ឯកឧត្តមរដ្ឋលេខាធិការ សួង ហេង ជួបពិភាក្សាការងារជាមួយគណៈប្រតិភូក្រុមហ៊ុន ជីប ម៉ុង ដើម្បីពិភាក្សាអំពីកិច្ចសហប្រតិបត្តិរវាងក្រសួងសាធារណការ និងដឹកជញ្ជូន និងក្រុមហ៊ុនលើការអភិវឌ្ឍវិស័យហេដ្ឋារចនាសម្ព័ន្ធសំណង់ ថ្ងៃចន្ទ ៤រោច ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២១ ខែមីនា ឆ្នាំ២០២២ នៅទីស្តីការ ក្រសួង ឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជួប ពិភាក្សាការងារជាមួយគណៈប្រតិភូក្រុមហ៊ុន ជីប ម៉ុង ដើម្បីពិភាក្សាអំពីកិច្ចសហប្រតិបត្តិការរវាងក្រសួង និងក្រុមហ៊ុនលើការអភិវឌ្ឍវិស័យហេដ្ឋារចនាសម្ព័ន្ធសំណង់ ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធក្រោមឱវាទក្រសួងផងដែរ។ គណៈប្រតិភូ បានធ្វើបទបង្ហាញជូនអង្គប្រជុំអំពីប្រតិបត្តិការការងារអាជីវកម្ម និងសកម្មភាពការងារសំខាន់ៗរបស់ក្រុមហ៊ុនទាក់ទងនឹងការផលិតផលិតផលនានា រួមមានដូចជា៖ ដែក ស៊ីម៉ង់ត៍ បំពង់ជ័រ ក្បឿង ប្រតិបត្តិការធនាគារ សេវាកម្មសណ្ឋាគារ និងការសាងសង់ហេដ្ឋារចនាសម្ព័ន្ធធំៗជាដើម។ ជាមួយគ្នានោះផងដែរ ឯកឧត្តមរដ្ឋលេខាធិការ បានឱ្យដឹងថា៖ ក្រុមហ៊ុនជីប ម៉ុង ជាក្រុមហ៊ុនដ៏ធំមួយ របស់ប្រទេសកម្ពុជា ធ្លាប់មានកិច្ចសហប្រតិបត្តិការយ៉ាងល្អកន្លងមកជាមួយក្រសួង និងបានថ្លែងនូវកោត សសើរយ៉ាងជ្រាលជ្រៅចំពោះក្រុមហ៊ុនដែលបានសាងស្នាដៃល្អៗជាច្រើនទាក់ទងនឹងការអភិវឌ្ឍហេដ្ឋារចនាសម្ព័ន្ធសំណង់៕