ក្រសួងសាធារណការ និងដឹកជញ្ជូន ប្រគល់ម៉ាស៊ីនធ្វើតេស្តរកមេរោគកូវីដ-១៩ ម៉ាក ID NOW Abbott U.S និងម៉ាស៊ីនអេកូយួរដៃចំនួនពីរគ្រឿងជូនមន្ទីរពេទ្យមិត្តភាពខ្មែរ-សូវៀត ថ្ងៃព្រហស្បតិ៍ ១កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៣ ខែមីនា ឆ្នាំ២០២២ នៅទីស្តីការក្រសួង ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីប្រគល់-ទទួលម៉ាស៊ីនធ្វើតេស្តរកមេរោគកូវីដ-១៩ ម៉ាក ID NOW Abbott U.S និងម៉ាស៊ីនអេកូយួរដៃចំនួនពីរគ្រឿង ជូនមន្ទីរពេទ្យមិត្តភាពខ្មែរ-សូវៀត ដោយមានការអញ្ជើញចូលរួមពីថ្នាក់ដឹកនាំក្រសួង លោកសាស្រ្តាចារ្យ ងី ម៉េង នាយកមន្ទីរពេទ្យមិត្តភាពខ្មែរ-សូវៀត និងជាប្រធានកម្មវិធីជាតិសុខភាពភ្នែក និងមន្ត្រីជំនាញពាក់ព័ន្ធផងដែរ។ សូមជម្រាបជូនថា៖ ម៉ាស៊ីនធ្វើតេស្តរកមេរោគកូវីដ-១៩ ម៉ាក ID NOW Abbott U.S ជាបច្ចេកវិទ្យាទំនើប មានប្រសិទ្ធភាព សុវត្ថិភាពខ្ពស់ មានលក្ខណៈពិសេសអាចធ្វើរោគវិនិច្ឆ័យរកមេរោគកូវីដ-១៩ បានយ៉ាង ឆាប់រហ័ស ដោយទទួលបានលទ្ធផល និងទិន្នន័យត្រឹមត្រូវជាក់លាក់ក្នុងរយៈពេល១៣នាទី ឬតិចជាងនេះប្រកបដោយសុក្រឹតភាពខ្ពស់៕