណ្តាល ដែល​ផ្តើម​សាងសង់​ចាប់ពី​ធ្លា​ម្អម ទៅដល់​បាត់ដំបង ប្រវែង ១១០,៩០ គីឡូម៉ែត្រ និង​បូក​បញ្ចូល​ផ្នែក​ចុងក្រោយ ចាប់ពី​សិរីសោភ័ណ ទៅដល់​ប៉ោយប៉ែត ប្រវែង ៣៥,១៤ គីឡូម៉ែត្រ សរុប​មាន​ប្រវែង ១៤៦,០៤ គីឡូម៉ែត្រ​។​ ​ក្នុងនាម​ថ្នាក់ដឹកនាំ​ក្រសួង​សាធារណការ​និង​ដឹកជញ្ជូន ក៏ដូចជា រាជរដ្ឋាភិបាល​កម្ពុជា លោក​ទេសរដ្ឋមន្ត្រី បាន​ថ្លែងអំណរគុណ​យ៉ាង​ជ្រាលជ្រៅ ចំពោះ​រដ្ឋាភិបាល​ជប៉ុន ដែល​បានផ្តល់​ការគាំទ្រ ក៏ដូចជា ចូលរួមចំណែក​ក្នុងការ​ស្ដារឡើងវិញ ហេដ្ឋារចនាសម្ព័ន្ធ ផ្លូវថ្នល់ ស្ពាន កំពង់ផែ និង​ហេដ្ឋារចនាសម្ព័ន្ធ​រូបវន្ត ជាច្រើន​នៅ​កម្ពុជា និង​បាន​គូសបញ្ជាក់​ពី សារសំខាន់​ផ្លូវជាតិ​លេខ​៥ ត​ភ្ជាប់​ប្រទេស​ថៃ កម្ពុជា និង​ប្រទេស​វៀតណាម តាមរយៈ​ផ្លូវជាតិ លេខ​១ បង្កើតបានជា​ផ្លូវ​អាស៊ាន​ហាយ​វេ ក្នុងការ​អភិវឌ្ឍ​សេដ្ឋកិច្ចជាតិ ឱ្យ​កាន់​តែមាន ការរីកចម្រើន ជាពិសេស​ស្របពេល​ដែល​កំណើន​ចរាចរណ៍ និង​ការដឹកជញ្ជូន​មានការ កើនឡើង​។​ ​លោក​ទេសរដ្ឋមន្ត្រី ក៏បាន​ជម្រាបជូន​ផងដែរ អំពី​ការសាងសង់​រួចរាល់​ជា​ស្ថាពរ ១០០% នៃ​កំណាត់​ផ្លូវជាតិ​លេខ​៥ ពី​បាត់ដំបង​-​សិរីសោភ័ណ ប្រវែង ៨៤,៧៤ គីឡូម៉ែត្រ និង​បាន​សម្ពោធ​ដាក់ឱ្យ​ប្រើប្រាស់​ជា​ផ្លូវការ ក្រោម​អធិបតីភាព​ដ៏​ខ្ពង់ខ្ពស់ សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា កាលពី​ថ្ងៃទី​១០ ខែមករា ឆ្នាំ​២០២២ កន្លងទៅ​។​ ​ដោយឡែក ទាក់ទង​នឹង​កំណាត់​ផ្លូវជាតិ​លេខ​៥ ពី​ព្រែក​ក្តាម ទៅ​ធ្លា​ម្អម (​ពោធិ៍សាត់​) លោក​ទេសរដ្ឋមន្ត្រី បាន​បញ្ជាក់ថា គ្រោង​នឹងត្រូវ​បញ្ចប់​ការសាងសង់​នៅ​ឆ្នាំក្រោយ​។​ ​ឆ្លៀត​ក្នុងឱកាស​នោះ លោក​ទេសរដ្ឋមន្ត្រី ក៏បាន​ផ្ដាំ​ផ្ញើឱ្យ​ក្រុម​សាងសង់ ត្រូវ​យកចិត្តទុកដាក់ សាងសង់ ដោយ​ឈរលើ​គោលការណ៍ គុណ​ភាពជា​ចម្បង ធានា​ដល់​ការប្រើប្រាស់​បាន យូរអង្វែង និង​រៀបចំ​សណ្តាប់ធ្នាប់ និង​សុវត្ថិភាព នៅតាម​ការដ្ឋាន ឱ្យបាន​ត្រឹមត្រូវ ដើម្បី​បង្ការ កុំឱ្យ​មាន គ្រោះថ្នាក់​ចរាចរណ៍ ជាពិសេស​ដាក់​ផ្លាកសញ្ញា សុវត្ថិភាព និង​ភ្លើង​បំភ្លឺ​ផ្លូវ ពេលយប់ ជាដើម​។​ ​ជាមួយគ្នា​នោះ លោក Le Huu Viet Duc បាន​សម្តែង​នូវ​ជំនឿ យ៉ាង​មុតមាំ​ថាៈ ពិធី​ចុះហត្ថលេខា នៅថ្ងៃនេះ គឺជា​លក្ខខណ្ឌ​ចាំបាច់ ដែល​អាចឱ្យ​ក្រុមហ៊ុន យល់ដឹង​កាន់តែ ច្បាស់ ក្នុងការ​ចូលរួម ក្នុង​សកម្មភាព​សាងសង់​ជាច្រើន ដើម្បី​រួមចំណែក​ដល់​ការអភិវឌ្ឍ ហេដ្ឋារចនាសម្ព័ន្ធ នៅ​កម្ពុជា ជាពិសេស​ជាងនេះទៅទៀត