កំពង់ចាម ថ្ងៃទី២២ ខែមករា ឆ្នាំ២០២១ -- ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អញ្ជើញជាអធិបតី ក្នុងពិធីបើកការដ្ឋានស្ថាបនាផ្លូវចាក់កៅស៊ូប្រភេទ DBST១ខ្សែ ដែលមានប្រវែងជាង ៦៥០០ម៉ែត្រ និងពិធីសម្ពោធដាក់ឱ្យប្រើប្រាស់នូវផ្លូវក្រាលកៅស៊ូប្រភេទAC ចំនួន៤ខ្សែ មាន ប្រវែង ជាង៤៤០០ម៉ែត្រ ស្ថិតក្នុងក្រុងកំពង់ចាម ខេត្តកំពង់ចាម នាព្រឹកថ្ងៃសុក្រ ៩កើត ខែមាឃ ទោស័ក ពុទ្ធសករាជ ២៥៦៤ ត្រូវនឹងថ្ងៃទី២២ ខែមករា ឆ្នាំ២០២១នេះ នៅក្នុង សាលាបឋមសិក្សាកំពង់រលីង ស្ថិតក្នុងសង្កាត់សំបួរមាស ក្រុងកំពង់ចាម ខេត្តកំពង់ចាម និង មានការចូលរួមពីសំណាក់ឯកឧត្តម លោកជំទាវ អភិបាលរងខេត្ត ថ្នាក់ដឹកនាំ មន្ត្រីជំនាញ និងអាជ្ញាធរក្រុងកំពង់ចាមផងដែរ។ នៅក្នុពិធីបើការដ្ឋាននោះ ឯកឧត្តម​ អ៊ុនចាន់ដា អភិបាលខេត្ត​ បានមានប្រសាសន៍ថា ផ្លូវចាក់កៅស៊ូប្រភេទ DBST១ ខ្សែនេះ មានសារៈសំខាន់ណាស់សម្រាប់បម្រើផលប្រយោជន៍ រួម ព្រោះផ្លូវជាសសៃឈាមសេដ្ឋកិច្ច គឺ​មានផ្លូវមានសង្ឃឹម ម្យ៉ាងទៀតនៅពេលដែលទទួល បានផ្លូវ១ខ្សែនេះហើយ គឺប្រជាពលរដ្ឋយើងមានការងាយស្រួលក្នុងការធ្វើដំណើរ នឹងដឹក កសិផលទៅកាន់ទីផ្សារបម្រើសេដ្ឋកិច្ច និងជីវភាពការរស់នៅមានការប្រែប្រួលពិសេស តម្លៃដីខ្ពស់ជីវភាពប្រជាពលរដ្ឋរបស់យើងកាន់តែធូរធារ។ ឯកឧត្តមអភិបាលខេត្តបានលើកបញ្ជាក់ថា សន្តិភាពនាំមកនូវការអភិវឌ្ឍ។ ក្រោមការ ដឹកនាំរបស់សម្ដេចអគ្គមហាសេនាបតីតេជោ​ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា សម្ដេច​ជាប្រមុខដឹកនាំដ៏ឈ្លាសវៃ បានដឹកនាំនាវាកម្ពុជាឆ្ពោះទៅកាន់ សុខសន្តិភាព និងការអភិវឌ្ឍលើគ្រប់វិស័យដូចសព្វថ្ងៃនេះមានដូចជា ផ្លូវ ទឹក ភ្លើង ស្ពាន សាលារៀន មន្ទីរពេទ្យជាដើម។ ដូចនេះចូលយើងទាំងអស់គ្នាចូលរួមថែរក្សាសុខសន្តិភាព ដែលមានស្រាប់ឱ្យបានគង់វង្សសម្រាប់កូនចៅរបស់យើងតទៅអនាគត។ ឯកឧត្តម​ អ៊ុន ចាន់ដា​ ក៏បានសំណូមពរដល់បងប្អូនប្រជាពលរដ្ឋទាំងអស់ ដែលរស់ នៅជាប់បណ្តោយផ្លូវកំពុងបើកការដ្ឋាននៅថ្ងៃនេះ សូមមានការយោគយល់ និងអធ្យាស្រ័យ ចូលរួមសហការជាមួយក្រុមការងារ​ បើមានការប៉ះពាល់ដល់ ការសាងសង់ផ្លូវដូចជា ការត្រួស ត្រាយកាប់ដើមឈើ ឬប៉ះទៅលើរបងផ្ទះរបស់បងប្អូនជាដើម។ ឯកឧត្តម​អភិបាលខេត្ដ ក៏បានអំពាវនាវដល់ប្រជាពលរដ្ឋទាំងអស់ត្រូវតែអនុវត្តន៍ឱ្យ បានជាប្រចាំនូវវិធានការអនាម័យសុខភាពរបស់ក្រសួង សុខាភិបាល រួមគ្នាទប់ស្កាត់ការរាល ដាលនៃជំងឺកូវី១៩ រួមគ្នាគោរពច្បាប់ចរាចរណ៍ចាកឱ្យឆ្ងាយ និងបញ្ហាល្បែងស៊ីសង អប់រំកូនចៅឱ្យចៀសឱ្យឆ្ងាយពីគ្រឿងញៀនដើម្បីអនាគតរបស់ខ្លួន និងចូលរួមអនុវត្តគោល នយោបាយភូមិ ឃុំ មានសុវត្ថិភាពដើម្បីសេចក្តីសុខរបស់យើង៕