នាថ្ងៃទី០២ ខែមិថុនា ឆ្នាំ២០២១ នៅទីស្ដីការ លោកស្រី ប៉ុន សុគន្ធារ៉ា អនុប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ បានដឹកនាំកិច្ចប្រជុំពិភាក្សាផ្តល់ធាតុចូល ដើម្បីបិទបញ្ចប់គម្រោងយុទ្ធនាការបណ្តុះបណ្តាលមន្រ្តីបច្ចេកទេសពាក់ព័ន្ធទូទាំង២៥រាជធានី-ខេត្ត អំពីបច្ចេកទេស វិធីសាស្រ្តជួសជុល ថែទាំផ្លូវថ្នល់ និងការប្រើប្រាស់កម្មវិធីថែទាំផ្លូវ (ROAD CARE Mobile App) ដែលស្ថិតក្រោមគម្រោង “Sustainable Urban Mobility for All Initiative (SUMAI)” របស់អង្គការកម្មវិធីអភិវឌ្ឍន៍សហប្រជាជាតិ (UNDP) ប្រចាំនៅកម្ពុជា និងក្រុមហ៊ុនដឹកជញ្ជូន GRAB ជាមួយ លោកស្រី Johanna Legarta ប្រធានគ្រប់គ្រងគម្រោង SUMAI របស់អង្គការកម្មវិធីអភិវឌ្ឍន៍សហប្រជាជាតិ (UNDP) ប្រចាំនៅកម្ពុជា ដោយមានការចូលរួមពីមន្ត្រីជំនាញពាក់ព័ន្ធរបស់នាយកដ្ឋានព័ត៌មានវិទ្យា និងទំនាក់ទំនងសាធារណៈ។ គួររំលឹកផងដែរថា គម្រោងយុទ្ធនាការបណ្តុះបណ្តាលមន្រ្តីបច្ចេកទេសពាក់ព័ន្ធទូទាំង២៥រាជធានី-ខេត្ត អំពីបច្ចេកទេស វិធីសាស្រ្តជួសជុល ថែទាំផ្លូវថ្នល់ និងការប្រើប្រាស់កម្មវិធីថែទាំផ្លូវ (ROAD CARE Mobile App) ត្រូវបានធ្វើឡើងសម្រាប់រយៈពេល៣ខែ ចាប់ពីថ្ងៃទី០៤ ខែតុលា ដល់ថ្ងៃទី១៦ ខែធ្នូ ឆ្នាំ២០១៩ នៅទូទាំង ២៥ រាជធានីខេត្ត រួមមាន ការបណ្តុះបណ្តាលមន្រ្តីបច្ចេកទេសពាក់ព័ន្ធអំពីបច្ចេកទេស វិធីសាស្រ្តជួសជុល ថែទាំផ្លូវថ្នល់ និងផ្សព្វផ្សាយអំពីការប្រើប្រាស់កម្មវិធីដល់សាធារណជន រួមទាំងបានផ្តល់រង្វាន់លើកទឹកចិត្តដល់ប្រជាពលរដ្ឋដែលបានរាយការណ៍អំពីទីតាំងផ្លូវខូចច្រើនជាងគេផងដែរ។ គម្រោងនេះ បានជោគជ័យដោយទទួលបានចំនួនអ្នកប្រើប្រាស់ ចំនួនរបាយការណ៍បានការ និងចំនួនការចុះជួសជុលរួច ច្រើនគួរឱ្យកត់សម្គាល់។ ចាប់តាំងពីដាក់ដំណើការរហូតមកដល់បច្ចុប្បន្ននេះ ចំនួនអ្នកទាញយកកម្មវិធីសរុបប្រមាណជាង ២៦ ០០០នាក់ ហើយរបាយការណ៍សរុបរួចមានប្រមាណជាង ៥ ០០០ ករណី ដែលនេះបញ្ជាក់ឱ្យឃើញពីទំនុកចិត្ត និងការចូលរួមរបស់ប្រជាពលរដ្ឋក៏ដូចជាជំរុញ និងក្រើនរម្លឹកឱ្យសមត្ថកិច្ចទទួលបន្ទុក ការងារជួសជុលថែទាំផ្លូវ ធ្វើការយកចិត្តទុកលើការងាររបស់ខ្លួនបន្ថែមទៀត។ ក្នុងកិច្ចប្រជុំពិភាក្សានេះ មន្ត្រីនៃនាយកដ្ឋានព័ត៌មានវិទ្យា និងទំនាក់ទំនងសាធារណៈ ក៏បានធ្វើបទបង្ហាញអំពី បច្ចុប្បន្នភាពនៃកម្មវិធីថែទាំផ្លូវនេះដែលបាននឹងកំពុងធ្វើទំនើបកម្មបន្ថែមមុខងារថ្មីមួយចំនួនដូចជា ការរាយការណ៍អំពីបញ្ហាដឹកសំពីងសំពាង និងលើសទម្ងន់កម្រិតកំណត់ រំលោភបំពានដីចំណីផ្លូវ គ្រោះថ្នាក់ចរាចរណ៍ បញ្ហាសំរាម និងមុខងារវាយតម្លៃគុណភាពផ្លូវ ក្នុងគោលដៅដើម្បីធានាឱ្យបាននូវគុណភាពផ្លូវ និងប្រជាពលរដ្ឋងាយស្រួលក្នុងការរាយការណ៍ក្នុងករណីមានគ្រោះថ្នាក់ចរាចរណ៍ជាដើម។ នាយកដ្ឋានព័ត៌មានវិទ្យា និងទំនាក់ទំនងសាធារណៈ ស្នើសុំទៅ អង្គការ UNDP ឱ្យពិចារណាធ្វើការគាំទ្រទៅលើសំណើគម្រោងបន្ថែមមុខងារថ្មីនេះ។ ជាមួយគ្នានេះ លោកស្រី Johanna Legarta ប្រធានគ្រប់គ្រងគម្រោង SUMAI បានធ្វើការកោតសរសើរ និងសាទរចំពោះ លទ្ធផលជោគជ័យរបស់គម្រោង ព្រមទាំងបានបង្ហាញនូវការគាំទ្រចំពោះគំនិតផ្តួចផ្តើម ក្នុងការបន្ថែមមុខងារថ្មីនៅក្នុងកម្មវិធីថែទាំផ្លូវនេះ។ ដោយមើលឃើញនូវសារៈសំខាន់ក្នុងការបន្ថែមមុខងារថ្មីនេះ លោកស្រី Johanna Legarta សន្យាថានឹងយកសំណើបន្ថែមមុខងារថ្មីនេះ ទៅពិភាក្សាជាមួយថ្នាក់គ្រប់គ្រងរបស់អង្គការ UNDP។ ករណីមានគម្រោង SUMAI ជំហានបន្ទាប់ អង្គការ UNDP នឹងពិនិត្យលទ្ធភាពក្នុងការផ្ដល់ការគាំទ្របន្ថែមលើគម្រោងនេះ ដើម្បីអាចរួមចំណែក ក្នុងការជួយឱ្យប្រជាពលរដ្ឋទទួលបាននូវទីក្រុងដែលមានបរិស្ថានស្អាត សុវត្ថិភាព ក្នុងការបើកបរ ព្រមទាំងរួមចំណែកជំរុញដល់ការអភិវឌ្ឍន៍ទីក្រុងឆ្លាតវៃ និងពង្រឹងដល់រដ្ឋាភិបាលឌីជីថល៕