ក្រសួងសាធារណការ និងដឹកជញ្ជូន បានបង្ហាញគម្រោងសិក្សាផ្លូវរថភ្លើង តភ្ជាប់ទៅកាន់កំពង់ផែស្វយ័តភ្នំពេញ ស្ថិតនៅស្រុកកៀនស្វាយ ខេត្តកណ្តាល ដើម្បីផ្តល់ភាពងាយស្រួលក្នុងការដឹកជញ្ជូនទំនិញ និងជំរុញកំណើនសេដ្ឋកិច្ច។​ គម្រោងនេះត្រូវបានលើកឡើង នៅគ្រាដែលចំនួនកុងតឺន័រឆ្លងកាត់កំពង់ផែស្វយ័តភ្នំពេញកើនឡើង។ ថ្លែងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការ ហេដ្ឋារចនាសម្ព័ន្ធចំណតផែកុងតឺន័រ LM១៧ ជំហានទី៣ ដំណាក់កាលទី១ របស់ កំពង់ផែស្វយ័តភ្នំពេញ នៅព្រឹកថ្ងៃទី២០ ខែកញ្ញា ឯកឧត្តម ទេសរដ្ឋមន្ត្រី ស៊ុន ចាន់ថុល បានណែនាំ ឱ្យមន្រ្តីជំនាញពាក់ព័ន្ធ សិក្សាផ្លូវដែក តភ្ជាប់មកកំពង់ផែស្វយ័តភ្នំពេញ ។ ឯកឧត្តម ទេសរដ្ឋមន្ត្រី ស៊ុន ចាន់ថុល ថ្លែងថា៖ “ត្រូវតែពិចារណាសិក្សាមើលការតភ្ជាប់ពីផ្លូវដែករបស់យើងនេះ ដែលមានស្រាប់មកកំពង់ផែបានឬមិនបាន ឬតភ្ជាប់ទៅតំបន់សេដ្ឋកិច្ចពិសេស ដែលកំពង់ផែស្វយ័ត មានទីតាំងរបស់ខ្លួន» ។ បន្ថែមពីលើនេះ ឯកឧត្តម​ ស៊ុន ចាន់ថុល បានស្នើមន្រ្តីពិនិត្យលើកការជួសជុលផ្លូវដែកតភ្ជាប់ទៅគីឡូលេខ៦ ក្នុងខណ្ឌឬស្សីកែវ ឡើងវិញ ដែលជាចំណតផែរណប ដើម្បីបម្រើសេវាកម្មដឹកជញ្ជូនសាធារណៈ កាត់បន្ថយភាពកកស្ទះចរាចរណ៍។