ភ្នំពេញ ថ្ងៃទី១២ ខែមីនា ឆ្នាំ២០២១ -- រដ្ឋបាលរាជធានីភ្នំពេញ សម្រេចគម្រោងជួសជុលមហាវិថីព្រះនរោត្ដម ដែលខូចខាត ដោយជំនន់ទឹកភ្លៀងកន្លងទៅ ចាប់ពីវត្តភ្នំរហូតដល់វិមានឯករាជ្យ បានអ៊ុតកៅស៊ូ AC កម្រាស់ ៥សង់ទីម៉ែត្រ បានបញ្ចប់ហើយកាលពីថ្ងៃទ១១ ខែមីនា ឆ្នាំ២០២១ បើទោះបីជំងឺកូវីដ-១៩ កំពុងតែរីករាលដាលក៏ដោយ តែការងារអភិវឌ្ឍន៍ក្នុងរាជធានីភ្នំពេញ នៅតែបន្តដដែល។ មន្ត្រីរដ្ឋបាលរាជធានីភ្នំពេញបានឱ្យដឹងថា កំណាត់មហាវិថីព្រះនរោត្ដមចាប់ពីរង្វង់ មូលរមណីយដ្ឋានវត្តភ្នំរហូតដល់វិមានឯករាជ្យ ក្រុមការងារបានធ្វើការជួសជុលសំបុកមាន់ ធ្វើគ្រឹះកាលពីពាក់កណ្តាលខែមករា ឆ្នាំ២០២១ និងបានបញ្ចប់ការជួសជុលគ្រឹះ កាលពី ថ្ងៃទី២០ ខែកុម្ភៈ ឆ្នាំ២០២១ ហើយក្រុមការងារបានចាប់ផ្ដើមធ្វើការអ៊ុតកៅស៊ូAC កាលពី ថ្ងៃទី២២ ខែកុម្ភៈ ឆ្នាំ២០២១ ហើយគិតត្រឹមថ្ងៃទី១១ ខែមីនា ឆ្នាំ២០២១នេះ ការដ្ឋាន បាន បញ្ចប់ជាស្ថាពរហើយ ដោយអ៊ុតកៅស៊ូ AC កម្រាស់៥សង់ទីម៉ែត្រទទឹង ១៦ម៉ែត្រ បណ្តោយប្រវែង២១៥០ម៉ែត្រ ចាប់ពីរង្វង់មូលវត្តភ្នំ ដល់វិមានឯករាជ្យ។ មន្ត្រីដដែលក៏បានបញ្ជាក់ផងដែរថា នៅក្នុងខណ្ឌដូនពេញ គម្រោងជួសជុល ផ្លូវដែលខូចខាតដោយជំនន់ទឹកភ្លៀងកន្លងមកនេះ មានចំនួន១៦ខ្សែ។ ប៉ុន្តែមកដល់ពេលនេះ ក្រុមការងារបានស្ថាបនារួចរាល់ចំនួន១១ខ្សែហើយ ពោលគឺកំណាត់មហាវិថីព្រះនរោត្តម នេះគឺជាកំណាត់ផ្លូវទី១១ របស់គម្រោងរដ្ឋបាលរាជធានីភ្នំពេញ។ មន្ត្រីដដែលបន្តថា រដ្ឋបាលរាជធានីភ្នំពេញ ក្រោមការដឹកនាំរបស់ឯកឧត្តម ឃួង ស្រេង បើទោះបីស្ថិតក្នុងដំណាក់កាលការរីករាលដាលជំងឺកូវីដ-១៩ ក្នុងព្រឹត្តិការណ៍ សហគមន៍២០កុម្ភៈក្តី តែរដ្ឋបាលរាជធានីភ្នំពេញ នៅតែធ្វើការអភិវឌ្ឍក្នុងរាជធានីភ្នំពេញ ជាបន្តទៀត៕