ភ្នំពេញ៖ បន្ទាប់ពីឧប្បត្តិហេតុគ្រោះថ្នាក់ចរាចរណ៍រវាងរថភ្លើងនិងរថយន្តសាំងយ៉ុងនៅវាលរិញស្ថិតក្នុងស្រុកព្រៃនប់ ខេត្តព្រះសីហនុ កាលពីថ្ងៃទី១៣ ខែតុលា ឆ្នាំ២០២១ម្សិលមិញ ពេលនេះត្រូវបានដោះស្រាយបញ្ចប់រួចរាល់ហើយនៅវេលាព្រឹកថ្ងៃទី១៤ ខែតុលា ឆ្នាំ២០២១នេះ។ នេះបើយោងតាមប្រសាសន៍របស់ឯកឧត្តម គង់ វិមាន អនុរដ្ឋលេខាធិការនិងជានាយកខុទ្ទកាល័យឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ដែល The Mirror News ទើបទទួលបាននៅមុននេះបន្តិច។ ឯកឧត្តម គង់ វិមាន បានបញ្ជាក់ថា ករណីនេះ សមត្ថកិច្ចមិនបានធ្វើការឃាត់ខ្លួនអ្នកបើកបររថភ្លើងនោះទេ បច្ចុប្បន្នអ្នកបើកបររថភ្លើងក៏បានវិលត្រឡប់ទៅគេហដ្ឋានរបស់គាត់វិញហើយដែរ។ សូមបញ្ជាក់ថា ករណីគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង០៦និង០០នាទី ថ្ងៃទី១៣ ខែតុលា ឆ្នាំ២០២១ម្សិលមិញនេះ នៅចំណុចផ្លូវរថភ្លើងឆ្លងកាត់ផ្លូវជាតិលេខ៤ ចន្លោះគីឡូម៉ែត្រលេខ ១៨១-១៨២ ស្ថិតក្នុងភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ៕