ខេត្តប៉ៃលិន ៖ ផ្លូវក្រាលក្រួសក្រហម២ខ្សែ ប្រវែងប្រមាណ៥០គីឡូម៉ែត្រ ដែលជារៀងរាល់ឆ្នាំ ឱ្យតែដល់រដូវភ្លៀងធ្លាក់ជោកជាំម្តងៗ តែងទទួលរងការខូចខាត ក្លាយទៅជាជង្ហក់ តូចធំ លំបាកក្នុងការបើកបរម៉ូតូ ឬរថយន្តចេញ ចូល ទៅ មក ជាពិសេសខណ:ពេលមានករណីជំនន់ទឹកភ្លៀងកើតឡើងនៅរដូវវស្សាម្តងៗ ធ្វើឱ្យទឹកហូរកាត់ផ្លូវរងការខូចខាត និងលិចលង់ផ្ទះសម្បែងថែមទាំងផលដំណាំប្រជាពលរដ្ឋផងដែរ។ តែរហូតមកដល់ពេលនេះ ខាងរដ្ឋបាលខេត្តប៉ៃលិន សហការជាមួយមន្ទីរសាធារណការ និងដឹកជញ្ជូនខេត្ត បានយកគ្រឿងចក្រទៅធ្វើការឈូសឆាយ ដើម្បីដាក់ប្រព័ន្ធលូបន្ថែម និងក្រាលកៅស៊ូ បង្កភាពងាយស្រួលក្នុងការធ្វើដំណើរចេញចូលទៅមក ។ ក្រោមការដឹកនាំ លោកស្រី បាន ស្រីមុំ អភិបាល នៃគណៈអភិបាលខេត្តប៉ៃលិន បានរៀបចំហេដ្ឋារចនាសម្ព័ន្ធនានា ជាពិសេសផ្លូវថ្នល់ដែលជាសរសៃឈាមយ៉ាងសំខាន់ ក្នុងការដឹកជញ្ជូន កសិផលនានា ដែលប្រជាកសិករផលិតបាន។ ជាក់ស្តែងដើម្បីជាការសម្រួលរបស់បងប្អូនប្រជាពលរដ្ឋ លោកស្រី បានចាត់ឱ្យក្រុមការងារ ជួសជុល ផ្លូវក្រាលក្រួសក្រហម២ខ្សែ ដែល១ខ្សែ ចាប់ពីចំណុចបំបែកផ្លូវជាតិលេខ៥៧ ក្នុងភូមិទំនប់ រហូតដល់ចំណុចផ្សារឃែរ ក្នុងឃុំស្ទឹងត្រង់ ស្រុកសាលាក្រៅ ហើយ១ខ្សែទៀត ចាប់ពីផ្សារឃែរ ក្នុងភូមិដីស ឃុំស្ទឹងត្រង់ ស្រុកសាលាក្រៅ រហូតដល់ចំណុចសួស្តី ក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ឱ្យទៅជាផ្លូវក្រាលកៅស៊ូ ។ លោក យ៉ាន អ៊ិត នាយកទីចាត់ការផែនការ និងវិនិយោគនៃសាលាខេត្តប៉ៃលិន បានឱ្យភ្នាក់ងារយើងដឹងថា ប្រជាពលរដ្ឋ រស់នៅក្នុងស្រុកសាលាក្រៅ នឹងលែងបារម្ភក្រែងជំនន់ទឹកភ្លៀង លិចលង់ផ្លូវថ្នល់ទៀតហើយ ដោយរដ្ឋបាល ខេត្ត ដែលមានលោកស្រី បាន ស្រីមុំ បានចាត់ឱ្យក្រុមការងារយកគ្រឿងចក្រ ទៅឈូសឆាយរៀបចំធ្វើប្រព័ន្ធលូបង្ហូរទឹក ឆ្លងកាត់ផ្លូវថ្នល់ និងក្រាលកៅស៊ូ ដោយសហការជាមួយមន្ទីរសាធារណការ និងដឹកជញ្ជូនខេត្ត ។ លោកបន្តទៀតថា ការធ្វើផ្លូវទាំង២ខ្សែខាងលើនេះ មានប្រវែងប្រមាណ៥០គីឡូម៉ែត្រ ដោយចាប់ផ្តើមស្ថាបនាអស់រយ:ពេល២ខែមកហើយ ដែលក្នុងគម្រោងផ្លូវនេះមានទទឹងប្រវែង៨ម៉ែត្រ មានផ្លូវក្រាលក្រួសក្រហមសងខាងផ្លូវប្រវែង១០ម៉ែត្រ ក៏មានការឈូសឆាយធ្វើប្រព័ន្ធលូជាច្រើនកន្លែងបន្ថែមទៀត ដើម្បីកុំឱ្យមានបញ្ហាស្ទះទឹកលិចផ្លូវ ឬផ្ទះប្រជាពលរដ្ឋ ពេលមានករណីជំនន់ទឹកភ្លៀងម្តងៗ ។ លោកបញ្ជាក់ទៀតថា ការធ្វើផ្លូវទាំងពីរខ្សែខាងលើនេះ ក្នុងកុងត្រា មានរយ:ពេលកំណត់ត្រឹម៦ទៅ៩ខែប៉ុណ្ណោះ គឺធ្វើយ៉ាងណាឱ្យរួចរាល់ទាន់ពេលវេលា អាចប្រើប្រាស់ក្នុងការធ្វើដំណើរ និងដឹកជញ្ជូនកសិផលចេញពីចំការយកទៅលក់ដូរនៅតាមស្តង់ បានយ៉ាងឆាប់រហ័សផងដែរ ៕