នៅមុននេះបន្តិច បើតាមការចុះផ្សាយរបស់ផេកហ្វេសប៊ុក ក្រសួងសាធារណការ និងដឹកជញ្ជូន បានឱ្យដឹងថា​ ការប្រឡងយកបណ្ណបើកបរយានយន្ត ត្រូវបានផ្អាកបណ្ណោះអាសន្នចំនួន ១សប្តាហ៍ ដែលត្រូវអនុវត្តចាប់ពីថ្ងៃទី៩ ខែមីនា ឆ្នាំ២០២១ នេះតទៅ ដើម្បីទប់ស្កាត់ការរីករាលដាលនៃជំងឺកូវីដ១៩។ សូមបញ្ជាក់ផងដែរថា ​គិតត្រឹមព្រឹក​ថ្ងៃទី ៩​ មីនា ២០២១​ អ្នកឆ្លងជំងឺកូវីដ១៩ នៅទូទាំងកម្ពុជាបានកើនឡើងដល់ចំនួន ១,០៦០ នាក់​​​​​​​​​​​​​​ (ស្រ្តីចំនួន ៤៥២ នាក់ និងបរុសចំនួន ៦០៨នាក់) ក្នុងនោះអ្នកព្យាបាលជាសះស្បើយចំនួន ៥៣៨នាក់ (ស្រ្តីចំនួន ២០១ នាក់ និងបរុសចំនួន ៣៣៧នាក់) និងអ្នកសម្រាកព្យាបាលនៅមន្ទើរពេទ្យសរុបចំនួន ៥២១ នាក់ នេះបើយោងតាមការចេញផ្សាយរបស់ក្រសួងសុខាភិបាលនៃព្រះរាជាណាចក្រកម្ពុជា។ ជាមួយគ្នានេះដែរ នាយកដ្ឋានប្រយុទ្ធនឹងជំងឺឆ្លង CDC ក៏បានក្រើនរំលឹកផងដែរថា ជំងឺកូវីដ-១៩​ នៅតែបន្តគម្រាមកំហែងយើងជាប់ជានិច្ច​ សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ​ នៅឃ្លាតឆ្ងាយពីគ្នា​ មិនចេញក្រៅផ្ទះបើមិនចាំបាច់​ ព្រោះប្រទេសយើងកំពុងរាត្បាតក្នុងសហគមន៍​ និងប្រទេសជិតខាងយើងនិងពិភពលោកកំពុងបន្តរាតត្បាតជំងឺកូវីដ១៩​ ដ៏ខ្លាំងក្លានៅឡើយ ។ នាយកដ្ឋានបន្ថែមថា យើងត្រូវបន្តរក្សាគម្លាតបុគ្គលបន្តទៀត​ ដូចជា​អង្គុយគម្លាតពីគ្នា​ ឈររងចាំគម្លាតពីគ្នា​ ឈរជជែកគ្នាគម្លាតពីគ្នាជាដើម​។ ជាពិសេសនោះ គឺត្រូវបន្តពាក់ម៉ាស់ជាប់ជានិច្ច និងឧស្សាហ៍ក្នុងការលាងសម្អាតដៃជាមួយសាប៊ូ​ អាល់កុល​ ឬជែល​៕