ភ្នំពេញ ថ្ងៃទី២៩ ខែធ្នូ ឆ្នាំ២០២១-- ឯកឧត្តម ហឿន សំនៀង នាយកវិទ្យាស្ថានតេជោ សែន សាធារណការ និងដឹកជញ្ជូន បានមានប្រសាសន៍ថា អ្នកអាចសិក្សានៅសាកលវិទ្យាល័យណាមួយជុំវិញពិភពលោក ប៉ុន្តែសូមកុំភ្លេចសិក្សាឱ្យបានច្រើនលើមុខវិជ្ជាបច្ចេកទេស និងជំនាញរបស់អ្នក ព្រោះវាជាមូលដ្ឋានគ្រឹះសម្រាប់ជីវិតរបស់អ្នក។ ឯកឧត្តមបានមានប្រសាសន៍បែបនេះ នៅក្នុងឱកាសអញ្ជើញជាអធិបតីក្នុងកម្មវិធីការប្រកួតប្រជែងនិយាយ និងអានជាសាធារណៈសម្រាប់និស្សិតជំនាន់ទី១របស់វិទ្យាស្ថាន កាលពីថ្ងៃ៩រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃអង្គារ ទី២៨ ខែធ្នូ ឆ្នាំ២០២១ នៅទីស្ដីការក្រសួង។ ជាមួយគ្នានេះដែរ ឯកឧត្តមនាយក បានគូសបញ្ជាក់អំពីហេតុផលសំខាន់ៗទាក់ទងនឹងការរៀនភាសាអង់គ្លេស ដោយសារតែភាសាអង់គ្លេសជាភាសាសកល ត្រូវបានគេនិយាយច្រើនជាងគេក្នុងពិភពលោក ជាភាសាវិទ្យាសាស្ត្រ កុំព្យូទ័រ ការទូត និងទេសចរណ៍ ដោយបានគូសបញ្ជាក់បន្ថែមទៀតថា ការចេះភាសាអង់គ្លេសបង្កើនឱកាស ក្នុងការទទួលបានការងារល្អនៅក្នុងក្រុមហ៊ុនពហុជាតិនៅកម្ពុជា ឬស្វែងរកការងារធ្វើនៅបរទេស។ ទន្ទឹមនឹងនេះ ឯកឧត្តមនាយកវិទ្យាស្ថាន បានគូសបញ្ជាក់អំពីសារៈសំខាន់ប្រកប ដោយអត្ថន័យនៃការបង្ហាញពីការខិតខំប្រឹងប្រែង និងសក្ដានុពលរបស់និស្សិតចូលរួម ការយកចិត្តទុកដាក់ និងការប្ដេជ្ញាចិត្តខ្ពស់របស់ឯកឧត្តមទេសរដ្ឋមន្ត្រី ស៊ុន ចាន់ថុល លើការ កសាងនិស្សិតវិទ្យាស្ថានតេជោ សែន សាធារណការ និងដឹកជញ្ជូន ឱ្យក្លាយជាធនធានមនុស្សប្រកបដោយសមត្ថភាព និងសក្ដានុពលខ្ពស់ ដើម្បីរួមចំណែកដល់ការអភិវឌ្ឍសង្គមជាតិ និងជាធនធានដ៏អស្ចារ្យ ដែលអាចប្រកួតប្រជែងជាមួយទីផ្សារជាតិ និងអន្តរជាតិនាពេលអនាគតបាន និងមានប្រសាសន៍ជំរុញឱ្យនិស្សិត ដែលបានចូលរួមការប្រកួតព្យាយាមឱ្យអស់ពីសមត្ថភាព ដើម្បីបង្ហាញពីសមត្ថភាព និងការរីកចម្រើនរបស់ខ្លួន។ ជាពិសេស ឯកឧត្តមនាយកបានផ្ដល់ដំបូន្មានល្អៗមួយចំនួន ដល់និស្សិតទាក់ទងនឹងអាកប្បកិរិយា ការទំនាក់ទំនង និងភាពជាអ្នកដឹកនាំ ដោយបានគូសបញ្ជាក់ថា ថ្វីត្បិតតែអ្នកមានជំនាញពូកែ ប៉ុន្តែប្រសិនបើអ្នកមានអាកប្បកិរិយាឆ្គាំឆ្គង មិនចេះវិធីទំនាក់ទំនងអ្នកដទៃបានល្អ និយាយស្តាប់មិនយល់ គំនិតច្របូកច្របល់ ឬមិនមានគោលការណ៍ត្រឹមត្រូវក្នុងការទំនាក់ទំនងល្អជាមួយមនុស្សជុំវិញ តើអ្នកណាអាចទុកចិត្តអ្នកបាន? ហើយប្រសិនបើអ្នកមិនអាចធ្វើការជាមួយអ្នកដទៃ យើងនឹងមិនអាចជោគជ័យលើការងារធំដុំបានឡើយ។ ដូច្នេះនិស្សិតត្រូវមានទាំងជំនាញផ្នែករឹង និងជំនាញផ្នែកទន់ ទើបអាចដឹកនាំការងារ សំ ខាន់ៗបាន៕