::: ការចុះត្រួតពិនិត្យបច្ចេកទេស ការងារស្ថាបនា ជួសជុល និងថែទាំ ហេដ្ឋារចនាសម្ព័ន្ធផ្លូវថ្នល់ ដែលកំពុងសាងសង់ ដើម្បីធ្វើយ៉ាងណាទទួលបានគុណភាពតាមស្តងដារបច្ចេកទេសត្រឹមត្រូវ និងប្រើប្រាស់បានយូរ នៅថ្ងៃទី០៥ - ០៦ ខែសីហា ឆ្នាំ២០២១ ក្រុមការងារបច្ចេកទេសដែលដឹកនាំដោយ ឯកឧត្តម ហ៊ាង វុត្ថា អគ្គនាយកបច្ចេកទេស ដោយមានការចូលរួមពីគ្រប់អង្គភាពពាក់ព័ន្ធ និងក្រុមការងារបច្ចេកទេស ក្រោមឱវាទអគ្គនាយកដ្ឋានបច្ចេកទេស ចុះពិនិត្យតាមដានវឌ្ឍនភាព ការងារស្ថាបនា ជួសជុល និងថែទាំហេដ្ឋារចនាសម្ព័ន្ធផ្លូវថ្នល់ និងត្រួតពិនិត្យលើបច្ចេកទេស សាងសង់។ ក្នុងដំណើរបេសកកម្មនេះ ក្រុមការងារបច្ចេកទេសបានធ្វើការត្រួតពិនិត្យគម្រោងដែលស្ថិតក្នុងភូមិសាស្រ្តខេត្តរតនគិរី ស្ទឹងត្រែង និងខេត្តក្រចេៈ ដោយក្នុងនោះរួមមានគម្រោងសាងសង់ផ្លូវ ប្រភេទដីល្បាយក្រួស កៅស៊ូDBST និងការងារសាងសង់ស្ពានបេតុងផងដែរ ដែលការងារទាំងនេះ អនុវត្តដោយ មន្ទីរសាធារណការ និងដឹកជញ្ជូនខេត្តរតនគិរី ស្ទឹងត្រែង ក្រចេះ និងអង្គភាពវិស្វកម្មក្រសួងការពារជាតិ។ តាមរយៈការចុះពិនិត្យដល់ទីតាំងអនុវត្តការងារសាងសង់ជាក់ស្តែង ឯកឧត្តមអគ្គបច្ចេកទេស បានណែនាំគ្រប់អង្គភាពអនុវត្តគម្រោង ត្រូវយកចិត្តទុកដាក់លើការងារដែលកំពុងអនុវត្ត ធ្វើយ៉ាងណារក្សាឲ្យបាននូវគុណភាព ប្រសិទ្ធភាព ស្របតាមបទដ្ឋានបច្ចេកទេស និងត្រឹមត្រូវតាមកិច្ចសន្យាគម្រោង ដោយធានាបាននូវការប្រើប្រាស់បានយូរអង្វែង ។