ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ បានដឹកនាំគណៈប្រតិភូចុះពិនិត្យមើលទីតាំងសម្រាប់សាងសង់ស្ថានីយជញ្ជីងអចល័តបណ្តោះអាសន្នក្នុងទឹកដីខេត្តបាត់ដំបង និងសំណូមពរដល់រោងចក្រផលិតស៊ីម៉ងត៍ CONCH ចូលរួមទប់ស្កាត់យានយន្តដឹកជញ្ជូនស៊ីម៉ងត៍លើសទម្ងន់កម្រិតកំណត់ចេញពីរោងចក្រ ថ្ងៃអង្គារ ៣រោច ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៧ ខែកក្កដា ឆ្នាំ២០២១ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ អមដំណើរដោយឯកឧត្តម ឯក រដ្ឋ អនុរដ្ឋលេខាធិការ ឯកឧត្តម គឹម សាន់ អនុរដ្ឋលេខាធិការ លោកអភិបាលរងខេត្ត ប្រធានលេខាធិការដ្ឋាននៃគណៈកម្មាធិការសម្របសម្រួលអចិន្ត្រៃយ៍ ប្រធានមន្ទីរសាធារណការ និងដឹកជញ្ជូនខេត្តបាត់ដំបង និងមន្ត្រីបច្ចេកទេសពាក់ព័ន្ធចុះពិនិត្យទីតាំងសម្រាប់សាងសង់ស្ថានីយជញ្ជីងអចល័តបណ្តោះអាសន្ន ដែលស្ថិតនៅត្រង់ចំណុច PK282+500 ផ្លូវជាតិលេខ៥ ក្នុងភូមិដំបូកខ្ពស់ ឃុំអូរដំបង២ ស្រុកសង្កែ ខេត្តបាត់ដំបង។ គោលដៅនៃការដាក់ជញ្ជីងបណ្តោះអាសន្ន ដើម្បីទប់ស្កាត់យានយន្តដឹកជញ្ជូនលើសទម្ងន់កម្រិតមួយចំនួនដែលដឹកជញ្ជូនខ្សាច់ ថ្ម និងស៊ីម៉ងត៍លើសទម្ងន់កម្រិតកំណត់ ចេញពីគោលដៅដើមទីនៃខេត្តបាត់ដំបង ទៅកាន់តំបន់ផ្សេងៗក្នុងព្រះរាជាណាក្រកម្ពុជា និងយានយន្តដឹកជញ្ជូនទូទៅដែលចរាចរណ៍លើផ្លូវជាតិលេខ៥។ ជាមួយគ្នានោះដែរ ឯកឧត្តមរដ្ឋលេខាធិការ ក៏បានដឹកនាំគណៈប្រតិភូជួបពិភាក្សាជាមួយក្រុមហ៊ុនផលិតស៊ីម៉ងត៍ CONCH ក្នុងខេត្តបាត់ដំបង ដើម្បីពន្យល់ ណែនាំច្បាប់ស្តីពីផ្លូវថ្នល់ ក្នុងមាត្រា ២៦និងមាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ និងសំណូមពរឱ្យក្រុមហ៊ុនអនុញ្ញាតយានយន្តដឹកជញ្ជូន ផ្ទុកទំនិញតាមទម្ងន់កម្រិតកំណត់ដោយច្បាប់ ដើម្បីការពារផ្លូវថ្នល់ និងកាត់បន្ថយគ្រោះថ្នាក់ចរាចរណ៍។ គួរបញ្ជាក់ថា ក្រសួងសាធារណការ និងដឹកជញ្ជូន បានរំលឹកជូនដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ម្តងហើយ ម្តងទៀត ដើម្បីទប់ស្កាត់ការដឹកលើសទម្ងន់កម្រិតកំណត់ និងបន្តអនុវត្តតាមច្បាប់ស្តីពីផ្លូវថ្នល់ មាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់យ៉ាងតឹងរ៉ឹងបំផុតដោយគ្មានការលើកលែងឡើយ ដែលគ្រប់យានយន្តធុនធ្ងន់ដឹកជញ្ជូនលើសទម្ងន់កម្រិតកំណត់ ២០%នៃទម្ងន់អនុញ្ញាត ត្រូវពិន័យអន្តរការណ៍ជាប្រាក់ និងឃាត់យានជំនិះទុកចំនួន ១(មួយ)ឆ្នាំ។ ក្រសួងក៏សូមអំពាវនាវចំពោះក្រុមហ៊ុន និងឯកជន ដែលប្រកបអាជីវកម្មផ្នែកដឹកជញ្ជូនតាមរថយន្តធុនធ្ងន់ទាំងអស់ចូលរួមគោរពតាមអនុសាសន៍ដ៏មានអត្ថន័យរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា “ការប្រកបមុខរបរទទួលទាន ក៏ដូចជាការបំពេញការងារ តាមវិជ្ជាជីវៈរបស់បងប្អូនប្រជាពលរដ្ឋ ប្រកបដោយការយកចិត្តទុកដាក់ និងការទទួលខុសត្រូវ គឺជាការតបស្នងដ៏សំខាន់ ដល់សង្គមជាតិ ដែលកំពុងមានសន្តិភាព និងការរីកចម្រើន អរគុណសន្តិភាព” និងចូលរួមជាមួយក្រសួងសាធារណការ និងដឹកជញ្ជូន និងរាជរដ្ឋាភិបាល ដើម្បីគោរព និងអនុវត្តតាមបទប្បញ្ញត្តិច្បាប់ជាធរមាន និងរួមចំណែកការពារហេដ្ឋារចនាសម្ព័ន្ធផ្លូវថ្នល់ ជាប់គង់វង្សតាមអាយុកាលកំណត់ ៕