បទបង្ហាញស្តីអំពី "ភាពងាយស្រួលនៃការចុះបញ្ជីយានយន្ត ONLINE” និងការដាក់តាំងបង្ហាញប្រព័ន្ធស្វ័យប្រវត្តិកម្មផ្តល់សេវាដឹកជញ្ជូនផ្លូវគោក និងចែកមួកសុវត្ថិភាព នាថ្ងៃសុក្រ ១២រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៣ ខែកុម្ភៈ ឆ្នាំ២០១៨ នៅអគារសហប្រតិបត្តិការ កម្ពុជា-ជប៉ុន (CJCC) លោកជំទាវ មិន មាណវី អគ្គលេខាធិការ គណៈកម្មការសុវត្ថិភាពចរាចរណ៍ផ្លូវគោក បានផ្តល់កិត្តិយសជាអធិបតីក្នុងកម្មវិធីចែកមួកសុវត្ថិភាព ជូនក្រុមការងារសារព័ត៌មាន និងសិស្សនិស្សិតដែលបានចូលរួមឆ្លើយសំនួរនៅក្នុងកម្មវិធីទ្រឹស្តីនៃការបើកបរ​ “Cambodia Driving Rules” សរុបប្រមាណ ២០០មួក សម្រាប់រយៈពេល ៤ថ្ងៃ (២២-២៥ កុម្ភៈ ២០១៨) ក្នុងកម្មវិធីសាលមហោស្របគីសហ្សូណា។ ជាមួយគ្នានេះផងដែរ មន្ត្រីបច្ចេកទេសជាន់ខ្ពស់របស់ក្រសួង បានធ្វើបទបង្ហាញ ផ្តោតសំខាន់ទៅលើវិធីសាស្ត្រក្នុងការចុះបញ្ជីរថយន្ត ONLINE ដែលប្រជាពលរដ្ឋទូទៅអាចធ្វើការចុះបញ្ជីរថយន្តដោយខ្លួនឯង តាមរយៈ អាសយដ្ឋាន https://vehicle.mpwt.gov.kh មានដំណាក់កាលសំខាន់ៗដូចជា៖ - ជ្រើសរើសលេខពិសេស - ជ្រើសរើសទំហំផ្លាកលេខ - ដាក់ពាក្យស្នើសុំចុះបញ្ជី - ណាត់កាលវិភាគឆៀករថយន្ត - វិធីទូទាត់ប្រាក់សេវាដោយខ្លួនឯង។ ទាញយកបទបង្ហាញ៖ https://goo.gl/nka6My វីដេអូពីវិធីដាក់ពាក្យចុះបញ្ជី៖ https://www.facebook.com/mpwt.gov.kh/videos/826605694190439 ជាមួយនឹងនីតិវិធីដ៏ទំនើបនេះ បានធ្វើអោយប្រជាពលរដ្ឋ មានជម្រើសក្នុងការទទួលបានសេវាចុះបញ្ជីរថយន្ត តាមរូបភាពនៃការបង្ខិតទៅជិតប្រជាពលរដ្ឋ មានភាពងាយស្រួល ចំណាយថវិកាតិច ជាមួយតម្លៃសេវាជាក់លាក់ និងចំណេញពេលវេលា។ កម្មវិធីបទបង្ហាញនេះ ត្រូវបានធ្វើឡើងដោយមានការចូលរួម ពីសិស្ស និស្សិត ប្រមាណ ៣០០នាក់ មកពីគ្រឹះស្ថានសិក្សាក្នុងរាជធានីភ្នំពេញ។ មិនតែប៉ណ្ណោះ ក្រៅពីផ្តល់ចំណេះដឹង កម្មវិធីធ្វើបទបង្ហាញ បានផ្តល់រង្វាន់ជាមួកសុវត្ថិភាព ជូនអ្នកចូលរួមដែលបានឆ្លើយសំណួរ ពាក់ព័ន្ធ នឹងការចុះបញ្ជីរថយន្ត ប្រកបដោយបរិយាកាសសប្បាយរីករាយ ផងដែរ៕