ថ្ងៃអង្គារ ១៤កើត ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៥ ខែឧសភា ឆ្នាំ២០២១ នៅទីស្តីការក្រសួងសាធារណការ និងដឹកជញ្ជូន ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិនិត្យពិភាក្សាលើយន្តការត្រួតពិនិត្យគម្រោងហេដ្ឋារចនាសម្ព័ន្ធផ្លូវថ្នល់ តាមរយៈកម្មវិធីថែទាំផ្លូវ (ROAD CARE Mobile App) ដោយមានការចូលរួមពីឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស លោកអគ្គនាយករងនៃអគ្គនាយកដ្ឋានបច្ចេកទេស លោកប្រធាននាយកដ្ឋាន អនុប្រធាននាយកដ្ឋាន និងក្រុមការងារបច្ចេកទេសផងដែរ។ ថ្លែងទៅអង្គប្រជុំនាឱកាសនោះ ឯកឧត្តមរដ្ឋលេខាធិការ បានឯកភាពជាគោលការណ៍លើបទបង្ហាញស្តីពីទស្សនទានក្នុងការបង្កើតយន្តការត្រួតពិនិត្យតាមរយៈកម្មវិធីថែទាំផ្លូវ (ROAD CARE Mobile App) នេះ ដែលបានរៀបចំដោយក្រុមការងារបច្ចេកទេស នៃអគ្គនាយកដ្ឋានបច្ចេកទេស។ បន្ថែមពីលើនេះ ឯកឧត្តមប្រធានអង្គប្រជុំក៏បានស្នើឱ្យក្រុមការងារជ្រើសរើសព័ត៌មានចាំបាច់មួយចំនួនដាក់លើទំព័រដើមដូចជាវឌ្ឍនភាពគម្រោងសម្រាប់ផ្តល់ជូនថ្នាក់ដឹកនាំ ងាយស្រួលក្នុងការពិនិត្យតាមដាន និងចាត់វិធានការទាន់ពេលវេលា ដើម្បីឱ្យគម្រោងឈានទៅរកការបញ្ចប់តាមផែនការដែលបានគ្រោងទុក និងប្រកបដោយគុណភាព៕