កម្មវិធីការប្រកួតប្រជែងនិយាយ និងអានជាសាធារណៈសម្រាប់និស្សិតជំនាន់ទី១របស់វិទ្យាស្ថានតេជោ សែន សាធារណការ និងដឹកជញ្ជូន បានប្រព្រឹត្តទៅក្រោមអធិបតីភាពឯកឧត្តម ហឿន សំនៀង នាយកវិទ្យាស្ថាន ថ្ងៃអង្គារ ៩រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវថ្ងៃទី២៨ ខែធ្នូ ឆ្នាំ២០២១ នៅទីស្ដីការក្រសួង ឯកឧត្តម ហឿន សំនៀង នាយកវិទ្យាស្ថានតេជោ សែន សាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីការប្រកួតប្រជែងនិយាយ និងអានជាសាធារណៈសម្រាប់និស្សិតជំនាន់ទី១របស់វិទ្យាស្ថាន ដោយមានការចូលរួមពីថ្នាក់ដឹកនាំវិទ្យាស្ថាន គណៈគ្រប់គ្រង សាស្ត្រាចារ្យ និស្សិត និងក្រុមការងារជំនាញក្រោមឱវាទវិទ្យាស្ថានផងដែរ។ ថ្លែងក្នុងសុន្ទរកថាបើកកម្មវិធី ឯកឧត្តមនាយកវិទ្យាស្ថាន បានគូសបញ្ជាក់ពីសារសំខាន់ប្រកបដោយអត្ថន័យនៃការបង្ហាញពីការខិតខំប្រឹងប្រែង និងសក្ដានុពលរបស់និស្សិតចូលរួម និងបានជំរុញឱ្យនិស្សិតដែលបានចូលរួមការប្រកួតព្យាយាមឱ្យអស់ពីសមត្ថភាព ដើម្បីបង្ហាញពីសមត្ថភាព និងការរីកចម្រើនរបស់ខ្លួន។ បន្ថែមពីលើនេះ ឯកឧត្តម បានលើកឡើងផងដែរអំពីការយកចិត្តទុកដាក់ និងការប្ដេជ្ញាចិត្តខ្ពស់របស់ឯកឧត្តមទេសរដ្ឋមន្ត្រី ស៊ុន ចាន់ថុល លើការកសាងនិស្សិតវិទ្យាស្ថានតេជោ សែន សាធារណការ និងដឹកជញ្ជូនឱ្យក្លាយជាធនធានមនុស្សប្រកបដោយសមត្ថភាព និងសក្ដានុពលខ្ពស់ ដើម្បីរួមចំណែកដល់ការអភិវឌ្ឍសង្គមជាតិ និងជាធនធានដ៏អស្ចារ្យ ដែលអាចប្រកួតប្រជែងជាមួយទីផ្សារជាតិ និងអន្តរជាតិនាពេលអនាគតបាន។ ឆ្លៀតក្នុងឱកាសនោះ ឯកឧត្តមនាយកវិទ្យាស្ថាន បានលើកឡើងនូវហេតុផលសំខាន់ៗទាក់ទងនឹងការរៀនភាសាអង់គ្លេស ដែលក្នុងនោះរួមមានភាសាអង់គ្លេសជាភាសាសកល ត្រូវបានគេនិយាយច្រើនជាងគេក្នុងពិភពលោក ជាភាសាវិទ្យាសាស្ត្រ កុំព្យូទ័រ ការទូត និងទេសចរណ៍ និងបានសង្កត់ធ្ងន់ថាការចេះភាសាអង់គ្លេសបង្កើនឱកាសក្នុងការទទួលបានការងារល្អនៅក្នុងក្រុមហ៊ុនពហុជាតិនៅកម្ពុជា ឬស្វែងរកការងារធ្វើនៅបរទេស ហើយសំខាន់ជាងនេះទៅទៀត អ្នកអាចសិក្សានៅសកលវិទ្យាល័យណាមួយជុំវិញពិភពលោក ប៉ុន្តែសូមកុំភ្លេចសិក្សាឱ្យបានច្រើនលើមុខវិជ្ជាបច្ចេកទេស និងជំនាញរបស់អ្នក ព្រោះវាជាមូលដ្ឋានគ្រឹះសម្រាប់ជីវិតរបស់អ្នក។ ជាមួយគ្នានោះ ឯកឧត្តម បានផ្ដល់ដំបូន្មានល្អៗមួយចំនួនដល់និស្សិតទាក់ទងនឹងអាកប្បកិរិយា ការទំនាក់ទំនង និងភាពជាអ្នកដឹកនាំ។ ឯកឧត្តមបានមានប្រសាសន៍ថា ថ្វីត្បិតតែអ្នកមានជំនាញពូកែ ប៉ុន្តែប្រសិនបើអ្នកមានអាកប្បកិរិយាឆ្គាំឆ្គង មិនចេះវិធីទំនាក់ទំនងអ្នកដទៃបានល្អ និយាយស្តាប់មិនយល់ គំនិតច្របូកច្របល់ ឬមិនមានគោលការណ៍ត្រឹមត្រូវក្នុងការទំនាក់ទំនងល្អជាមួយមនុស្សជុំវិញ តើអ្នកណាអាចទុកចិត្តអ្នកបាន? ហើយប្រសិនបើអ្នកមិនអាចធ្វើការជាមួយអ្នកដទៃ យើងនឹងមិនអាចជោគជ័យលើការងារធំដុំបានឡើយ។ ដូច្នេះនិស្សិតត្រូវមានទាំងជំនាញផ្នែករឹង និងជំនាញផ្នែកទន់ ទើបអាចដឹកនាំការងារសំខាន់ៗបាន៕