ឯកឧត្តមរដ្ឋលេខាធិការប្រចាំការ តូច ចាន់កុសល តំណាងដ៍ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល ដឹកនាំកិច្ចប្រជុំគណៈកម្មការសម្របសម្រួលរួម "Joint Coordinating Committee" លើកទី២ នៃ គម្រោងអភិវឌ្ឍន៍សមត្ថភាពលើការគ្រប់គ្រងប្រព័ន្ធលូទឹកកខ្វក់របស់រដ្ឋបាលរាជធានីភ្នំពេញ និង ក្រសួងសាធារណការ និងដឹកជញ្ជូន ថ្ងៃចន្ទ ១១រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០១ ខែវិច្ឆិកា ឆ្នាំ២០២១ នៅទីស្តី ក្រសួង ឯកឧត្តម តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូន តំណាងដ៍ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំកិច្ចប្រជុំគណៈកម្មការសម្របសម្រួលរួម "Joint Coordinating Committee" លើកទី២ នៃគម្រោងអភិវឌ្ឍន៍សមត្ថភាពលើការគ្រប់គ្រងប្រព័ន្ធលូទឹកកខ្វក់របស់រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន ដោយមានការចូលរួមតាមប្រព័ន្ធវីដេអូពីចម្ងាយ និងការចូលរួមដោយផ្ទាល់ពីថ្នាក់ដឹកនាំក្រសួងទទួលបន្ទុក ឯកឧត្តមឯកអគ្គរដ្ឋទូតជប៉ុនប្រចាំកម្ពុជា ឯកឧត្តម ស៊ុយ សេរិទ្ធ ឯកឧត្តម នួន ផារ័ត្ន អភិបាលរងរាជធានីភ្នំពេញ តំណាងក្រសួង-ស្ថាប័ន ពាក់ព័ន្ធ ក្រុមជំនាញការទីភ្នាក់ងារសហប្រតិបត្តិការអន្តរជាតិជប៉ុន (JICA) សមភាគីដែលជាសមាជិករបស់គម្រោង និងមន្ត្រីជំនាញពាក់ព័ន្ធក្រោមឱវាទក្រសួងសាធារណការ និងដឹកជញ្ជូន និងភាគីពាក់ព័ន្ធផងដែរ។ អង្គប្រជុំបានផ្តោតការពិភាក្សាលើមេរៀន និងបទពិសោធន៍នៃការគ្រប់គ្រងប្រព័ន្ធលូទឹកកខ្វក់ពីប្រទេសផ្សេងៗដូចជា៖ ប្រទេសថៃ វៀតណាម និងប្រទេសជប៉ុន ស្ថានភាពនៃការអនុវត្តគម្រោងគ្រប់គ្រងទឹកកខ្វក់ ក្រោមកិច្ចសហការរវាងក្រសួងសាធារណការ និងដឹកជញ្ជូននិងដៃគូអភិវឌ្ឍន៍នានារួមមាន៖ ទីភ្នាក់ងារសហប្រតិបត្តិការអន្តរជាតិជប៉ុន(JICA) ធនាគារពិភពលោក ធនាគារអភិវឌ្ឍន៍អាស៊ី មូលនិធិសហប្រតិបត្តិការអភិវឌ្ឍន៍សេដ្ឋកិច្ច(EDCF)នៃសាធារណរដ្ឋកូរ៉េ ជំនួយពីរដ្ឋាភិបាលអូស្ត្រាលី និងគម្រោង អនុវត្តក្រោមហិរញ្ញប្បទានថវិកាជាតិ របាយការណ៍អំពីទឹកជំនន់ក្នុងរាជធានីភ្នំពេញ និងផែនការអនាគត ផងដែរ។ អង្គប្រជុំបង្ហាញពីវឌ្ឍនភាពនៃការរៀបចំសេចក្តីព្រាងច្បាប់ទឹកកខ្វក់និងប្រេព័ន្ឋលូ និងគោលការណ៍ណែនាំលើការគ្រប់គ្រងប្រព័ន្ឋលូទឹកកខ្វក់ ព្រមទាំងរំលេចពីសុគតភាពទាក់ទងនឹងគោលនយោបាយថ្នាក់ជាតិ និងយុទ្ធសាស្ត្រឆ្នាំ២០១៩-២០២៣ ដើម្បីបន្តសាងសង់អាងប្រព្រឹត្តកម្មចម្រោះទឹកកខ្វក់នៅតាមទីក្រុង ទីប្រជុំជនសំខាន់ៗក្នុងការជំរុញកំណើនសេដ្ឋកិច្ចនិងទេសចរណ៍ ធានាបាននូវបរិស្ថានស្អាតនិងសុខុមាលភាពរបស់ប្រជាជន បន្តសហការជាមួយដៃគូអភិវឌ្ឍន៍ អង្គការអន្តរជាតិ និងក្រុមហ៊ុនឯកជនក្នុងការចូលរួមការវិនិយោគលើវិស័យទឹកសំណល់ (ទឹកកខ្វក់ និងប្រព័ន្ធលូការពារទឹកជំនន់) និងទីលានចាក់សម្រាម និងអនុវត្តផែនការមេសម្រាប់ កែលម្អទឹកកខ្វក់ និងប្រព័ន្ធលូទូទាំងប្រទេស។ ថ្លែងទៅកាន់អង្គប្រជុំនាឱកាសនោះ ឯកឧត្តមរដ្ឋលេខាធិការប្រចាំការ បានគូសបញ្ជាក់អំពីការយកចិត្តទុក ដាក់ខ្ពស់របស់រាជរដ្ឋាភិបាលកម្ពុជាក្នុងការបង្កើតផែនការមេហេដ្ឋារចនាសម្ព័ន្ធសម្រាប់ទីក្រុងធំៗ និង តំបន់ទីក្រុង ដើម្បីគាំទ្រដល់ការអភិវឌ្ឍផ្លូវថ្នល់ ផ្លូវដែក និងផ្លូវទឹក ក៏ដូចជា៖ បណ្តាញអគ្គិសនី ជាពិសេស ផ្តោតលើការអភិវឌ្ឍបណ្តាញលូនិងប្រព័ន្ធចម្រោះទឹកកខ្វក់ ដើម្បីលើកកម្ពស់សោភ័ណ្ឌភាព សុខុមាលភាពសាធារណៈ ការផ្តល់សេវាសាធារណៈ និងលើកកម្ពស់កម្រិតជីវភាពប្រជាពលរដ្ឋឱ្យកាន់តែប្រសើរឡើងថែមទៀត។ ជាមួយគ្នានោះផងដែរ ឯកឧត្តម ស៊ុយ សេរិទ្ធ អភិបាលរងរាជធានីភ្នំពេញ បានលើកឡើងអំពីការបញ្ចប់គម្រោងការពារទឹកជំនន់និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហ៊ានទី៤ ស្ថិតក្រោមក្របខ័ណ្ឌហិរញ្ញប្បទានឥតសំណងរបស់រដ្ឋាភិបាលជប៉ុនក្នុងទឹកប្រាក់ប្រមាណ៣៤លានលានដុល្លារអាមេររិក ដើម្បីសាងសង់បណ្តាញលូនៅក្នុងភូមិសាស្ត្រខណ្ឌទួលគោក និងខណ្ឌដូនពេញ អាងស្តុកទឹកក្រោមដី និងស្ថានីយ៍បូមទឹក ដែលបានធ្វើឱ្យភូមិសាស្ត្រខណ្ឌទួលគោកនិងខ័ណ្ឌដូនពេញដូចជា៖ នៅម្តុំជិត ព្រះបរមរាជវាំង ផ្សារថ្មី និងផ្សារកណ្ដាលជាដើម លែងមានការលិចលង់ដោយជំនន់ទឹកភ្លៀងដូចកាលកន្លងមក ហើយបន្ថែមពីលើនេះ ឯកឧត្តមក៏បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និង ប្រជាជនជប៉ុន ដែលបានផ្តល់ជំនួយហិរញ្ញវត្ថុ និងបច្ចេកទេសសំដៅអនុវត្តគម្រោងនេះបានជោគជ័យ៕