ក្លឹបកីឡាហែលទឹកក្រសួងសាធារណការ និងដឹកជញ្ជូនឈរនៅចំណាត់ថ្នាក់លេខ១, ក្លឹបហែលទឹកក្រសួងព័ត៌មានឈរនៅចំណាត់ថ្នាក់លេខ២ ខណៈក្លឹបក្រសួងសេដ្ឋកិច្ច និងហិរញ្ញវត្ថុ ឈរនៅចំណាត់ថ្នាក់លេខ៣ ដោយក្លឹបទាំងបីនេះប្រជែងមេដាយមាសបានច្រើនជាងគេ នៅក្នុងការប្រកួតកីឡាហែលទឹកជ្រើសរើសជើងឯកយុវជន ដណ្ដើមពានរង្វាន់ព្រឹទ្ធាចារ្យហែមថុន លើកទី៤ ឆ្នាំ២០២១ ដែលបានបញ្ចប់ដោយជោគជ័យ កាលពីចុងសប្តាហ៍កន្លងទៅ នៅអាងហែលទឹកពហុកីឡដ្ឋានជាតិអូឡាំពិក។ លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានបង្ហាញលទ្ធផលរបស់គណៈកម្មការបច្ចេកទេសថា ក្លឹបហែលទឹកក្រសួងសាធារណការ និងដឹកជញ្ជូន ដែលឈរនៅចំណាត់ថ្នាក់លេខ១នេះ គឺដណ្តើមបានមេដាយមាស៨ ប្រាក់៧ និងសំរឹទ្ធ៤ សរុប១៩គ្រឿង, ចំណាត់ថ្នាក់លេខ២ ក្រសួងព័ត៌មាន បានឈ្នះមេដាយមាស៧ ប្រាក់១ និងសំរឹទ្ធ១ ខណៈក្រសួងសេដ្ឋកិច្ច និងហិរញ្ញវត្ថុ លេខ៣ បានមេដាយមាស៦ ប្រាក់៨ និងសំរឹទ្ធ៥គ្រឿង។ ចំពោះក្លឹបហែលទឹកនាគរាជកំពង់ចាម លេខ៤ មេដាយមាស១ ប្រាក់៣ និងសំរឹទ្ធ៥ និងលេខ៥ ក្លឹប Oasis Swim Academy មេដាយមាស១ ខណៈ២ក្លឹបដែលមិនទទួលបានមេដាយសោះ គឺក្លឹបសាលាបារំាង Descarte និងសាលាអន្តរជាតិ ISPP។ ព្រឹត្តិការណ៍ហែលទឹកជើងឯកយុវជន ពានរង្វាន់ព្រឹទ្ធាចារ្យហែម ថុន លើកទី៤ ឆ្នាំ២០២១នេះ មានកីឡាករ កីឡាការិនីចូលរួមប្រកួតប្រជែងមេដាយចំនួន៩៨នាក់ ក្នុងនោះមានកីឡាករ៦៣នាក់ មកពីក្លឹបចំនួន៩ ដែលការប្រកួតមានរយៈពេល២ថ្ងៃគឺថ្ងៃទី១៩-២០ ខែធ្នូ ឆ្នាំ២០២១។ ការប្រកួតហែលទឹកនេះ ត្រូវបានធ្វើឡើងក្រោមគំនិតផ្តួចផ្តើមរបស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក ដើម្បីជាការរម្លឹកគុណូបការៈ និងស្នាដៃរបស់លោក ហែម ថុន និងបំផុសឲ្យកីឡាករ កីឡាការិនី យុវជនខ្មែរ និងបរទេសចូលរួមក្នុងគោលបំណងពង្រឹងសមត្ថភាព គុណភាពកីឡាករ កីឡាការិនីកម្ពុជាឲ្យកាន់តែល្អប្រសើរបន្ថែមទៀត៕