[Rasmei Kampuchea Daily News] - ទេសរដ្ឋមន្ត្រីស៊ុន ចាន់ថុល៖ ដើម្បីអនុវត្តគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ និងប្រែក្លាយជាប្រទេសដែលមានចំណូលខ្ពស់បាន កម្ពុជាត្រូវធ្វើការងារអាទិភាពចំនួនបួន
ដោយៈសុផល/ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមាន ប្រសាសន៍ថា ដើម្បីយើងអនុវត្តគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ និងប្រែក្លាយជាប្រទេសដែលមានចំណូលខ្ពស់បាន យើងត្រូវធ្វើការងារអាទិភាពចំនួនបួនឱ្យបានគឺ ទីមួយ. ត្រូវបញ្ចុះតម្លៃអគ្គិសនីឱ្យនៅកម្រិតទាប ទីពីរ. ត្រូវមានធនធានមនុស្សល្អ ទីបី.ត្រូវបញ្ចុះតម្លៃភស្តុភាកម្ម និងដឹកជញ្ជូន ទីបួន. រៀបចំខេត្តព្រះសីហនុទាំងមូលឱ្យក្លាយជាតំបន់សេដ្ឋកិច្ចពិសេស ដើម្បីទាក់ទាញវិនិយោគឱ្យមកបណ្ដាក់ទុនបង្កើតការងារធ្វើជូនបងប្អូនប្រជាពលរដ្ឋយើង។
លោកទេសរដ្ឋមន្ត្រីបានលើកឡើងដូច្នេះ ក្នុងឱកាសអញ្ជើញជាអធិបតីក្នុងកម្មវិធីតម្រង់ទិសជំនាញសិក្សានិងការងារ នៅវិទ្យាស្ថានតេជោសែន សាធារណការ និងដឹកជញ្ជូន ដែលមានការចូលរួមពីថ្នាក់ដឹកនាំក្រសួង ប្រតិភូរាជរដ្ឋាភិបាលទទួលបន្ទុក ជាប្រធានអគ្គនាយកកំពង់ផែស្វយ័ត វាគ្មិនកិត្តិយស វាគ្មិនក្រសួង សាស្ត្រាចារ្យ បុគ្គលិក សិស្ស-និស្សិត សរុបទាំងអស់ប្រមាណ៥០០រូបកាលពីថ្ងៃទី៦ ខែកម្ភៈ នៅទីស្ដីការក្រសួង។
កម្មវិធីតម្រង់ទិសជំនាញសិក្សា និងការងារនេះធ្វើឡើងដើម្បីផ្ដល់ឱកាសឱ្យសិស្ស-និស្សិត ទទួលបានព័ត៌មានគ្រប់គ្រាន់ និងគ្រប់ជ្រុងជ្រោយ ដើម្បីធ្វើការ សម្រេច ចិត្តជ្រើសរើសជំនាញសិក្សាឱ្យបានត្រឹមត្រូវ និងជាវិថីដ៏ល្អសម្រាប់ឱកាសដើម្បីស្វែងរកការងារបានជោគជ័យនៅពេលបញ្ចប់ការសិក្សា។
លោកទេសរដ្ឋមន្ត្រីានលើកឡើងអំពីគោលបំណងបង្កើតវិទ្យាស្ថានតេជោសែន សាធារណការ និងដឹកជញ្ជូននេះឡើង គឺដើម្បីអភិវឌ្ឍធនធានមនុស្ស បណ្តុះ បណ្តាលវិស្វករកម្ពុជាឱ្យចេះធ្វើផ្លូវ សង់ស្ពានឆ្លងទន្លេ និងប្រព័ន្ធ ហេដ្ឋារចនា សម្ព័ន្ធឱ្យមានគុណភាពរឹងមាំសម្រាប់កូនខ្មែរជំនាន់ក្រោយ និងមានសមត្ថភាពដូចបុព្វបុរសសម័យមុនដែលមានសមត្ថភាពអាចកសាងប្រាង្គប្រាសាទដ៏ស្រស់បំព្រង និងមានគុណភាពរឹងមាំជាប់បានយូររាប់រយឆ្នាំ និងល្បីល្បាញពាសពេញសកលលោកថែមទៀតផង។ វិទ្យាស្ថាននេះ ជាគ្រឹះស្ថានសិក្សាតែមួយគត់នៅកម្ពុជា ដែលផ្តល់ការបណ្ដុះបណ្ដាលជំនាញសាងសង់ផ្លូវ ស្ពាន ដឹកជញ្ជូន និងភស្តុភារកម្មនិងជំនាញជាច្រើនទៀតឱ្យកូនខ្មែរជំនាន់ក្រោយចេះកសាងហេដ្ឋារចនាសម្ព័ន្ធ ដោយខ្លួនឯងប្រកបដោយគុណភាពមិនពឹងលើបរទេស។
