កែប៖ កំពង់ផែទេសចរណ៍កែប-កោះទន្សាយ ដែលស្ថិតក្នុងទីតាំងកំពង់ផែចាស់ក្នុងក្រុងកែប ខេត្តកែប ត្រូវបានជួសជុល និងដាក់សម្ពោធជាផ្លូវការនៅថ្ងៃទី១៩ ខែមករា ក្រោមអធិបតីភាពឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ​ និងដឹកជញ្ជូន។ នេះបើតាមការផ្សាយព័ត៌មានរបស់ក្រសួងសាធារណការ និងដឹកជញ្ជូន។កំពង់ផែទេសចរណ៍កែប-កោះទន្សាយនេះត្រូវបានសាងសង់ឡើងដោយអគ្គនាយកដ្ឋានផ្លូវទឹក ផ្លូវសមុទ្រ និងកំពង់ផែ និងត្រួតពិនិត្យបច្ចេកទេសដោយអគ្គនាយកដ្ឋានបច្ចេកទេសនៃក្រសួងសាធារណការ និងដឹកជញ្ជូន។ កំពង់ផែនេះត្រូវបានចំណោយថវិកាសាងសង់ឡើងវិញចំនួន១,​២លានដុល្លារអាម៉េរិក ដោយសាងសង់តាមរចនាបទទំនើប នៅក្នុងទីតាំងកំពង់ផែចាស់ដែលមានផ្ទៃក្រឡាសរុបចំនួន៣៤៧០ម៉ែត្រការ៉េ និងមានផ្លូវបេតុងចូលផែទំហំ ១៣មx១០០ម និងអគាររដ្ឋបាលទំហំ១០មx៣០ម ដោយរួមបញ្ចូលទាំងអគាររដ្ឋបាលលក់សំបុត្រ និងអគារអ្នកដំណើររង់ចាំ។កំពង់ផែនេះអាចមានសមត្ថភាពទទួលនាវាទេសចរណ៍ធំៗចំនួន៣គ្រឿង ដោយមួយគ្រឿងអាចផ្ទុកមនុស្សចំនួន១៥០នាក់ រួមទាំងអាចទទួលទូកទេសចរណ៍តូចៗមួយចំនួនទៀតផងដែរ។ ជាមួយគ្នានេះ នៅថ្ងៃខាងមុខ កំពង់ផែនេះក៏នឹងអាចទទួលនាវាទេសចរណ៍ច្រើនបន្ថែមទៀតនៅពេលជីកស្តារឃ្លោងផ្លូវនាវាបានជ្រៅរួចរាល់។ ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា សមិទ្ធផលថ្មីនេះអាចនឹងជួយទាក់ទាញភ្ញៀវទេសចរបរទេសឲ្យមកកម្សាន្តលេងនៅកម្ពុជាកាន់តែច្រើន តាមរយៈការសា្តរ និងជួសជុលឡើងវិញនូវហេដ្ឋារចនាសម្ព័ន្ធនានាដូចជា ការចាក់បេតុងកៅស៊ូ ការពង្រីកផ្លូវជាតិលេខ៣៣ ការចាក់ខ្សាច់បន្ថែមនៅឆ្នេរកម្សាន្ត ការរៀបចំប្រព័ន្ធលូរំដោះទឹកភ្លៀង ការធ្វើអាងប្រព្រឹត្តិកម្មចម្រោះទឹកកខ្វក់នៅឆ្នេរលេងទឹក នៅផ្សារក្តាម មានអគ្គិសនីប្រើប្រាស់២៤ម៉ោងលើ២៤ម៉ោង មានទឹកស្អាតប្រើប្រាស់ ការរៀបចំសួនច្បារសាធារណៈ ការដាក់បង្គោលភ្លើងបំភ្លឺតាមដងផ្លូវ និងការធ្វើអនាម័យបរិស្ថាន។ លើសពីនេះ កំពង់ផែទេសចរណ៍កែប-កោះទន្សាយនេះក៏ដើរតួនាទីយ៉ាងសំខាន់ក្នុងការផ្តល់សេវាដឹកជញ្ជូនជូនអតិថិជន ក៏ដូចជាបង្កើតការងារធ្វើ និងបង្កើនជីវភាពរស់ជូនប្រជាពលរដ្ឋនៅក្នុងខេត្តកែបទាំងមូលផងដែរ។ នេះជាការលើកឡើងរបស់ឯកឧត្តម ស៊ុន ចាន់ថុល។ ឯកឧត្តមទេសរដ្ឋមន្ត្រីក្រសួងសាធារណការ បានណែនាំឲ្យអាជ្ញាធរដែនដី ថ្នាក់ដឹកនាំគ្រប់លំដាប់ថ្នាក់ មន្ដ្រីរាជការ ប្រជាពលរដ្ឋ និងក្រុមហ៊ុននានានៅក្នុងខេត្តកែបទាំងអស់ រួមគ្នាជួយថែរក្សា និងអភិវឌ្ឍនៅរមណីយដ្ឋានធម្មជាតិខេត្តកែប។ ជាមួយគ្នានេះឯកឧត្តមបានក្រើនរំលឹកឲ្យអ្នកគ្រប់គ្រងកំពង់ផែ ម្ចាស់ទូក ឬនាវា បំពាក់សម្ភារបរិក្ខារ និងឧបករណ៍ផ្សេងៗឲ្យបានគ្រប់គ្រាន់ និងត្រឹមត្រូវតាមលក្ខណៈបច្ចេកទេស ដើម្បីធានាដល់សុវត្ថិភាពក្នុងពេលធ្វើដំណើររបស់ភ្ញៀវទេសចរ។ រដ្ឋមន្ត្រីក្រសួងសាធារណការបានអះអាងថា នៅថ្ងៃខាងមុខនេះ រាជរដ្ឋាភិបាលនឹងសាងសង់កែលម្អផ្លូវជាតិលេខ៣១ ផ្លូវជាតិលេខ៣៣ ផ្លូវជាតិលេខ៤១ ដើម្បីធ្វើឱ្យហេដ្ឋារចនាសម្ព័ន្ធប្រទាក់ក្រឡាគ្នា និងតភ្ជាប់ខេត្តកែបជាមួយផ្លូវជាតិលេខ៣ ដែលទើបបានសាងសង់ចប់ជាស្ថាពរកាលពីថ្មីៗនេះ។ ជាពិសេស ងាយស្រួលក្នុងការធ្វើដំណើរ និងការដឹកជញ្ជូន កសិផល ឧស្សាហផល៕