នៅរសៀលថ្ងៃចន្ទ ១៤រោច ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៥ ខែវិច្ឆិកា ឆ្នាំ២០២១ និស្សិតនៃវិទ្យាស្ថានតេជោសែន សាធារណការ និងដឹកជញ្ជូន ចំនួន២០រូប បានចូលរួមវគ្គបណ្តុះបណ្តាលស្តីពី Green Mobility and Innovative Data Techniques ដែលរៀបចំឡើងដោយធនាគារពិភពលោក World Bank ដែលមានរយៈពេលចំនួន០២ថ្ងៃគឺនៅថ្ងៃ០៨ ខែវិច្ឆិកា ឆ្នាំ២០២១ និងថ្ងៃទី១៥ ខែវិច្ឆិកា ឆ្នាំ២០២១ តាមរយៈប្រព័ន្ធអនឡាញ។ និស្សិតនៃវិទ្យាស្ថានតេជោសែន សាធារណការ និងដឹកជញ្ជូន បានចូលរួមសិក្សារៀនសូត្រយ៉ាងសកម្ម ក្នុងវគ្គបណ្តុះបណ្តាល ស្តីពី Green Mobility and Innovative Data Techniques ដែលវគ្គបណ្តុះបណ្តាលនេះធ្វើឡើងក្នុងគោលបំណងផ្តល់ចំណេះដឹងដល់និស្សិត ក៏ដូចជាសិក្សាស្វែងយល់អំពីការកាត់បន្ថយនូវការប្រើប្រាស់មធ្យោបាយធ្វើដំណើរផ្ទាល់ខ្លួន ការរៀបចំហេដ្ឋារចនាសម្ព័ន្ធទីក្រុង និងបច្ចេកទេសវិភាគទិន្នន័យប្រកបដោយនវានុវត្តន៍។ សូមបញ្ជាក់ផងដែរ ធនាគារពិភពលោកកំពុងដឹកនាំការសិក្សាដើម្បីបង្កើតយុទ្ធសាស្ត្រនៃការធ្វើដំណើរលើកកម្ពស់ស្ថានភាពបៃតង នៅខេត្តសៀមរាប ដោយផ្តោតលើការធ្វើដំណើរថ្មើរជើង ជិះកង់ និងការធ្វើដំណើរដោយមធ្យោបាយសាធារណៈ ដើម្បីគាំទ្រដល់ការអភិវឌ្ឍទីក្រុងប្រកបដោយចីរភាព។ ការសិក្សានេះត្រូវបានផ្តួចផ្តើមឡើងនៅក្នុងខែកញ្ញា ឆ្នាំ២០២០ ហើយថ្មីៗនេះ ក្រុមការងារបានបង្កើតផែនការយុទ្ធសាស្ត្រនៃការធ្វើដំណើរលើកកម្ពស់ស្ថានភាពបៃតងរបស់ខេត្តសៀមរាប ជាមួយផែនការវិនិយោគដឹកជញ្ជូនដ៏សមស្របមួយ។ គោលដៅសំខាន់មួយនៃការសិក្សារបស់ធនាគារពិភពលោកគឺការកសាងសមត្ថភាព និងការអភិវឌ្ឍជំនាញកម្រិតថ្នាក់មូលដ្ឋាន ដើម្បីធានាថាការអនុវត្ត ការធ្វើដំណើរលើកកម្ពស់ស្ថានភាពបៃតង ត្រូវបានសម្របសម្រួលទាំងពេលនេះ និងទៅអនាគត ហើយនិងដើម្បីលើកកម្ពស់ចំណាប់អារម្មណ៍ និងភាពស្វះស្វែងក្នុងការចូលរួមលើកតម្កើង ការធ្វើដំណើរ និងលើកកម្ពស់ស្ថានភាពបៃតង។ ដូចនេះ ធនាគារពិភពលោក កំពុងនឹងរៀបចំធ្វើវគ្គបណ្តុះបណ្តាលជាបន្តបន្ទាប់តាមរយៈ ក្រុមពិគ្រោះយោបល់ផ្នែកស្រាវជ្រាវ ដោយផ្តោតសំខាន់លើការរៀបចំផែនការដឹកជញ្ជូននៅក្នុងទីក្រុង ប្រព័ន្ធបច្ចេកវិទ្យាចល័យ ក៏ដូចជា បច្ចេកទេសវិភាគទិន្នន័យប្រកបដោយភាពច្នៃប្រឌិត។