លោកទេសរដ្ឋមន្ត្រី បានរំលឹកដល់សិស្ស-និស្សិតនាឱកាសផងដែរថា ក្នុងនាមជាសិស្ស-និស្សិតត្រូវធ្វើខ្លួនជាមនុស្សល្អក្នុងសង្គម និងខិតខំរៀនសូត្រឱ្យកាន់តែខ្លាំងបន្ថែមទៀត និងបានលើកពាក្យស្លោកមួយចំនួនឱ្យសិស្ស-និស្សិតបានយកទៅអនុវត្តដើម្បីប្រែក្លាយជីវិតរបស់ខ្លួនឱ្យមានអនាគតល្អផងដែរ ក្នុងនោះមានពាក្យស្លោកមួយឃ្លាថា៖ “បើអ្នកមិនដឹងថាទៅផ្លូវណា ផ្លូវណាក៏នាំអ្នកទៅទីនោះដែរ” និងបណ្តាពាក្យស្លោកជាច្រើនមួយចំនួនទៀតផងដែរ។
លោកទេសរដ្ឋមន្ត្រី បានជំរុញលើកទឹកចិត្តឱ្យសិស្ស-និស្សិតទាំងអស់ដាក់ពាក្យប្រឡងចូលរៀននៅវិទ្យាស្ថានតេជោសែន សាធារណការ និងដឹកជញ្ជូន ដើម្បីចូលរួមចំណែកក្នុងការអភិវឌ្ឍប្រព័ន្ធហេដ្ឋារចនាសម្ព័ន្ធរូបវន្តរបស់កម្ពុជាឱ្យមានការរីកចម្រើនថែមមួយកម្រិតទៀត។
សូមជម្រាបជូនថា វិទ្យាស្ថានតេជោសែន សាធារណការ និងដឹកជញ្ជូន បានដាក់ចេញចក្ខុវិស័យ ឆ្ពោះទៅកាន់គ្រឹះស្ថានឧត្តមសិក្សាសាធារណៈឈានមុខគេក្នុងការបណ្តុះបណ្តាលធនធានមនុស្សលើវិស័យសាធារណការ និងដឹកជញ្ជូន ប្រកបដោយគុណភាព ការច្នៃប្រឌិត និងសីលធម៌វិជ្ជាជីវៈ និងមានបេសកកម្មបណ្តុះបណ្តាលធនធានមនុស្ស និងស្រាវជ្រាវលើវិស័យសំណង់ស្ពាន ថ្នល់ ប្រព័ន្ធចម្រោះទឹកកខ្វក់ ផ្លូវដែក កំពង់ផែ និងវិស័យដឹកជញ្ជូនផ្លូវគោក ផ្លូវទឹក ផ្លូវសមុទ្រ និងភស្តុភារកម្ម ប្រកបដោយគុណភាព និងប្រសិទ្ធភាពខ្ពស់ដែលមានការទទួលស្គាល់ពីថ្នាក់ជាតិ តំបន់ និងអន្តរជាតិ។វិទ្យាស្ថាននេះក៏ជាគ្រឹះស្ថានអប់រំបណ្ដុះបណ្ដាល និងស្រាវជ្រាវមួយដែលប្រមូលផ្តុំដោយសាស្ត្រាចារ្យល្បីៗ បុគ្គលិកមានសមត្ថភាពនិងសម្ភាររូបវន្ដសម្បូរបែប ដើម្បីអភិវឌ្ឍសិស្ស-និស្សិត ដែលមានសក្ដានុពលខ្ពស់ឱ្យក្លាយជាកម្លាំងចលករយ៉ាងសកម្មក្នុងការចូលរួមចំណែកអភិវឌ្ឍសេដ្ឋកិច្ច និងសង្គមជាតិនាពេលអនាគត។
បច្ចុប្បន្នវិទ្យាស្ថាននេះមាននិស្សិតចំនួន១៩១នាក់កំពុងសិក្សាលើជំនាញចំនួន ៦ក្នុងឯកទេសចំនួន៣ ក្នុងឆ្នាំសិក្សា២០២០-២០២១គឺ៖
១. ឯកទេសសំណង់សាធារណការ៖ ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ ជំនាញប្រព័ន្ធចម្រោះទឹកកខ្វក់។ ២.ឯកទេសគ្រប់គ្រងដឹកជញ្ជូន និងភស្តុភារកម្ម ៖ ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ និង ៣.ឯកទេសនាវាចរណ៍៖ ជំនាញអ្នកបើកបរនាវា និងម៉ាស៊ីននាវា។
សូមបញ្ជាក់ផងដែរថា វិទ្យាស្ថានតេជោសែន សាធារណការ និងដឹកជញ្ជូន កំពុងបើកទទួលពាក្យឱ្យសិស្ស-និស្សិត ដាក់ពាក្យប្រឡងចូលរៀនម្រាប់ឆ្នាំសិក្សា២០២១-២០២២ ចំនួន២០០នាក់ដែលត្រូវផុតកំណត់លែងទទួលពាក្យនៅថ្ងៃទី១១ ខែកុម្ភៈ ឆ្នាំ២០២២ វេលាម៉ោង ៥ល្ងាចជាកំហិត។ ដូច្នេះសិស្ស-និស្សិតដែលជាបេក្ខជនទាំងអស់មកដាក់ពាក្យដើម្បីប្រឡងចូលរៀននៅវិទ្យាស្ថានឱ្យបានទាន់ពេលវេលា៕សរន-PC
