លោកជំទាវរដ្ឋលេខាធិការ មឹន មាណវី ដឹកនាំក្រុមការងារសមាគមនារីក្រសួងសាធារណការ និងដឹកជញ្ជូន ចូលរួមសន្និបាតបូកសរុបលទ្ធផលការងារប្រចាំឆ្នាំ២០២១ និងទិសដៅការងារសម្រាប់អនុវត្តបន្តឆ្នាំ២០២២ របស់សមាគមនារីកម្ពុជា ដើម្បីសន្តិភាព និងអភិវឌ្ឍន៍ និងគណៈចលនាស្រ្តី តាមប្រព័ន្ធវីដេអូពីចម្ងាយ ថ្ងៃព្រហស្បតិ៍ ១១កើត ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៣ ខែមករា ឆ្នាំ២០២២ នៅទីស្តីការក្រសួង លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានសមាគមនារីក្រសួងសាធារណការ និងដឹកជញ្ជូន បានអញ្ជើញចូលរួមសន្និបាតបូកសរុបលទ្ធផលការងារប្រចាំឆ្នាំ២០២១ និងទិសដៅការងារសម្រាប់អនុវត្តបន្តឆ្នាំ២០២២ របស់សមាគមនារីកម្ពុជា ដើម្បីសន្តិភាព និងអភិវឌ្ឍន៍ និងគណៈចលនាស្ត្រី តាមប្រព័ន្ធវីដេអូពីចម្ងាយ ក្រោមអធិបតីភាពខ្ពង់ខ្ពស់លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាប្រធានសមាគមនារីកម្ពុជា ដើម្បីសន្តិភាពនិងអភិវឌ្ឍន៍ ដោយមានការចូលរួមដោយផ្ទាល់ពីលោកជំទាវរដ្ឋលេខាធិការ អនុរដ្ឋលេខាធិការ និងលោកស្រីមកពីអង្គភាពពាក់ព័ន្ធក្រោមឱវាទក្រសួងសាធារណការ និងដឹកជញ្ជូន ផងដែរ។ កិច្ចប្រជុំនេះបានប្រព្រឹត្តទៅដោយផ្ដោតជាសំខាន់ទៅលើសកម្មភាព និងលទ្ធផលសម្រេចបានទាក់ទង នឹងការងារនយោបាយ ការងារពង្រឹងរចនាសម្ព័ន្ធចាត់តាំង ការងារសង្គម និងការងារមនុស្សធម៌ការងារ អភិវឌ្ឍន៍ និងការងារទាក់ទងនឹងកិច្ចសហប្រតិបត្តិការផងដែរ។ សូមជម្រាបជូនថា៖ នៅក្នុងឆ្នាំ២០២១កន្លងទៅនេះ គណៈកម្មាធិការសមាគមនារីកម្ពុជា ដើម្បីសន្តិភាព និងអភិវឌ្ឍន៍ថ្នាក់កណ្ដាល គណៈចលនាស្ត្រី គណៈកម្មការសាខាសមាគមនារី និងក្រុមចលនាស្ត្រីគ្រប់ លំដាប់ថ្នាក់ ព្រមទាំងសមាជិកាទាំងអស់ បានយកចិត្តទុកដាក់ក្នុងការដឹកនាំ និងរួមសាមគ្គីគ្នាបំពេញ ភារកិច្ចយ៉ាងសកម្មតាមផែនការសកម្មភាព ដែលបានលើកឡើងប្រកបដោយភាពច្នៃប្រឌិត និងបត់បែន ទៅតាមស្ថានការវិវត្តជាក់ស្តែងរបស់ប្រទេសជាតិ និងអន្តរជាតិ៕