ថ្ងៃព្រហស្បតិ៍ ១០កើត ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៦ ខែកញ្ញា ឆ្នាំ២០២១ នៅទីស្ដីការក្រសួង ឯកឧត្ដម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម នៃក្រសួងសាធារណការ និងដឹកជញ្ជូន និងជាប្រធានឧត្តមមន្ត្រីដឹកជញ្ជូនកម្ពុជា បានអញ្ជើញដឹកនាំគណៈប្រតិភូចូលរួមសិក្ខាសាលាស្តីពី៖ "ការអភិវឌ្ឍច្រករបៀងដឹកជញ្ជូន និងចក្ខុវិស័យសម្រាប់ការធ្វើឱ្យប្រសើរឡើងនៃការដឹកជញ្ជូនក្នុងចំណោមប្រទេស CICA" ក្រោមក្របខណ្ឌសន្និសីទប្រទេស CICA (វិធានការកសាងអន្តរកម្មនិងទំនុកចិត្តនៅអាស៊ី)។ សិក្ខាសាលានេះរៀបចំឡើងដោយក្រសួងឧស្សាហកម្ម និងអភិវឌ្ឍន៍ហេដ្ឋារចនាសម្ព័ន្ធ នៃសាធារណរដ្ឋ Kazakhstan ដោយមានការចូលរួមតាមប្រព័ន្ធវីដេអូពីចម្ងាយពីតំណាងអង្គការអន្តរជាតិនានា និងតំណាងស្ថាប័នទាំងឡាយអញ្ជើញមកពីវិស័យដឹកជញ្ជូន នៃរដ្ឋជាសមាជិក CICA។ សិក្ខាសាលានេះផ្តោតលើរបៀបវារៈសំខាន់ៗមួយចំនួនរួមមាន៖ ១) វិធានការឆ្លើយតបបញ្ហាប្រឈមថ្មីៗ របស់រដ្ឋរបស់សមាជិក CICA នៅក្នុងឧស្សាហកម្មដឹកជញ្ជូនក្នុងបរិបទនៃជំងឺរាតត្បាតជាសកល ២) បង្កើនប្រសិទ្ធភាពដំណើរការដឹកជញ្ជូន ដើម្បីលើកកម្ពស់គុណភាពនៃការដឹកជញ្ជូន និងកាត់បន្ថយថ្លៃ ដើមដឹកជញ្ជូន ៣) បង្កើនភាពទាក់ទាញនៃច្រករបៀងដឹកជញ្ជូនអន្តរជាតិរបស់ CICA ៤) ទស្សនវិស័យ សម្រាប់កិច្ចសហប្រតិបត្តិការរវាងរដ្ឋជាសមាជិក CICA និងសកម្មភាពរួមគ្នាក្នុងវិស័យដឹកជញ្ជូន។ តាមរយៈសិក្ខាសាលានេះ ឯកឧត្តម អគ្គនាយក បានចែករំលែកអំពី៖ (១) រចនាសម្ព័ន្ធគ្រប់គ្រងនៅក្នុងផ្នែកភស្តុភារកម្មនៅកម្ពុជា, (២) ការអភិវឌ្ឍនផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និង (៣) ការអនុវត្តផែនការមេភស្តុភារកម្ម ៕