គម្រោង​នេះ ធ្វើឱ្យ​ចំណងទាក់ទង រវាង​ប្រទេសជិតខាង​ទាំងពីរ កម្ពុជា​-​វៀតណាម កាន់​តែមាន​ភាពជិតស្និទ្ធ​ថែមទៀត​។​ ​គម្រោង​ធ្វើឱ្យ​ប្រសើរ​ឡើងវិញ កំណាត់​ផ្លូវជាតិ​លេខ ៥ ភាគ​កណ្តាល នឹងធ្វើ​ការពង្រីក​លើផ្លូវ ចាស់​ពី ២​គន្លង ទៅ ៤​គន្លង ស្ថាបនា​ផ្លូវ​វាង​ក្រុង​ពោធិ៍សាត់ មាន​ប្រវែង ១១,៦៩ គីឡូម៉ែត្រ ដែលមាន ៤ គន្លង គម្រោង​ស្ថាបនា​ផ្លូវ មាន​ទទឹងផ្លូវ​ប្រវែង ២៣ ម៉ែត្រ ក្រាល​កៅស៊ូ AC (Asphalt Concrete) កម្រាស់ ១៥ សង់ទីម៉ែត្រ និង​មាន​សួនច្បារ​នៅ​ចំ​កណ្តាល ធ្វើការ​ពង្រីក​ស្ពាន​ចាស់ ចំនួន ២៧ កន្លែង សាងសង់​ស្ពាន​ថ្មី ចំនួន​៨​កន្លែង ស្ថាបនា​លូ​រំដោះ ទឹកភ្លៀង (​លូ​មូល​ចំនួន ៩០ កន្លែង និង​លូ​ប្រអប់​ចំនួន ៧៨ កន្លែង​) និង​ស្ថាបនា​ស្ថានីយ ជញ្ជីង​ថ្លឹង​ទម្ងន់​រថយន្ត ចំនួន ៦​ស្ថានីយ​។​ សូមបញ្ជាក់ថា គម្រោង​ធ្វើឱ្យ​ប្រសើរ​ឡើងវិញ​កំណាត់​ផ្លូវជាតិ​លេខ ៥ ភាគ​កណ្តាល ចែកចេញជា ៥ កញ្ចប់​ការងារ ដូចតទៅ​៖ ​កញ្ចប់​ទី​១- ពង្រីក​ផ្លូវ​ចាស់​ពី​២​គន្លង​ទៅ​៤​គន្លង និង​ស្ថាបនា​ផ្លូវ​វាង​ក្រុង​ពោធិ៍សាត់ ក្រាលកម្រាល AC កម្រាស់​១៥​សម និង​សួន​កណ្តាល ប្រវែង​១៩,៨០​គីឡូម៉ែត្រ (​ផ្លូវ​វាង​១១,៦៩​គីឡូម៉ែត្រ​) ចាប់ពី គម​១៧១+២០០ ដល់ គម​១៩១+០០០ គ្រោង​ចំណាយ​ថវិកា​៥៩ ៨១៨ ៥០១,៦៦ ដុល្លារ​អាមេរិក សាងសង់​ដោយ​សម្ព័ន្ធ​ក្រុមហ៊ុន ILSUNG-CIENCO1 Joint Venture​។​ ​កញ្ចប់​ទី​២-​ពង្រីក​ផ្លូវ​ចាស់​ពី​២​គន្លង ទៅ​៤​គន្លង ក្រាលកម្រាល AC កម្រាស់​១៥​សម និង​សួនច្បារ​កណ្តាល ប្រវែង​៤៧​គីឡូម៉ែត្រ ចាប់ពី​គម​១៩១+០០០ ទៅដល់ គម​២៣៨+០០០ គ្រោង​ចំណាយ​ថវិកា ៩២ ៥៨៣ ០៦១,០៣ ដុល្លារ​អាមេរិក សាងសង់​ដោយ​ក្រុមហ៊ុន OBAYASHI CORPORATION​។​ ​កញ្ចប់​ទី​៣- ពង្រីក​ផ្លូវ​ចាស់​ពី​២​គន្លង​ទៅ​៤​គន្លង ក្រាលកម្រាល​AC កម្រាស់​១៥​សម និង​សួនច្បារ​កណ្តាល ប្រវែង​៤៤,១ គីឡូម៉ែត្រ ចាប់ពី គម​២៣៨+០០០ ដល់ គម​២៨២+១០១ គម្រោង​ចំណាយ​ថវិកា​៩១ ៣៤១ ១៣១,៧៣ ដុល្លារ​អាមេរិក សាងសង់​ដោយ​សម្ព័ន្ធ​ក្រុមហ៊ុន TEKKEN-IKEE Joint Venture​។​ ​កញ្ចប់​ទី​៤- ពង្រីក​ផ្លូវ​ចាស់​ពី​២​គន្លង​ទៅ​៤​គន្លង ក្រាលកម្រាល AC កម្រាស់​១៥​សម និង​សួនច្បារ​កណ្តាល​ប្រវែង ៣៥,១៤​គីឡូម៉ែត្រ ចាប់ពី គម​៣៦៦+៨១៥ ដល់ គម​៤០២+០១០ គ្រោង​ចំណាយ​ថវិកា​៥២ ៥៦១ ៧៦៣,៩៣ សាងសង់​ដោយ​សម្ព័ន្ធ ក្រុមហ៊ុន CC1-CIENCO6 Joint Venture ។​ ​កញ្ចប់​ទី​៥- ស្ថាបនា​ស្ថា​យ​នី​យ​ថ្លឹង​ទម្ងន់​រថយន្ត​ចំនួន ៦​ស្ថានីយ​៕/V​