ភ្នំពេញ ៖ ក្រសួងសាធារណការ និងដឹកជញ្ជូន បានរំឭកជាថ្មីអំពីការផ្អាកដំណើរការមណ្ឌលផ្តល់សេវា​​សាធារណៈ​​ក្នុងរយៈពេល២សប្តាហ៍ ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩ ។ យោងតាម ហ្វេសប៊ុកផ្លូវការរបស់ក្រសួងសាធារណការ និងដឹកជញ្ជូន បានឱ្យដឹងថា មណ្ឌលផ្តល់សេ​​វាសាធារណៈ នៅទីស្តីការក្រសួង និងផ្សារហេរីថេកវ៉ក ខេត្តសៀមរាប ផ្អាកដំណើរការជាបណ្តោះអាសន្ន​​១៤ថ្ងៃ និងមណ្ឌលនៅផ្សារទំនើបអ៊ីអន១ អ៊ីអន២ និងជីបម៉ុង ណូរ៉ូម៉ល ត្រូវបានផ្លាស់ប្តូរម៉ោងផ្តល់សេ​​វា៩ព្រឹក ដល់៨យប់ ។ ក្រសួងសាធារណការ និងដឹកជញ្ជូន បន្តថា ដើម្បីចូលរួមទប់ស្តាត់ការរីករាលដាលជំងីកូវីដ-១៩ មណ្ឌលផ្តល់សេវាសាធារណៈ ក្រសួងសាធារណការ និងដឹកជញ្ជូន នឹងធ្វើការផ្អាកជាបណ្តោះអាសន្ន និងផ្លាស់ប្តូរពេលវេលាផ្តល់សេវាដូចជា ផ្អាកដំណើរការ ជាបណ្តោះអាសន្ន រយៈចំនួន១៤ថ្ងៃ ចំពោះមណ្ឌលនៅទីស្តីការក្រសួង ផ្លូវឯកឧត្តម ជាសុផារ៉ា ចាប់ពីថ្ងៃទី០២ ដល់ ១៥ ខែសីហា ឆ្នាំ២០២១។ មណ្ឌលនៅផ្សារទំនើប ហេរីថេកវ៉ក ខេត្តសៀមរាប ចាប់ពីថ្ងៃទី៣០ ខែកក្កដា ដល់ ១២ ខែសីហា ឆ្នាំ២០២១ ។ ផ្លាស់ប្តូរម៉ោងផ្តល់សេវា ដោយចាប់ផ្តើមពីម៉ោង៩ព្រឹក ដល់ ៨យប់ ចំពោះមណ្ឌលនៅផ្សារទំនើប អ៊ីអន១ មណ្ឌលនៅផ្សារទំនើប អ៊ីអន២ និងមណ្ឌលនៅផ្សារទំនើបជីបម៉ុង ណូរ៉ូម៉ល ជាន់ទី៣ ជិតវិមានឯករាជ្យ ។ដូច្នេះសូមប្រជាពលរដ្ឋ មេត្តាអនុវត្តឱ្យបានខ្ជាប់ខ្ជួននូវវិធានការ ៣ការពារ និង៣កុំ ដើម្បីទប់ស្កាត់ការឆ្លងរីករាលដាល នៃជំងឺកូវីដ១៩ ៕