ថ្ងៃព្រហស្បតិ៍ ៨កើត ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៧ ខែមិថុនា ឆ្នាំ២០២១ នៅទីស្តីការក្រសួង ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំស្ដីពីនីតិវិធីដាក់ឈ្មោះផ្លូវ ដើម្បីបញ្ចូលក្នុងផែនទីកម្រិតលេខផ្លូវ ឆ្នាំ២០២០ ដោយមានការអញ្ជើញចូលរួមដោយផ្ទាល់ពីថ្នាក់ដឹកនាំក្រសួងទទួលបន្ទុក និងការចូលរួមតាមប្រព័ន្ធវីដេអូពីចម្ងាយពីមន្ទីរសាធារណការ និងដឹកជញ្ជូន២៥រាជធានី-ខេត្ត និងភាគីពាក់ព័ន្ធផងដែរ។ អង្គប្រជុំបានផ្តោតជាសំខាន់លើការពិភាក្សាអំពីផែនទីបណ្តាញផ្លូវនៅទូទៅប្រទេសដែលឋិតនៅក្នុងដែន សមត្ថកិច្ចគ្រប់គ្រងរបស់ក្រសួងសាធារណការ និងដឹកជញ្ជូន និងមន្ទីរសាធារណការ និងដឹកជញ្ជូនរាជ ធានី-ខេត្តនីមួយៗនៅទូទាំង២៥រាជធានី-ខេត្ត។ ថ្លែងទៅកាន់អង្គប្រជុំនាឱកាសនោះ ឯកឧត្ដមរដ្ឋលេខាធិការ បានសម្ដែងនូវការកោតសរសើរ និងថ្លែងអំណគុណយ៉ាងជ្រាលជ្រៅចំពោះក្រុមការងារជំនាញមន្ត្រីសាធារណការ និងដឹកជញ្ជូនរាជធានី-ខេត្ត និងភាគីពាក់ព័ន្ធទាំងអស់ ដែលបានខិតខំប្រឹងប្រែងខិរៀបចំចងក្រងទិន្នន័យផ្លូវ ដើម្បីដាក់បញ្ចូលក្នុងផែនទីរួម ដែលអាចផ្តល់ភាពងាយស្រួលក្នុងការគ្រប់គ្រង៕